ABALAWI 4
4
Emisango chietsimbi tsiokhwitsukhan'na
1OMWAMI yalaka Musa 2abool'le abandu ba Isiraeli mbu omundu wosi owakhakhola tsimbi nende okhufunaka elala khumalako ko MWAMI sila okhumanyilisia, akhoya okhulonda amalako kano.
3Nikakhaba Omwesaalisi Omukhongo niye okhol'le tsimbi ma aleere esikha khubandu, okhwola ahaane esimoosi esichulukhi esiralikhwo nobulema bwosi, ma asihaane khu MWAMI singa omusango khulwe tsimbi tsitsie. 4Aleere echulukhi y'yo habwinjil'lo bwe Liheema liokhubaho khwo MWAMI, are omukhonokwe omusaatsa khumurwe kwayo ma achiir're habwene yaho. 5Ma Omwesaalisi Omukhongo uyo abukulekhwo amatsahi kechulukhi y'yo ma yenjile n'nako Mwiheema. 6Yeene esitere sisie mumatsahi ma akanyul'lusie imbeli wepasia inzienukhu hali khane nakhataru. 7Ma abakhe amatsahi kandi khutsinzika tsiomutsikona tsiolusambwa lwokhusambilakhwo obwali Mwiheema. Alasundula amatsahi kandi kosi hasi holusambwa lwokhusambilakhwo emisango oluli habwinjil'lo bwe Liheema. 8Ahiinie esinya yosi okhurula muchulukhi y'yo, esinya eli khubiomunda, 9etsisiko tsibili nende esinya yatsio nende aheingurumani eli indahi okhusila. 10Omwesaalisi alabukula esinya y'yo ma achisambile khulusambwa lwokhusambilakhwo emisango, singa obwa asambanga esinya yemiruko etsiirwanga khulwo omusango kwobuhambani. 11Nebutswa alabukula liseelo liayo, inyama yayo yosi, omurwe kwayo, ebilenje biayo, nende ebiomunda biayo biosi halala nende amala kayo, 12ma abihinie esioba wekambi, abihile habundu hatsienulwa khulwo mulukha yikwo, ahelikokhe lisundulwanga, ne habwene yaho alachisambilaho khumul'lo kwetsikhwi.
13Nikakhaba mbu abandu ba Isiraeli bosi nibo abakhol'le tsimbi ma baabe nesikha siokhufunaka elala khumalako ko MWAMI sila okhumanyilisia, 14kho olwetsimbi yitsio tsimanyikhanga, abandu ba Isiraeli baleere esimoosi esichulukhi singa omusango kwetsimbi tsiabwe. Basileere Mwiheema; 15abemeli babandu balara amakhono kabwe khumurwe kwayo, nayo eler'rwa habwene yaho. 16Omwesaalisi Omukhongo alabukulakhwo amatsahi malala kechulukhi akahile Mwiheema, 17yene esitere sisie mumatsahi ma akanyul'lusie imbeli wetsipasia hali khane nakhataru. 18Alabakha amatsahi kandi khutsinzika tsiomutsikona tsiolusambwa lwokhusambilakhwo obwali mukari mwe Liheema, ma amatsahi kandi kosi asundule hasi holusambwa lwokhusambilakhwo emisango oluli mubwinjil'lo bwe Liheema. 19Ma abukule esinya yayo yosi ma chisambile khulusambwa. 20Alakhola amatelwa khuchulukhi y'yi singa obwa akholanga khuchulukhi ehanwanga khulwomusango kwetsimbi, ne munjila yiyi alahaana omusango khulwe tsimbi tsiabandu, nabo balalekhelwa. 21Ma ebitonye bindi ebisikalanga bihiinibwe esioba wekambi ma Omwesaalisi abisambe singa obwa asambanga omusango okuhanwanga khulwe tsimbi tsitsie omwene. Yiku nomusango kwokhuhiinia tsimbi tsiabandu.
22Nikakhaba omuruchi niye okhol'le tsimbi ma abe nesikha siokhufunaka elala khumalako ko MWAMI sila okhumanyilisia, 23kho olwetsimbi yitsio tsimanyikhanga khuye okhwola aleere omusango kweimbusi ekhole erali nobulema bwosi. 24Are omukhonokwe omusaatsa khumurwe kwayo ma achiir're khulubeka lwolusambwa ahemiruko chiemisango emisambe chiir'rwanga. Yiku nomusango okwokhuhinia tsimbi. 25Omwesaalisi yene esitere sisie mumatsahi komuruko yikwo, akabakhe khutsinzika tsine etsiomutsikona tsiolusambwa, ma asundule akandi kosi hasi holusambwa lwokhusambilakhwo emisango. 26Ma alasambila esinya yayo khulusambwa, singa obwa asambanga omuruko okwir're khulwo omusango kwobuhambani. Munjila y'yi, omwesaalisi alahaana omusango khulwe tsimbi tsiomuruchi, ne omuruchi alalekhelwa.
27Nikakhaba nimulala khubandu bandi bosi owakhakhola tsimbi ma abe nesikha siokhufunaka elala khumalako ko MWAMI sila okhumanyilisia,#Obub. 15:27-28 28kho olwetsimbi yitsio tsimanyikhanga khuye, aleere imbusi esibini erali nobulema bwosi ebe singa omusango kukwe. 29Are omukhonokwe omusaatsa khumurwe kweimbusi tsana ma atsir're khulubeka lwolusambwa ahe emiruko chiemisango emisambe chir'rwanga. 30Omwesaalisi yene esitere sisie mumatsahi komuruko yikwo, akabakhe khutsinzika tsiomutsikona tsiolusambwa, ma asundule akandi kosi hasi wolusambwa lwokhusambilakhwo emisango. 31Ma ahiinie esinya yosi eyomuruko yikwo, singa esinya ehinibwanga okhurula mumuruko okwir'rwe khulwo omusango kwobuhambani, ne alakusambila khulusambwa kho kachile okhuhunya khwakwo khuyanzisie OMWAMI. Munjila yiyi omwesaalisi alahaana omusango khulwe tsimbi tsiomundu, naye alalekhelwa.
32Omundu niyakhaleera likondi singa omusango kwetsimbi okhwola libe likhasi eliralikhwo nobulema bwosi. 33Are omukhono kukwe omusaatsa khumurwe kwalio ma aliir're khulubeka lwolusambwa ahemiruko chiemisango chiokhusambwa chiir'rwanga. 34Omwesaalisi yene esitere sisie mumatsahi komuruko ma abakhe khutsinzika tsine tsiomutsikona tsiolusambwa ma asundule akandi kosi hasi wolusambwa lwokhusambilakhwo emisango. 35Ma ahiinie esinya yosi eyomuruko yikwo, singa esinya ehinibwanga okhurula mwikondi eliirwanga khulwe emisango chiobuhambani, ne alachisambila khulusambwa halala nebiokhulia ebihanwanga khu MWAMI. Munjila yiyi omwesaalisi alahaana omusango khulwe tsimbi tsiomundu uyo, naye alalekhelwa.
Currently Selected:
ABALAWI 4: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
