YAKOBUS 5
5
Pongingat ahkan ulun-ulun tahtou
1Konduang-konduang, ulun-ulun tahtou! Ngonihohrih tingak-Ku. Kohandakrih ihkam nangih tutang nahtum tului ihkam ahkan ngarot koporos! 2#Mat. 6:19 Ponahtou'mu jari maram. Hahtin'mu jari tokuman gagat. 3Bulau tutang perak'mu jari totuhtup tagar; tagaroh ahkan jadi saksi molawan ihkam, tutang ahkan kuman opah behtin'kam kolou baho. Ihkam ius nunyuk ponahtou ang jaman monitu laiu. 4#Deut. 24:14-15 Ihkam eam bayar uhpah ulun-ulun, ijo bogawi ang umon'mu. Huntuh ngonih auh komonguh iro! Ulun-ulun ijo nipun bua umon'mu ngoriak nyawot dohop, tutang koriak iro jari johcok nokuh tolingan Pohotala, Tuhan Ijo Pahamkowasa. 5Ihkam ius bolum molowi tutang nginyam kosanang ang kolunon tuh. Ihkam koloujahka rahat pomonyak arop, ahkan ondou ponyombalih. 6Ihkam mohukum tutang munu ulun-ulun ijo eam bosala, tutang iro eam molawan ihkam.
Kosabaran tutang bodo'a
7Bain orih, bosabarrih Konduang-konduang'ku, nyiring Tuhan lombut. Nohto rih koloukuwoh sabaroh ihcobehti Pongumo ngindoi, nyiring umoioh polombut buaoh ijo borega ahkaioh. Umba kosabar io ngindoi uhjan musim ngonyahtu tutang uhjan musim dolak. 8Kohandakoh ka'a ihkam bosabar tutang hajo ahtoi, tului ondou polombut Tuhan jari doni.
9Ara bokuhtuk tutang saling hotosalan, mangat ihkam eam kona hukum bain Pohotala. Ingat! Hakim ius doni, tohtap ahkan lombut. 10Konduang-konduang, ingatrih dolang nabi ijo nuhtui ngosan aran Tuhan. Iro sabar tutang tabah ngarot. Jadi, omin iro monjadi sutu. 11#Ayb. 1:21-22, 2:10; Msm. 103:8 Iro konohawot sanangmangat tului iro tabah. Ihkam ius ngonih tohou kosabar Ayub, tutang ihkam ta'an koloukuwoh Tuhan ang laiuoh momborehkat Io. Tului Tuhan paham kasihsayang tutang hinut ahtoi.
12 #
Mat. 5:34-37
Ijo pahtukoh samasino, iorih: Ara nulut pios demi langit, kanika demi tana, ata'ai demi inonka iou. Ngohawotrih iou, ‘‘Yo’’ amat konohuang'mu yo, tutang ‘‘Eam’’ amat konohuang'mu eam; mangat ihkam ara tonopahas hukum bain Pohotala.
13Amat ang louk'kam anai ijo rahat susah, kopiosoh io bodo'a. Amat anai ijo jorih, handakrih io monyanyi monara Pohotala. 14#Mrk. 6:13 Amat anai ijo poros, hondakrih io na'ah ponotua-ponotua ukup. Tutang handakrih ponotua-ponotua ukup rih, bodo'a ahkan ulun ijo poros rih, tutang ngasakoh umba undus ang aran Tuhan.
15Amat do'a iro tongojohcokoh honong koyakinan, Tuhan ahkan ngopios ulun ijo poros rih, tutang ngapun dusai-dusai, ijo jari tonguaioh. 16Kotului orih, handakrih ihkam saling ngahku kosalan ihco umba ijo bohkon, honong saling bodo'a, mangat ihkam konopios. Do'a ulun ijo numbun konohuang Pohotala, tepun kowasa ijo hajo. 17#1Lahc. 17:1, 18:1 Elia, sama-sama kolunon kolou ihto. Io bodo'a honong tu'u-tu'u, mangat uhjan eam boduruh, mahka uhjan ka'a eam boduruh kotahin tolu sotengah toun. 18#1Lahc. 18:42-45 Pongo-huli io bodo'a hino, turus langit monduruh uhjan, nyiring tana nonga buaoh hino.
19Konduang-konduang'ku! Amat ang louk ihkam anai ihcobehti ijo eam monutut hino ajar tahkan Pohotala, turus ihcobehti ijo bohkon ngomin, ulun rih hoduli nokuh Pohotala, 20#Tdg. Sal. 10:12; 1Ptr. 4:8 ingat auh ayat tuh: Ulun ijo ngomin ulun bodusa ngulos tahkan jalaioh ijo sala, ulun rih nyolamat homboruan ulun bodusa rih, tahkan popahtoi, tutang kotuluioh aro dusa tonapunoh.
Horomat ihkai, Yakobus
Currently Selected:
YAKOBUS 5: OTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1997 Indonesian Bible Society (Lembaga Alkitab Indonesia)
