LUKA 5

Yesu yalanga abalubi bataru okhumulonda

(Mat. 4:18-22; Mk. 1:16-20)

1Litukhu elala Yesu yali nasinjiye khuluchinga lweinyanza ya Genasareti, ne abandu abenji bali nibaminananga okhwitsa khuye okhuhul'la ling'ana lia Nyasaye.#Mat. 13:1-2; Mk. 3:9-10; 4:1 2Yalola amaaro kabili nikasinjisiibwe khuluchinga lweinyanza. Abalubi bali nibarul'le nibosianga amakoko kabwe. 3Yesu yaniina muliaro elala khuko – eliali elia Simoni ma namureeba aliselechesie hatititi okhurula khuluchinga. Niyekhala muliaro niyebaal'la emikanda. 4Olwa yamala okhul'loma yabool'la Simoni, “Selechesia eliaro olihile mulutungu lwamaatsi ma ibe nende abasio mwisie amakoko kenywe mumaatsi mutile tsisuche.”

5Simoni namukalusia, “Omwami, khunyakhan'ne obutukhu bwosi, sikhutil'le isutse yosi tawe, nebutswa sichila ubooye ndesia amakoko.”#Yoh. 21:3 6Nibeesia amakoko ma nibatila tsisuche tsinyinji okhusila ma amakoko kabwe nikachiaka okhukhalikha.#Yoh. 21:6 7Bamala nibasima abasiabwe abali mumaro kandi okhubakhonya. Betsa ma nibetsusia amaro kabwe kosi netsisutse, nikenya okhweyinikha. 8Olwa Simoni Petero yalola akali nikekhol'le, yasikama imbeli wa Yesu naboola, “Omwami, rula khwise, sichila ndi omundu wetsimbi.”

9Ye nende aba yali n'nabo bosi bachenya khulwo obwinji bwetsisutse tsia bali nibahambile. 10Khandi amatelwa yako kali khubasie Yakobo nende Yohana, abaana ba Sebedayo. Yesu nabool'la Simoni, “Oraria tawe, okhurula lunondi nobetsenje omulubi wabandu.” 11Bamala nibaleera amaaro kabwe khuluchinga ma nibalekha ebindu biosi, nibalonda Yesu.

Yesu yahonia omundu wobuchele

(Mat. 8:1-4; Mk. 1:40-45)

12Olundi Yesu yali mwitaala nalebe, omundu owali nobuchele khumubili kwosi yetsa khuye. Olwa yalola Yesu yamala nakwa hasi mafung'ama nahomba Yesu naboola, “Omwami noba noyanza onyala okhuusiiya.”

13Yesu nanyiila omukhono kukwe, namutilakhwo ma naboola, “Nyanzile, osiiyikhe.” Ne bwangu obuchele niburula khumundu uyo. 14Yesu namulaka butinyu, “Orakhabool'la khwo omundu wosi tawe, nebutswa otsie khumwesaalisi akhuhengelesie ma khulwa okhumanyia abandu mbu umal'le okhusiyikha, ohaane esihanwa esia Musa yalaka.”#Abal. 14:1-32 15Nebutswa oluyali lwa Yesu lwalanda habundu hosi. Emikanda emikhongo chiabandu chiebunjikha khulwa okhumuhul'la nende okhuhonibwa obutekhele bwabwe. 16Nebutswa Yesu yeyahula natsia ha bandu barali, nasaayila ho.

Yesu yahonia omundu owakwa likara

(Mat. 9:1-8; Mk. 2:1-12)

17Litukhu elala Yesu yali niyebaalanga, ne abalala khu Bafarisayi nende abebaali ba Malako mumataala kosi aka Galilaya, Ebuyahudi nende Yerusalemu bali nibekhayeho. Obunyali bwo Mwami bwali nibuli khuye obwokhuhonia abalwaye. 18Abandu betsa nibachingile omundu owakwa likara nali khusirili, nibatema okhumwinjisia bamure imbeli wa Yesu. 19Nebutswa khulwo obwinji bwabandu, sibanyoola obwa bamwinjisia tawe. Bamala nibaniina khusilama nibasambula habundu nibechis'sia ho omundu owakwa likara halala nesirili sie, nibamura imbeli wa Yesu. 20Olwa Yesu yalola obwa bali nobusubili obukali, yabool'la omundu owakwa likara, “Omulina, tsimbi tsitsio tsilekheywe.” 21Abebaali ba Malako nende Abafarisayi nibachiaka okhubool'lana abene khu bene, “Uyu ni mundu sina onyekanga Nyasaye? Abulaho onyala okhulekhela tsimbi narali Nyasaye yenyene.” 22Nebutswa Yesu yamanya amapaalo kabwe ma nababool'la, “Busina mukanakananga yaka mumioyo chienywe? 23Nobutoro okhuboola, ‘Tsimbi tsitsio tsilekheywe;’ nohomba okhuboola, ‘Sinjila ochende?’ 24Kho nyenyanga mumanye mbu Omwana wo Mundu ali nende obunyali musibala okhulekhela tsimbi.” Ma nabool'la owakwa likara, “Sinjila obukule esirili sisio otsie ingo.” 25Ne bwangu bwangu omundu owakwa likara nasinjila, nabukula esirili sisie, narula natsia ingo niyetsomianga Nyasaye. 26Bosi nibachenya nibaba nende oburi, nibafumia Nyasaye nibaboola, “Khulol'le akokhuhuka olwaleelo.”

Yesu yalanga Matayo okhumulonda

(Mat. 9:9-13; Mk. 2:13-17)

27Inyuma we yaka Yesu yatsia nalola omusololi wobusuru owalangwa Lawi niyekhaye ha yasolol'langa obusuru. Yesu namubool'la, “Nonda.” 28Lawi nasinjila, nalekha biosi, ma namulonda.

29Lawi yalombela Yesu lisabo likali hango hahe. Ne abasololi bobusuru abenji nende abandu bandi bali nibekhaye halala n'nabo khubiokhulia. 30Abafarisayi nende abebaali ba Amalako nibekan'na abechi ba Yesu nibaboola, “Busina mulitsanga nimunywa nende abasololi bobusuru nende abetsimbi?”#Lk. 15:1-2 31Yesu nabakalusia, “Abandu abali abalamu sibarunanga omulesi tawe, nebutswa abarunanga omulesi na abalwaye. 32Ise sindaitsa okhulanga abalunji tawe – nebutswa abetsimbi khe baabe abanyala okhwekalukhania.”

Lireebo khukokhuhonga okhulia

(Mat. 9:14-17; Mk. 2:18-22)

33Abandu bandi babool'la Yesu, “Abechi ba Yohana bahonganga okhulia hali khasotso, nibasaaya, khandi abechi ba Bafarisayi nabo bakholanga mbwo; nebutswa abechi baabo baliitsanga butswa nibanywa.” 34Yesu nabakalusia, “Muli abanyala okhuhachia yabo abalanjilwe mus'selelo okhuhonga okhulia olwo omusaatsa mwene s'selelo ali n'nabo? 35Nebutswa amatukhu kakhole olwa omwene es'selelo yakhahinibwe khubo, nilwo olwa balihonga okhulia.” 36Yesu nababool'la olukano yilu: “Abulaho omundu orandulanga esilaka khungubo imbia nanabila khungubo ikhulu. Nakhola mbwo yakharandula ingubo ne khandi esilaka esihia yisio sisiakhafwanana nende ingubo tsana tawe. 37Khandi abulaho omundu otsukhanga ewaini imbia mumitata chiamaseelo emikhulu, sichila ewaini enyala okhurandula amaseelo ma esundukhe hasi, ma emitata chiononokhe. 38Nebutswa ewaini imbia okhwola etsukhwe mumitata chiamaseelo emihia. 39Abulaho omundu owenyanga ewaini imbia namal'le okhunywa ewaini ikhulu sichila yakhaboola ‘Eyakhale neindahi okhuyomba imbia.’ ”

Currently Selected:

LUKA 5: EBAIBO

Highlight

Copy

Compare