ABALAWI 7
7
Emisango khulwo khubula okhurunga akenyekhanga
1Kano niko amalako kokhulondwa olwa ohaananga emisango khulwo khubula okhurunga akenyekhanga, echili emitsienukhu. 2Omuruko kwokhuhanwa khumusango yiku okhwola kwiir'rwe elubeka wolusambwa, ahemiruko chiomusango kwokhusambwa chir'rwanga ma amatsahi kakwo kasundulwa khutsimbeka tsine etsiolusambwa. 3Esinya yakwo ehinibwe yosi ma erebwe khulusambwa, mbu: isembe, nende esinya eli khubiomunda, 4etsisiko nende esinya yatsio nende aheingurumani eli indahi okhusila. 5Omwesaalisi yetsa okhusambila esinya yosi khulusambwa singa omusango kwebiokhulia ebiokhuhaana khu MWAMI. 6Omundu wosi owes'siani munyumba tsiabesaalisi anyala okhuchiliakhwo, nebutswa okhwola eliilwe habundu hatsienukhu, sichila neinzienukhu okhusila.
7Liliho lilako elala elirumikhanga khukhuhaana omusango kwetsimbi nende khukhuhaana omusango kwokhubula okhurunga ebienyekhanga: inyama neyomwesaalisi obetsanga nahan'ne omusango yikwo. 8Liseelo liomusango kwokhusambwa neliomwesaalisi obetsanga nahan'ne omusango yikwo. 9Omusango kwosi okwobuswache butekheywe khwichiiko nohomba okutekheywe khusifuria nohomba khusichuma esitekhelwangakhwo emikaati nokwomwesaalisi okuhan'ne khu Nyasaye. 10Nebutswa omusango kwosi okwobuswache oburatekhelwe, kata nibutsokan'nemwo amafura nohomba obuswache obwomu, nobwabesaalisi bolwibulo lwa Haruni, ne okhwola bakabulane okhuhelana.
Omusango kwobuhambani
11Kano niko amalako akarumikhanga khulwokhuhaana omusango kwobuhambani khu MWAMI. 12Omundu niyakhahaana omusango yiku singa omusango kwokhukhupila Nyasaye embwo, ahaane esihanwa siomukaati okuralimwo amamela halala nomusango kwomuruko; kunyala okhuba omuhayila omusiro okutekhelwe khubusie obutsokan'nemwo amafura komuseituni nohomba ebibisikuti ebibakhilwekhwo amafura komuseituni nohomba ekeki elombelwe khubusie obutsokan'nemwo amafura komuseituni. 13Okhumeetakhwo, ahaane emihayila chiemikaati etsiratekheywemwo amamela. 14Alahaana esitonye silala khu buli mukaati singa esihanwa esichomekhe khu MWAMI; esihanwa yisio nesiomwesaalisi obukulanga amatsahi komuruko yikwo nakasundula khulusambwa. 15Inyama yomuruko okhwola eliibwe litukhu eliehan'nwe singa omusango; erakhasikalakhwo okhwola litukhu lilondakhwo tawe.
16Omundu niyakhaleera omusango kwobuhambani khulwo okhuhesia esiesuho nohomba esihanwa esiomwene alaliye okhuhaana, inyama yomusango yikwo eliibwe litukhu eliehan'nwe singa omusango, nebutswa eyakhaba nesikaye enyala okhuliibwa litukhu lilondakhwo. 17Inyama yosi eyakhasikala litukhu liakhataru okhwola esambwe. 18Inyama iyo niyakhalibwakhwo litukhu liakhataru, Nyasaye siyakhahuchil'la omusango kwomundu uyo tawe. Omusango yikwo sikwakhabalwa omulahi khuye tawe, nebutswa kwakhabukulwa okhuba okwomusilo ne uyo wosi owakhakulia alaba nesikha khandi alahebwa esinyasio. 19Inyama iyo niyakhetiilakhwo khusindu siosi esiomusilo, erakhalibwakhwo tawe nebutswa esambwe.
Omundu omusiiyikhu anyala okhulia khuinyama iyo, 20nebutswa uyo orali omusiiyikhu naliakhwo siyakhabalwa okhuba mulala khubandu ba Nyasaye tawe. 21Khandi omundu wosi niyakhaliakhwo inyama yomusango yiku namal'le okhutiila khusindu siomusilo kata nikakhaba nomundu nohomba omuruko, siyakhabalwa okhuba mulala khubandu ba Nyasaye tawe.
Esinya nende amatsahi birakhalibwa tawe
22OMWAMI yahaana amalako kano khu Musa 23khulwo okhurumikhilwa nende Abaisiraeli. Esinya yeing'ombe nende esinya yelikondi nohomba esinya yeimbusi erakhalibwakhwo tawe. 24Esinya yomuruko okufiye okwene, nohomba eyomuruko okwir'rwe nende esolo, erakhalibwakhwo tawe, nebutswa enyala okhurumikhilwa munjila yindi yosi. 25Omundu wosi owakhaliakhwo esinya yomuruko okwokhuhanwa singa omusango kwebiokhulia khu MWAMI siyakhabalwakhwo khandi singa mulala khubandu ba Nyasaye tawe. 26Habundu hosi ho Muisiraeli aba namenyele arakhanywakhwo amatsahi kamanyonyi nohomba akemiruko singa esiokhulia tawe.#Okhuch. 9:4; Abal. 17:10-14; 19:26; Okhuka. 12:16,23; 15:23 27Omundu wosi owakhafunaka lilako yili salabalwakhwo khandi singa mulala khubandu ba Nyasaye tawe.
28OMWAMI yahaana amalako kano khu Musa 29khulwo okhurumikhilwa nende Abaisiraeli. Omundu wosi niyakhahaana omusango kwobuhambani okhwola aleer're OMWAMI esitonye okhurula khukwo singa esihanwa esichomekhe, 30asileere nasichinjile mumakhono kaake singa omusango kwebiokhulia. Yetsa okhuleera esinya yomuruko halala nende inyama yokhusilifu ma achihaane singa esihanwa esichomekhe khu MWAMI. 31Omwesaalisi yetsa okhusambila esinya khulusambwa, nebutswa inyama yokhusilifu neyabesaalisi. 32Esilenje sieinyuma es'saatsa esiomuruko nesihanwa esichomekhe 33khumwesaalisi ohaananga amatsahi nende esinya yomusango kwobuhambani. 34Inyama yokhusilifu eyomuruko nesihanwa esichomekhe, ne esilenje sieinyuma es'saatsa nomurungo omuchomekhe okwo MWAMI abukuye okhurula khubandu ba Isiraeli khulwo okhuhelesia abesaalisi. Sino nisio esia Baisiraeli bakwana okhuhelesia abesaalisi amatukhu kosi aketsanga. 35Yisi nisio esitonye silala khubiokhulia esiahanwa khu MWAMI esia Haruni nende abasiani baabe bahebwa khwitukhu eliabemekhelwakhwo okhuba abesaalisi. 36Litukhu yilio OMWAMI yalaka Abaisiraeli okhuhaana esitonye siesihanwa yisi khu Haruni nende abasiani baabe. Yili nelilako elia Baisiraeli bakwana okhulilonda mumatukhu kosi aketsanga.
37Kano niko amalako kokhulonda khukemisango chiokhusambwa, emisango tsiobuswache, emisango tsietsimbi, emisango chiokhuhaana omurungo kwebirarungwa, emisango chiokhwemekhwa nende emisango chiobuhambani. 38OMWAMI yahaana amalako kano khu Musa nali khusikulu sia Sinai, litukhu elia yabool'la Abaisiraeli okhuhaana emisango khu MWAMI nibali musitsiimi.
Currently Selected:
ABALAWI 7: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
