MATAYO 13
13
1Kïngeta Yeso köyoni akïwö kutang sörömu nanam, kumpur wölini akunetisyö. 2#Luk 5:1-3. Ki wow nyoman söpïch nyo kituyechï wölini ntökwigh nyinte kïwö kïpus meli, kumpur söpïchay sörömu nanam. 3Kïpöghisyeghö Yeso körkeyïntin kuneta pïchoni tïkwïn cho chang. Otini kinetisïyï kïlenchï, “Kimito chi nyo kiwö kïleta kösïgh. 4Otini kilechini parenyi kösïgh, kïchïnchini walaka arawet, kipka töritwö kwam. 5Kïchïnchï wölo le walaka koynot wölo kimïnïng nyïngwïtyanta, kïghya kösïghechay lawel ompöwölo kimïnïng nyïngwïtyante. 6Kïkany kulïwchï asis kïpel paghechay mïnkech ompöwölo kitomöcha kïröytö ighinkökwa ngwïny lasiny, kïsilonchö. 7Kïchïnchï kösïgh walaka kwenu kato, kïpit katochay akwam paghechoni. 8Wölo kïchïnchini kösïghe walaka nyïngwïtyan nyo akwagh kuyin nyoman. Kuyin walaka kïnyïl 100, kuyin walaka kïnyïl 60, kuyin walaka kïnyïl 30.”
9Kuwany Yeso lö, “Ato itïng chi yitïn cho ilïmo, ilïm!”
Keröto kinetat ompö körkeyïnini
(Mrk 4:10-12; Luk 8:9-10)
10Kïpa kinetankachi akïtep lö, “Kölö ne tengölonchinenyi pich ompö körkeyïntin nya?” 11Kuyokyï Yeso lö, “Kikekonokwa kinkïtöt nyo pö wïngut pö Pöyunöto Yïm, wölo tomönye keporchï pich walaka. 12#Mat 25:29; Mrk 4:25; Luk 8:18; 19:26. Ompöwölo ato tïng chi kïgh ketösyini walaka atökïnyorï cho chang tya, wölo ato mötïnye chi kïgh kechengo ompö nyini kötïng. 13Nka nyï ongölonan nko chane ompö körkeyïntin, ompöwölo rosöy chane, wölo mösïwïyicha kïgh akïteröy, wölo mölïmöcha anta pköchï kïgh. 14#Isa 6:9-10. Kïpïntö nyu ompö chane ngala cho kingor werkoyon Isaya lö lentöy Tororöt:
‘Olïmekwa ngal kïle wölo melö pköchinokwa kïgh,
arosekwa kirosat kïle, wölo mösïwïyekwanye kïgh.
15 #
Isa 6:9-10. Ompöwölo kiwöngisyö mötöwöyi pïchï,
kïminyö chane lö tïkïrkïr
akïköryö konyikwa,
tömöyotisyö konyïn akurosïta
akïyotisyö yitïn
akuyokyanïn kegh tosopön chane.’
16 #
Luk 10:23-24. “Wölo soyönote konyikwa cho rosïtoy akusoyönote yitikwa cho lïmöy kïgh. 17Omwowokwa nyoman lö kimököy werkoy cho chang nko pipö man lö tökïsïwa tïkuchï osïwïyekwa, wölo melö kïsïwa chane akïlö tökïlïm ngalechï olïmekwa, wölo melö kilïm chane.
Kingongwï Yeso körkeyïn pö letoghin
(Mrk 4:13-20; Luk 8:11-15)
18“Atere nyu körkeyïn pö letoghin. 19Ato lïm chi anka tïkwïl ngala Pöyunöt ameghanye, kïkarkegh nyinte nko kösïghecha kichïnchini arawet. Itu nyu Mwokïyontonay gha kïsara nyinte ngölyontonini kikïlechï mïkulöwunyi. 20Kïkarkegh kösïghe chinö kikïlechï wölo le koynot nko chi nyo teröy ngölyon ompö ngörekyö otini kalïm nyo tagh. 21Wölo mölïtönye ngölyonte orinyi lasiny, ghyongtoy osis cho ngörï, wölo ato itï kisusut anta kichopata kong ompö ngölyontonï, kïpïstö lawel. 22Kïkany kösïghe chinö kichïnchï kwenu kato, kïkarkegh nko chi nyo lïmöy ngölyonto Tororöt, wölo otini ketï sïngut pö ngwïny nko chamata sïkönöt kwam nyu ngölyontonay, amelö kitö kuyin akwa. 23Kïkarkegh kösïghyonte nyo kikïlechï nyïngwïtyan nyo akwagh nko chi nyo lïmöy ngölyonto Tororöt akïpköchï, kuyinï akwa, yinöy kösïghyonte akong kïnyïl 100, kuyin anka 60 kuyin anka tömönut sömök.”
Körkeyïn pö sekut
24Kïmwochï Yeso chane körkeyïntö anka nyo kilö, “Karkegh Pöyunöto Yïm nko chi nyo kilechï parenyi kösïgh cho karamach, 25wölo ato mi oghö kwen, kungwïn punyontenyi akïlechï sekut kwenu kösïghechay akïwechï kegh. 26Nyini kighya kösïghechay akuyinï pagh, kïpityö sekut tïkwïl. 27Kïtep pïchay kikatkat chito pare lö, ‘Echotyon, melö so kikatkatanyi kösïgh cho karamach parengu, kïpkana onö sekutchï?’ 28Kuyokyï nyinte lö, ‘Punyon nyoni kegh lenyoni.’ Kïtep mötworichay lö, ‘Imökenyi ye kepecha kengaghatena?’ 29Kuyokyï lö, ‘Ewo, ompöwölo omukekwa ongöghe paghe tïkwïl otini ongöghtokwa sekut. 30Akanya kïtïpï ntökïtenö kwitïta asispa ilö, olenchinan nyu ilï, kïnya kïghamït sekut akïratarat kïlïkwï rötutöy atökepel, wölo kïghömïtyï paghe töpotenyan.’ ”
Körkeyïn pö kösïghyonto aradali
(Mrk 4:30-32; Luk 13:18-19)
31Kimwochï Yeso chane körkeyïntö anka nyo kilö, “Karkegh Pöyunöto Yïm nko kösïghyonto ket pö aradali nyo kikötkötyï chi parenyi. 32Mïnïng kösïghyonte kïtïl kösïgh löwïr, wölo otini kapit, kï wowitu kïtïl ket löwïr akïlïkwï ket nyo wow nyo pkonöy töritwö kïteköy korikwa morichi.”
Körkeyïn pö mumar
(Luk 13:20-21)
33Kïmwochï Yeso chane ngat körkeyïntö anka nyo kilö, “Karkegh Pöyunöto Yïm nko pïsya cho pö depen odeny cho kicheng korka akutuyö nko mumar ntö kïkutï löwïr.”
Kinetut ompö körkeyïntin
(Mrk 4:33-34)
34Kipöghisyeghö Yeso körkeyïntin kuneta söpïchis ngalechi löwïr akimömwochïnye chane kïgh kwïle, kïpoto ompö körkeyïntin. 35#Tum 78:2. Kigh lenyoni atökïpïntö ngölyon nyo kimwa werkoyon lö,
“Opöghisyeghonan körkeyïntin
otini ongölonchinan chane,
omwochinan chane tïkwïn cho kikïwïng
kïngeta otini le towunöto ngwïny.”
Kingongwï Yeso kinetutyo körkeyïn pö sekut
36Atolapay kïpïstö Yeso söpïchnay akïlït kö. Kïpkonchï kinetankachi akïlenchï, “Porwecha köny lö netöy ne körkeyïnay pö sekut kimi par.”
37Kuyokyï Yeso chane lö, “Chichay kileta kösïgh cho karamach kï Wero Chi, 38pare kï ngwïny, kösïghechay karamach kï pich cho le nyingwa Pöyunöto Tororöt, wölo sekut kï pich cho pöyitu Onyöt 39akï punyonte nyini letoy sekutkö kï Onyöt. Ile kï sörömu kiwonyogh pö ngwïny, ilï kï malayken. 40Kïle wölaye kïghömïtïtoy sekut akepel, kïlïku nyoni ompö asispa Söröm, 41yontoy Wero Chi malaykenichi kïpa kïghamït pich kïngetunö pöyunötenyi chane löwïr cho mïtyini pich ngokï nko mwokïyiskö walaka 42akïwirchï ma nyo monïng, riryegho chane wölini akïnyagha kelat. 43Atolapay kulïwï pipö Tororöt le asis ompö Pöyunöto Papongwa. Ato itïng chi yitïn cho ilïmo, ilïm!
Körkeyïn pö kaplawach nyo wïngate
44“Karkegh Pöyunöto Yïm nko kaplawach nyo kikïwïnchï par. Kitöp chi ntökïnyorï atolapay kïwïng ngat. Ki wow ngörekyenyi nyoman nyo kimï kïwö kwalta tïkuchi löwïr cho kitïng akwal paranini.
Körkeyïn pö sönöywö nyo pö olyot nyo wow
45“Akïkarkegh ngat Pöyunöto Yïm nko chi olin nyo yörotoy karin cho pïchighöch. 46Nyo otini könyorï akonga nyo pïchigh tya, kïwö kwalta tïkuchi löwïr cho kitïng akwal karichini.
Körkeyïn pö net
47“Akïkarkegh ngat Pöyunöto Yïm nko net nyo kïnömo kaghagh nyo kakitö nanam tökïghamït kaghagh kïsyach. 48Akwotini kinyïghï, kïpa nömi kaghagh kuchutï kungwïn sörömu nanam akumpur ngwïny kupar kaghaghe, töni kaghaghe cho karamach köröponikwa, kïlasta chinö ghach. 49Lïku nyoni otini le sörömu ngwïny. Pkonöy malayken kïtöröy pich cho ghach nko pich cho karamach, 50akïwirchï chinö ghach ma nyo wow. Riryegho wölini, akïnyagh kelat.”
Kaplawachtin cho relach nko cho pö köny
51Kïtep Yeso chane lö, “Kopköchokwa ngalechï löwïr nya?” Kuyokï lö, “Owöy.” 52Kïlenyona kïlenchï chane, “Poru nyoni lö konetinto kirurut anka tïkwïl nyo lïku kinetana ngala Pöyunöto Yïm, kï karkegh nko chi nyo chenguno konyi tïkwïn cho relach nko cho pö köny kïpkana kaplawachtanyi.”
Kakïtagha Yeso Nasaret
(Mrk 6:1-6; Luk 4:16-30)
53Kïkany kuwany Yeso kïmwochini pich körkeyïntin, kïngeta atoni 54akïmïla korenyi kunetisyeghö sinakokin, kïtangany pich cho kilïm ngalechi, kïtepsyö lö, “Kinyorchï onö chichï ngöghomnyonï nko ighisyewutchï pö töngönchin? 55Möweronye so chichay le ighöy tïpö mpawtin nyete? Ayo, melö so kame Marya, akï werkökwa ompö Yakopo nko Yosep nko Simon nko Yudas? 56Akï mömicha tipikwa löwïr wölete? Kï kisïkö onö nyu nyinte ngalechï löwïr?” 57#Yna 4:44. Kïlenyona kïchuniö akïtagh ngalechi. Wölo kïlenchï Yeso chane, “Kïkonyïtöy werkoyon ompö wop anka tïkwïl, wölo melö ompö korenyi nko ompö konyi.” 58Amelö kitökwigh wöloni ighisyewut pö töngönchintin cho chang ompöwölo kimötïngcha chane kighanat.
Megha Yoana Kipatisanin
(Mrk 6:14-29; Luk 9:7-9)
Currently Selected:
MATAYO 13: PIPÏLIA
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
