MATAYO 4
4
Okhutemwa khwa Yesu
(Mk. 1:12-13; Lk. 4:1-13)
1Kho Yesu yemel'lwa nende Omwoyo okhutsia musitsiimi okhutemwa nende Setani.#Heb. 2:18; 4:15 2Ne olwa yali niyahonjele inzala amatukhu amakhumi kane, om'basu nobutukhu naralitsangakhwo esiokhulia tawe, inzala yamala nemuluma. 3Ma Setani niyetsa khuye namubool'la “Noba noli Omwana wa Nyasaye, laka amachina yaka kakwe obusuma.”
4Nebutswa Yesu yakalusia, “Akahandikwa kaboolanga: ‘Omundu sialamenya khulwobusuma bwonyene tawe, nebutswa khu sieling'ana elia Nyasaye al'lomanga.’ ”#Okhuka. 8:3
5Ma khandi Setani namuhila Yerusalemu, litookho Litsienukhu, namusinjisia khubutenje bwes'suli sie Hekalu. 6Namubool'la: “Noba noli Omwana wa Nyasaye ruuma hasi; sichila akahandikwa kaboolanga:
‘Nyasaye alalaka abamalaika baabe khumang'ana kako,
nabo balakhuletel'la mumakhono kabwe,
khase wakhesikar'ra esilenjesio khwichina.’ ”#Etsisa. 91:11-12
7Yesu namubool'la, “Khandi Akahandikwa kaboolanga: ‘Oratema Omwami Nyasaye uwo tawe.’ ”#Okhuka. 6:16
8Ma khandi Setani namuhila ikulu wesikulu esirambi namumanyia oburuchi bwosi bwesibala muluyali lwabwo lwosi. 9Ma namubool'la, “Yibi biosi ndakhuha noba nokwa hasi niundekayakaya.” 10Ma Yesu namubool'la, “Rula otsie Setani, sichila Akahandikwa kaboolanga mbu ‘Winamilenje Omwami Nyasaye uwo nomurumikhila yenyene.’ ”#Okhuka. 6:13 11Kho Setani narula khu Yesu, ne abamalaika nibetsa nibamurumikhila.
Yesu achiachila omulimo kukwe mu Galilaya
(Mk. 1:14-15; Lk. 4:14-15)
12Nyinga Yesu yahulila mbu Yohana ureywe mubuhambe yatsia Galilaya.#Mat. 14:3; Mk. 6:17; Lk. 3:19-20 13Yarula Nasareti natsia Kaperinaumu, litaala elili ahembi neinyanza ya Galilaya mutsimbeka tsia Sabuloni na Nafutali.#Yoh. 2:12 14Yaka kekhola kachile akomuroobi Isaya yali niyaroba kahesikhe,
15“Esibala sia Sabuloni nende esibala sia Nafutali
khunjila yokhunyanza injelekha wa Yorodani,
Galilaya esibala sia betsinzibulo.#Isaya 9:1-2
16Abandu abamenyanga musiilima
Balalola obulafu obukhongo.
Nabo abamenyanga mutsimbeka tsiesiliima siolufu,
obulafu nabubakhile.”
17Okhurula khunyinga yene iyo Yesu yachiaka okhukamba nokhuboola, “Murule mutsimbi tsienywe okhuba Obwami bwomwikulu buli ahembi!”#Mat. 3:2
Yesu yalanga abalubi bane okhumulonda
(Mk. 1:16-20; Lk. 5:1-11)
18Olwa Yesu yali nachendanga khuluchinga lweinyanza ya Galilaya, yalola abamwabo babili abali abalubi. Mulala khubo yali Simoni owalangwa Petero nende amwabowe Anderea. Bali nibalubanga tsisutse namakoko munyanza. 19Yesu yamala ababool'le, “Munonde nase namwibaal'le obwokhuluba abandu.” 20Ne bwangu nibalekha amakoko kabwe nibamulonda.
21Yatsilil'la hambeli okhurula yaho ma nalola abamwabo bandi babili, Yakobo na Yohana abaana ba Sebedayo. Nabo bali mbali muliaro halala nende samwana wabwe Sebedayo nibarechekhanga amakoko kabwe. Ma Yesu nabalanga. 22Nabo bwangu nibalekha eliaro halala na samwana wabwe nibamulonda.
Yesu yebaal'la abandu nokhubahonia abalwaye
(Lk. 6:17-19)
23Yesu yabotokhana musibala sia Galilaya siosi niyebaalanga mutsisinakoki#4:23 Mutsisinakoki Amasomelo kamakanisa kesiyahudi. tsiabwe nakamba Amang'ana Amalahi akobwami nahonianga obulwaye tsimbila tsiosi mubandu. #Mat. 9:35; Mk. 1:39 24Ifuma yiye yalanda musibala sia Siria siosi, kho abandu nibamuler'ra bosi abali mbalwala nende abali nokhutsunwa lukano, nende abali nebisieno, nabetsindulume, nende abakwa amakara nabahonia. 25Emikanda emikali chiamulonda echiarula Galilaya, nende Dekapoli#4:25 Dekapoli Liboolanga amataala likhumi., na Yerusalemu ne Ebuyahudi; nende injelekha wa Yorodani.
Currently Selected:
MATAYO 4: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019