ABALAWI 18

Obuheyi bwomusilo

1OMWAMI yabool'la Musa 2mbu abool'le abandu ba Isiraeli kano, “Ise nise OMWAMI Nyasaye wenywe. 3Muralonda tsifwo tsiabandu be Misiri aha mwamenyanga khale tawe; kata muralondakhwo tsifwo tsiesibala sia Kanaani, esia namwinjisiemwo tawe. 4Mulonde amalako kanje nimukhola aka namulake. Ise ndi OMWAMI Nyasaye wenywe. 5Mulonde tsifwo nende amalako aka muhetsanga; mulahonia obulamu bwenywe nimwakhakhola mbwo. Ise nise OMWAMI.”#Neh. 9:29; Esek. 18:9; 20:11-13; Lk. 10:28; Rom. 10:5; Gal. 3:12

6OMWAMI yahaana amalako kano naboola mbu: Murakholakhwo obuheyi nende abekho benywe tawe. 7Orasimbia papa uwo omurwe khulwo okhuheya nende mamawo tawe. Orafwabia mama uwo tawe. 8Orasimbia papawo omurwe khulwo okhuheya nabakhasibe bandi tawe.#Abal. 20:11; Okhuka. 22:30; 27:20 9Oraheya nambotsowo kata nomukhaana wamama uwo undi tawe, kata abe niyakhusibubwa munzu yindi nohomba munzu yenywe.#Abal. 20:17; Okhuka. 27:22 10Oraheya nomwitsukhuluwo omukhaana tawe; yako nakes'simba murwe khuibe omwene. 11Oraheya nende omukhaana wenywe owebulwa mumama uwo undi tawe, sichila nimbotsowo. 12Oraheya nende omukhaana wanga Papawo tawe sichila ninyakhusenjewo.#Abal. 20:19-20 13Oraheya nomukhaana wanga mamawo tawe sichila nimamawo. 14Oraheya nomukhasi wamwabo papawo tawe, ye nimama uwo. 15Oraheya nomukhasi womusianiwo#Abal. 20:12 16kata namulamuwo tawe.#Abal. 20:21 17Oraheya nomukhasi khandi oheye nomukhaana uwe tawe, kata oraheya nomwitsukhulu uwe tawe. Haundi bakhaba amatsahi kaako ma khulwako kabe olubo khuibe.#Abal. 20:14; Okhuka. 27:23 18Oratesia omukhaana wanga omukhasiwo olwomukhasi uwo asili mwoyo tawe.

19Oraheya nende omukhasi olwa ahengele ebukwe tawe, sichila ali m'musilo.#Abal. 20:18 20Oraheya nomukhasi womundu undi tawe; yako kalakhukhola owomusilo.#Abal. 20:10 21Orahaanakhwo mulala khubaana baabo okhukholwa omusango khumunyasaye olangwanga Moleki tawe, sichila yako nakaleere es'simba murwe khuliira lio MWAMI Nyasayewo.#Abal. 20:1-5 22Omusaatsa araheya nomusaatsa wasie tawe; yako nakes'sinyo khu Nyasaye.#Abal. 20:13 23Omusaatsa kata omukhasi baraheyakhwo nomuruko kata esolo tawe; obusiamu yibwo bumukholanga owomusilo.#Okhur. 22:19; Abal. 20:15-16; Okhuka. 27:21

24Murakhabakhwo nomusilo khulwo okhukhola ling'ana liosi khuyaka tawe, okhuba nimbwo abarasubilanga Nyasaye bekhola abomusilo, abandu yabo abamenyanga musibala yisi inywe nimusili okhwinjilamwo, abo MWAMI akhunganga okhurulamwo kho nenywe mwinjile mwo. 25Ebikhole biabwe bialeera omusilo khusibala, ma khulwako OMWAMI ahaananga esinyasio khusibala nasikhola okhusuula abandu abalinji okhumenya musio. 26Inywe mwesi Abaisiraeli nohomba abacheni abamenyibwa mwinywe, okhwola mulonde amalako ko MWAMI nimukhola aka amulakanga. 27Abandu yabo bakhola ebindu bies'sinyo yibi biosi ma nibaleera omusilo khusibala siabwe, nebutswa inywe murabikholakhwo tawe. 28Nilwo olwe esibala silabula okhumusuula singa obwa siasuula abandu abarasubilanga mu Nyasaye abalinji nibamenyamwo khale. 29Mwitsul'le mbu omundu wosi owakhakholakhwo ebindu bies'sinyo yibi salabalwakhwo singa mulala khubandu ba Nyasaye tawe.

30Ma OMWAMI naboola mbu, “Mulonde amalako akamuhetsanga ne muralonda tsifwo tsiabandu abamenyanga musibala yisi nimusili okhwinjilamwo tawe, khandi murekhola abomusilo khulwo okhukholakhwo elala khubindu yibi tawe. Ise nise OMWAMI Nyasaye wenywe.”

Currently Selected:

ABALAWI 18: EBAIBO

Highlight

Copy

Compare