ABALAWI 21
21
Abesaalisi okhwola babe abatsienukhu
1OMWAMI yalaka Musa abool'le abesaalisi mbu, “Omwesaalisi wosi arekhola owomusilo khulwokhutsia mumasika olwomwikhowe aba nafwiye tawe, 2fwana abe nali nyina, samwana, omwanawe omusiani nohomba omukhaana, amwabowe, 3nohomba mbotso nyene osili okhuteesibwa ma omenyanga n'naye munyumba ndala. 4Arekhola owomusilo khulwa amasika keyabo abali abekhobe khulwomukhasiwe tawe.
5“Omwesaalisi wosi areebeka olwale, nohomba okhubeka tsindefu nohomba kata okhwesalaka khumubili kukwe okhumanyia mbu ali musibeela siokhufwilwa tawe.#Abal. 19:27-28; Okhuka. 14:1 6Okhwola abe omutsienukhu khandi araleera es'simba murwe khuliira lianje tawe. Ye ahaananga emisango chiebiokhulia khu ise kho okhwola abe omutsienukhu. 7Omwesaalisi arateesiakhwo omukhasi owalinji omusambale nohomba orali omuchima nohomba kata owakhungwa khumusaatsa tawe; ye nomutsienukhu. 8Okhwola abandu babale omwesaalisi okhuba omutsienukhu sichila ahaananga emisango chiebiokhulia khu ise. Ise nise OMWAMI; ndi omutsienukhu khandi nzienulanga abandu banje. 9Omukhaana womwesaalisi niyakhakwa omusambale, aleeranga es'simba murwe khusamwana, okhwola asambwe m'mul'lo ma yerwe.
10“Omwesaalisi Omukhongo watsukhilil'lwa khumurwekwe amafura kokhutsienulwa khandi owatsienulwa okhwebiikha tsingubo tsiobwesaalisi, kho aralekha liswi lilie limanyukhe sila okhulichanula nohomba okhurandula tsingubo tsitsie okhumanyia mbu ali musibeela siokhufwilwa tawe. 11Arenjilakhwo ahomufu ali tawe, kata arekholakhwo owomusilo khulwo okhufwa khwasamwana nohomba nyina tawe. 12Kata ararulakhwo mwiheema lio MWAMI litsienukhu tawe, sichila wamala okhutsienulwa khulwokhubakhwa amafura ko MWAMI. Ise nise OMWAMI. 13Alateesia butswa omukhaana osili omuchima, 14tawe omukhasi omulekhwa nohomba owakhungwa khumusaatsa nohomba kata owalinji omusambale. Ateesie butswa omukhaana omuchima owomulwibulo lwabwe. 15Nikarali mbwo, abaanabe, abakwananga okhuba abatsienukhu balaba abomusilo. Ise nise OMWAMI ne mal'le okhumutsienula abe Omwesaalisi Omukhongo.”
16OMWAMI yalaka Musa 17abool'le Haruni mbu, “Omundu wosi khubolwibulo lulwo owalema aramban'nakhwo omusango kwebiokhulia tawe. Yaka kalondwe mumatukhu kosi aketsanga. 18Omundu wosi olikhwo nobulema bwosi arahanakhwo omusango singa omwesaalisi tawe, mbu: omundu wosi omubofu, omutiecheli, owabetekha nohomba owasiama, 19omundu wosi owakhalikha omukhono nohomba esilenje; 20owesikufu nohomba owakhuunya; wosi owalwala tsimoni nohomba owobuchele, kata owalatwa wosi. 21Omundu wosi mubolwibulolwomwesaalisi Haruni olikhwo nobulema bwosi khumubilikwe aramban'na omusango kwebiokhulia tawe. 22Omundu singa uyo anyala okhulia ebiokhulia ebihan'nwe singa esihanwa, mbu ebiokhulia biomusango omutsienukhu nende okuli omutsienukhu okhusila khubio, 23nebutswa khusifune mbu ali nobulema mumubili kukwe, arakhesundakhwo ahembi khupasia inzienukhu nohomba okhutsia ahembi khulusambwa tawe. Arakhaleera esibi khubindu ebitsienukhu yibi tawe, sichila ise nise OMWAMI ne khandi nise obatsienulanga.”
24Kho yaka niko aka Musa yabool'la Haruni, abasiani ba Haruni nende abandu ba Isiraeli bosi.
Currently Selected:
ABALAWI 21: EBAIBO
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
