MATAYO 2
2
Abachesi okhurula ebukwe
1Yesu yebulwa mwitaala lia Betselehemu ye Buyahudi mumatukhu koburuchi bwomwami Herode. Olwene yilwo abandu abachesi khuketsiyasulwe barula ebukwe nibetsa Yerusalemu, 2nibareeba, “Ali hena uyo omwana owibuywe okhuba omuruchi wa Bayahudi? Khuluutsi eyasulwe yiye ebukwe, ma khwitsile okhumwekayakaya.” 3Ne olwomuruchi Herode yahulila yako, ikholo nemurimukha halala nende bosi abali n'naye mu Yerusalemu. 4Yabunjelesia halala abesaalisi abakhongo nende abebaali ba Malako nabareeba, “Masihi anyala okhuba niyebuliywe hena?” 5Bamubool'la, “Mwitaala lia Betselehemu ye Buyahudi okhuba kano niko akomuroobi yahandika:
6‘Nawe Betselehemu musibala sia Yuda,
sioli omutututu mubaruchi ba Yuda tawe;
okhuba mwibe alirulamwo omuruchi
oliemel'la abandu banje Abaisiraeli.’ ”#Mika 5:2
7Kho Herode nalanga abachesi abamanya aketsiyasulwe masilisi, nabareebelesia kalaha ni nyinga sina olweyasulwe yalolekha. 8Yamala nabaruma Betselehemu, nababool'la, “Mutsie muhengelesie nesinani khwing'ana liomwana mutoro; ne nyinga nam'munyoole namwitse okhumbool'la, mbu nase nanzie okhumwekayakaya.”
9Nyinga bali mbahuliye akomuruchi, barulaho nibatsilil'la noluchendo lwabwe, ne eyasulwe eya bali nibalutsi ebukwe, yabemel'la neluha nesinjila habundu ho mwana yali nali. 10Ne olwa balola eyasulwe basangala nokhusangala okhukali. 11Benjila munyumba, ne olwa balola omwana omutoro nende Mariamu nyinawe, basikama hasi nibamwekayakaya nibaboholola amabere kabwe nibamuha ebihanwa bietsahabu nobwali nende manemane.#2:11 Manemane Esipande siomusaala esiomibwa, esiasebwa obusie ma esihunyanga obulahi esiarumikhilwanga na Bayahudi singa indesi.
12Ma bakalukha musibala siabwe khunjila yindi, okhuba Nyasaye yali nabachetsihisie mwilooro mbu barakalukhila owa Herode tawe.
Okhwilukhila Emisiri
13Nyinga bali nibamal'le okhutsia, lola Om'malaika wo Mwami yalolekha khu Yosefu mwilooro naboola, “Sinjila obukule omwana na nyina, wilukhe otsie Emisiri. Ne mubeyo okhwola olwa ndikhubool'la, sichila Herode arunanga omwana omutoro amwire.” 14Yosefu yabuukha nabukula omwana omutoro na nyinamwana mbarula butukhu nibatsia Emisiri. 15Ne yamenyayo okhwola okhufwa khwa Herode. Yaka kekhola mbu ako Mwami yaboola, okhubir'ra mumuroobi kahesikhe; “Ndali okhulanga omwana wanje okhurula Emisiri.”#Hosea 11:1
Abaana batoro niberwa
16Khe nyinga Herode yalola obwa yali nabatsilwe nabachesi abarula ebukwe yasinyikha. Yalaka mbu abaana abasiani bosi abali mu Betselehemu, nende mutsimbeka tsiasio tsiosi, abemihika chibili nende abali hasi wemihika yichio berwe singa obwa yali namanyilisisie habwene khubachesi. 17Akomuroobi Yeremia yali okhuboola kahesikha munjila yiyi, mbu:
18“Liyoka liahul'likha Rama,
Okhulakaya nende tsindekhuulu tsinyinji,
Raheli yekhuulanga abaana baabe
Ne usuye okhuhotselesibwa,
sichila bafwiye.”#Yer. 31:15
Okhuchelela okhurula Emisiri
19Herode namal'le okhufwa, Om'malaika wo Mwami yabisukha khu Yosefu mwilooro nali Emisiri, 20namubool'la “Buukha obukule omwana omutoro na nyinamwana, ma okalukhe musibala sia Isiraeli; sichila abali mbarunanga okhwira omwana omutoro baafwa.” 21Kho Yosefu yabuukha nabukula omwana omutoro na nyinamwana, m'batsia musibala sia Isiraeli.
22Nebutswa olwa Yosefu yahul'la Arikelau arukanga Ebuyahudi musilenje sia Herode samwanawe, yali okhuria okhutsiayo. Olwa Nyasaye yali namuchetsihisie mwilooro yamala natsia mumbeka tsia Galilaya. 23Ma namenya mwitaala elilangwa Nasareti; kho akomuroobi yali niyaboola kahesikhe, mbu: “Alilangwa Omunasareti.”#Mk. 1:24; Lk. 2:39; Yoh. 1:45
Currently Selected:
MATAYO 2: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019