BAROMA 2
2
Nyasaye yakhakhalachile bosi
1Kho ibe omulina noba nokhalachilanga abasio sioba nokhwesoola khwosi tawe. Okhuba olwa okhalachilanga abasio, esiina sikhufwilanga ibe omwene, okhuba nawe okholanga amang'ana amatelwa tsana okokhalachilanga abasio.#Mat. 7:1; Lk. 6:37 2Nefwe khwamanya obukhalachi bwa Nyasaye nobwatooto khubo abalondanga amang'ana singa yako. 3Nawe omundu ibe, okhalachilanga yabo abalondanga amang'ana yako, ne nawe omwene nokhola akatsana. Okaalanga mbu olahona khusiina sia Nyasaye noho? 4Nohomba ochayanga tsimbabasi tsitsie tsingali, nende okhwesimilisia khukhwe. Siahene umanyile singa Nyasaye ali owesirenda sichila arunanga mbu wekalukhanie. 5Nebutswa khulwa obutinyu bwomwoyo kukwo okurali nokhwekalukhania, welombelanga esinyasio sisio omwene okhuba esikali Mwitukhu lioburima bwa Nyasaye nende liobukhalachi obulunji obwakhabisukhe. 6Nyasaye yakhakabile siomundu habwene okhuhelana nemilimo chichie.#Etsisa. 62:12; Tsinj. 24:12 7Khu yabo abesimilisia mukhukhola amalahi, nibaruna mbwo oluyali neifuma nende obulamu bweinziayo, Nyasaye alibakabul'la obulamu bweinziayo. 8Abandu bandi nabekhotseli, nibafukula akali akatooto, kho mbu balonde akarali akatooto, khubo Nyasaye yakhatsukhe lirima nende lilekolie. 9Yabo bosi abakholanga obubi bakhanyoole okhusalila nende okhutsuunia. Akene yako kakhakwile Abayahudi mbelio ma khandi Abetsimbia tsindi. 10Nebutswa Nyasaye yakhahane obukhongo noluyali neifuma nomulembe khu siomundu okholanga obulahi; olwokhuranga khu Bayahudi khandi nende Abetsimbia tsindi. 11Okhuba Nyasaye abula ebiela khumundu wosi.#Okhuka. 10:17
12Yabo bosi abakhola tsimbi sila okhumanya Amalako ka Musa bakhatibe sila Amalako. Ne bosi abakholanga tsimbi nibamanyile Amalako balikhalachilwa okhuhelana na Malako. 13Abandu sibakholwa okhuba abalunji khu Nyasaye khulwa okhuhulila Amalako tawe, nebutswa khulwa okhukakhola. 14Abetsimbia tsindi sibali na Malako tawe; nebutswa olwa bakholanga mufwo yabwe amang'ana akahela Amalako, khe bali namalako khubwabwe kata olwa barali na Malako. 15Mu yako bamanyianga mbu emilimo chia Malako chiahandikwa mumioyo chiabwe, khandi emioyo chiabwe nachio nichihuchilisania n'nako khukobukobokheli, tsinganakani tsiabwe nitsiba khukene yako nikabayaala nohomba nikabakobokhela. 16Nimbwo kakhabe Mwitukhu yilio olwa Nyasaye alikhalachila amabiso kabandu okhubir'ra mu Yesu Kristo okhulondokhana khu Mang'ana Amalahi akangambanga.
Abayahudi nende Amalako kabwe
17Nawe omundu yibe, welanganga Omuyahudi; weletanga khu Malako niweitsomia mbu oli owa Nyasaye, 18wamanya aka Nyasaye yenyanga okhole ma khandi wayeka okhurula khu Malako habwene, 19welolanga okhuba omwemeli wababofu, khandi obulafu khuyabo abali musiilima; 20welolanga okhuba omwibaali khubahingwa, khandi omwibaali khubaramanyile esindu. Oli nokhusubila mbu khulwa Malako wamanya amang'ana kosi nende obwatooto. 21Ibe wibaal'langa abandi, busina nawe noreibaalila khwo omwene? Okambanga, “Omundu areeba tawe” ne ibe mwene siwibanga noho? 22Ibe oboolanga, “Omundu araheya” ne nawe soheyanga noho? Ibe ochaayanga akemisambwa, nawe siwibanga ebiomu Hekalu noho? 23Ibe weitsoomianga mbu oli na Malako ka Nyasaye ne soleranga es'simba murwe khu Nyasaye olwa obulanga okhuhesia Amalako? 24Amahandiko Amatsienukhu kaboolanga mbu, “Abetsimbia tsindi bal'lomanga obubi khu Nyasaye khulwe inywe Abayahudi.”#Isaya 52:5
25Es'sebo tooto sili nobukusi nikaba mulondanga Amalako, ne nikaba mufunaka Amalako, es'sebo sienywe khe sibula obukhala. 26Omundu orasebwa naba nalonda Amalako, Nyasaye alamubala singa owasebwa. 27Yabo abarasebwa nebutswa nibahesianga habwene aka Malako, bakhamukhalachile esiina inywe abasebwa ma khandi abali na Malako mubuhandiche nebutswa nimurahesianga aka Malako. 28Omuyahudi watooto siali butswa Omuyahudi khumang'ana kesioba tawe, kata es'sebo sisili butswa esiokhumubili ikulu tawe. 29Omuyahudi watooto ni uyo oli Omuyahudi mumang'ana komusi, ne okhusebwa khwatooto namang'ana akomumwoyo. Yaka kakholwanga no Mwoyo wa Nyasaye ne sikali butswa khulwa okhuhandikwa mu Malako tawe. Okhwitsoomibwa khwomundu ofwana mbu sikhurulanga khubandu tawe nebutswa khurulanga khu Nyasaye.#Okhuka. 30:6
©Bible Society of Kenya, 2019