1 KORINTUS 1
1
1-3 #
Kes. Ras. 18:1
Konduang-konduang ukup Pohotala ang Korintus! Konduang jari tona'ah bain Pohotala ahkan monjadi ukup-Aiu, kobain Konduang ain Yesus Kristus, hombo-homboh paring ulun ang umoh ka'a ijo nyembah Tuhan ihto Yesus Kristus, iorih Tuhan iro tutang Tuhan ihto ka'a. Ahku, Paulus, tutang konduang ihto Sostenes, harap, keleh Pohotala, Amai ihto, tutang Tuhan Yesus Kristus nonga borehkat tutang kosanang komangat ahkan'kam. Ahku nyurat surat tuh, kolou rasul Kristus Yesus, ijo ponotuot bain Pohotala bongoi tutang kobain konohuang-Oh ka'a.
Borehkat-borehkat tahkan Pohotala nguha Yesus Kristus
4Ahku toturus botorimakasih ahkan Pohotala tohou ihkam, bain ihkam ius norima pononganasi tahkan Pohotala nguha Kristus Yesus. 5Kotului ihkam monjadi ain Kristus, mahka pombolum'kam tahtou a'ang dolang hal. Pongotaan'kam tohou dolang angihco puna timbon, tutang ihkam ahpik ngajar pongotaan rih. 6Orih nunjuk ijo borihta tohou Kristus jari kodorih nyalut nokuh luwang ahtoi'kam, 7nyiring ihkam eam kurang ihco borehkat ka, pondehan ihkam ngindoi Tuhan ihto Yesus Kristus lombut, tutang gihtan kobain paring ulun. 8Kristus bongoi ahkan monjamin ihkam nyiring aang kolaiuoh; mangat aang ohkot Io lombut hoduli, ihkam tonyombang-Oh eam aro kosalan. 9Pohotala dahpot tomorocaya labihtuwioh. Iorih Pohotala ijo jari na'ah ihkam ahkan monjadi ihco umba Anak-Oh, iorih Yesus Kristus, Tuhan ihto.
Kopisah ang luwang ukup
10Konduang-konduang! Ngosan aran Tuhan ihto Yesus Kristus, ahku nyawot mangat ihkam paringoh hihco pahkat puhtar; mangat ara anai kopisah ang louk ihkam. Hondakoh ihkam bulathihco, ihcoahtoi tutang ihcotiruk. 11Kotului ulun-ulun tahkan bobuhan Kloë mander ahkak'ku, ijo anai soaljawab ang louk ihkam. 12#Kes. Ras. 18:24 Ijo ahku ngonihoh iorih ijo ang louk ihkam anai ijo nuhtui, ‘‘Ahku umba Paulus,’’ anai ka'a nuhtui, ‘‘Ahku umba Apolos,’’ ijo bohkon nuhtui ‘‘Ahku umba Petrus,’’ kodorih ka'a ijo bohkon hino nuhtui, hioi, ‘‘Ahku barih Kristus.’’ 13Kuwohrih Kristus tuh tobagi-bagi? Paulus eam mahtoi tonyalib ahkan'kam! Ihkam ka eam tonopondus ahkan monjadi murid-murid Paulus, kuwoh?
14 #
Kes. Ras. 18:8, 19:29; Rum. 16:23 Torimakasih rih ahku, eam mopondus ihcobehti ka tahkan louk ihkam, bohkonumba Krispus tutang Gayus. 15Ara nyiring ihcobehti ka nuhtui, ijo ahku jari mopondus io ahkan monjadi murid'ku. (16#1Kor. 16:15 O yo, Stepanus tutang injah-jolahaioh puna ahku ijo mopondus iro. Tahpi ijo bohkon tahkan rih, ang anaiingat'ku, eam aro hino ulun bohkon ijo ahku mopondusoh.) 17Kristus nyuhu ahku, eam ahkan mopondus ulun, molekan ahkan mborihta Kabar Hinut tahkan Pohotala; tutang orih ka harus ahku nguai, eam aro hapan koahpik'ku bopander numbun kolunon, mangat kowasa tahkan popahtoi Kristus ang sopolahki, eam monjadi sia-sia.
Kowasa tutang kopihtar Pohotala mohcon aang Kristus
18Kotului ahkan ulun-ulun ijo nihtu korusak, borihta tohou popahtoi Kristus aang sopolahki, monjadi panderkouong. Tahpi ahkan ihto ijo nitu solamat kobain Pohotala, borihta rih puna tu'u caraoh Pohotala ngorinah kowasai-Oh. 19#Yes. 29:14 Tului ang Surat Borasih, Pohotala homauh,
‘‘Kopihtar ulun pintar ahkan Ahku nderohoh,
tutang kohorahtin ulun-ulun ahpik ahkan Ahku dianoh.’’
20 #
Ayb. 12:17; Yes. 19:12, 33:18, 44:25 Nah, inon gunai ulun-ulun pintar rih? Inon gunai ulun-ulun ahpik rih? Inon gunai karon-ahli pikir ang tana tuh? Pohotala jari ngorinah kokaron kopihtar kolunon tuh, puna uras auh alik iou!
21Kotului koloukuwoh ka kopihtaroh kolunon, io eam dahpot kosono Pohotala nguha kopihtaroh bongoi. Tahpi justru kobain Pohotala pihtar, mahka Io nohuang nyolamat ulun-ulun ijo porocaya umba Io, nguha borihta ijo ihkai nyiaroh ijo tongohu auh alik kobain kolunon. 22Ulun Yahudi nutut tandahelan jadi bukti, tutang ulun Yunani mongguna kopihtar kolunon tuh. 23Tahpi ihto tuh tihkas mborihta Kristus ijo mahtoi ang sopolahki. Borihta rih nyinggung pokomon ulun Yahudi, tutang tongohu tuhtui uong bain ulun-ulun bohkon Yahudi. Tutang ulun bohkon Yahudi ngohu orih ihco kouong. 24Tahpi bagi ulun-ulun ijo jari tona'ah bain Pohotala – pios io ulun Yahudi, kanika ulun bohkon Yahudi – borihta rih kolou caraoh Pohotala ngorinah kowasa tutang kopihtar-Oh. 25Kotului ijo gihtan ko-uong aang Pohotala, anai lobien pihtar tahkan kopihtaran kolunon; tutang ijo gihtaioh bolomu aang Pohotala, orih molowi ba'as tahkanumba koba'as kolunon.
Kowasan Pohotala tutang kolomun kolunon
26Konduang-konduang! Cuba ingat koloukuwoh koada'an'kam ang ohkot Pohotala na'ah ihkam. Tihkas honjiot iou tahkan louk ihkam ijo horahti, ata'ai bokowasa, ata'ai boponuotoh diang numbun topahjah kolunon. 27Tului puna Pohotala ha'at ngopili ijo tongohu uong kobain kolunon tuh, mangat ulun-ulun pihtar nyolung mia. Tutang Pohotala mitih ka'a ijo tongohu bolomu bain kolunon tuh, mangat ulun-ulun ijo ba'as gagah nyolung mia. 28Pohotala ngopili ijo tongohu randah, hina, tutang malah ijo tongohu eam boguna bain kolunon tuh, mangat Pohotala morusakoh ijo tongohu boguna kobain kolunon tuh. 29Honong kodorih eam ihcobehti ka dahpot namam aropoh ang toharep Pohotala. 30Pohotala bongoi ijo napa nyiring Konduang hihco umba Kristus Yesus. Nguha Kristus, ihto monjadi horahti. Tutang nguha Io ka'a Pohotala nguan ihto hokopios hoduli umba arop-Oh, monjadi ihto ukup-Aiu ijo khusus tutang ngoliwus ihto. 31#Yer. 9:24 Jadi kolou ijo tonyurat a'ang Surat Borasih, ‘‘Ulun ijo kani tama-tamam harus io namamoh ngosan inon ijo konuan Tuhan.’’
Currently Selected:
1 KORINTUS 1: OTD
Highlight
Copy
Compare
Share
Want to have your highlights saved across all your devices? Sign up or sign in
@ LAI 1997 Indonesian Bible Society (Lembaga Alkitab Indonesia)
