ABALAWI 13

Amalako khukobulwaye bwekhwikhoba

1OMWAMI yahelesia Musa nende Haruni amalako kano. 2Omundu wosi oli nes'simbila siosi khwikhoba nohomba likhwaku nohomba libondo eliakhakwa obuchele okhwola omundu uyo ahilwe khumwesaalisi Haruni nohomba mulala khubesaalisi. 3Omwesaalisi yetsa okhuhenjelesia likhwaku yilio ne nanyoola mbu amaswa akali mwibondo yilio kakalukhan'ne okhuba amalafu khandi likhwaku yilio lifwananga elili nobuko oburambi m'mubili, khe yibwo nobulwaye bwobuchele. Kho omwesaalisi yetsa okhuribula habulafu mbu omundu uyo nowomusilo. 4Nebutswa libondo yilio ndiakhaba lilabil'lu ma ndilolekhanga singa elirayaba obuko m'mubili, khandi amaswa mulio sikakalukhan'ne okhuba amalafu tawe, omwesaalisi yetsa okhura omundu uyo sibeka okhurula khubandi khulwa amatukhu kane nakataru. 5Omwesaalisi yetsa okhumuhenjelesia khandi khwitukhu liakhane nakhataru ne mukhuhenga khukhwe niyakhalola mbu libondo yilio lisili butswa singa yali okhulilola, khandi silimetekhele okhukaliya tawe, omwesaalisi uyo yetsa okhura omundu uyo sibeka khandi khulwa amatukhu kandi kane nakataru. 6Amatukhu kane nakataru nikahweye, omwesaalisi yetsa okhuhenjelesia omundu uyo olwakhataru, ne libondo yilio niliakhaba nilinial'le ma akandi sikametekhelekhwo tawe, omwesaalisi anyala okhuribula habulafu mbu omundu uyo nomusiiyikhu; lino nelibondo butswa. Omundu uyo yetsa okhusaaba tsingubo ma abe wakhamala omulukha kwokhusiiywa. 7Nebutswa amakhwaku yako nikameetekha okhuyomba olwo omwesaalisi yali okhukahenjelesia ma naboola mbu omundu uyo nomusiiyikhu, okhwola omundu uyo ahenjelesibwe khandi nende omwesaalisi. 8Omwesaalisi yetsa okhumuhenjelesia khandi ne nikali amakhwaku yako kameetekhele, omwesaalisi yetsa okhuribula mbu omundu uyo siali omusiiyikhu tawe; ali nobulwaye bwobuchele.

9Omundu wosi naba nali nobuchele, okhwola aleerwe khumwesaalisi, 10khulwo okhubuhenjelesia. Nikali amabondo tsana namalabil'lu ma amaswa akali mumabondo yako kakalukhan'ne okhuba amalafu khandi amakhwaku tsana nikalimwo amafila, 11kho yibwo nobulwaye obukhulu khumubilikwe. Omwesaalisi yetsa okhuribula mbu omundu uyu nowomusilo, esifune sibulaho esichila omundu uyu areebwe sibeka yenyene sichila umanyikhile mbu nowomusilo. 12Obulwaye bwamabondo yibwo nibwakhalia omundu okhurula khumurwe okhwola khubilenje, 13omwesaalisi yetsa okhumuhenjelesia khandi. Niyakhanyoola mbu obulwaye yibwo bwalia omundu uyo omubili kwosi, omwesaalisi yetsa okhuribula mbu omundu uyo nomusiiyikhu. Likhoba liomubili kukwe niliakalukhana okhuba lilafu liosi, omundu uyo nomusiiyikhu. 14Ne lwosi olwe libondo linyalukhanga, omundu uyo kho nowomusilo. 15Omwesaalisi yetsa okhumuhenjelesia khandi, ne nalola libondo ndinyalukhile, yetsa okhuribula habulafu mbu omundu uyo nowomusilo. Libondo elinyalukhile limanyianga nobulwaye bwobuchele, kho oli n'nabwo nowomusilo. 16Nebutswa libondo yilio niliakhahona ma likalukhane okhuba lilafu khandi, omundu uyo okhwola atsie khumwesaalisi, 17naye omwesaalisi yetsa okhumuhenjelesia khandi. Nanyoola libondo nilikalukhan'ne okhuba lilafu, omundu uyo nomusiiyikhu, kho omwesaalisi yetsa okhuribula habulafu mbu nomusiiyikhu.

18Omundu wosi nali nelisunguri elimal'le okhuhona 19nikali olunyuma esindu sisimbeho esilafu nohomba es'simbile sibe esitsokan'nemwo obwakhanyu nende obulafu, okhwola omundu uyo atsie khumwesaalisi. 20Omwesaalisi yetsa okhumuhenjelesia, ne habundu tsana nihakhalolekha okhuba obuko ne amaswa akali habundu hene yaho nikakalukhan'ne okhuba amalabil'lu, omwesaalisi yetsa okhuribula habulafu mbu omundu uyo nowomusilo. Nobulwaye obubi obwekhwikhoba obuchiakiye mwisunguri. 21Nebutswa omwesaalisi niyakhumuhenjelesia ma anyoole mbu amaswa akali mwisunguri sikakalukhan'ne okhuba amalafu tawe, khandi lisunguri tsana siliyabile obuko tawe nebutswa likondo lialio nilirali elimwamil'lu tawe, omwesaalisi yetsa okhumura sibeka khulwa amatukhu kane nakataru. 22Ne amasunguri tsana nikakhameetekha kho omwesaalisi alaribula habulafu mbu omundu uyo nowomusilo. Yibwo nobulwaye bwokhuhambania. 23Nebutswa lisunguri yilio niliakhaba butswa habundu halala ne nilirameetekhakhwo tawe, kho iyo neimbala eyasikalaho olwa yalwala lisunguri, ne omwesaalisi yetsa okhuribula habulafu omundu uyo nomusiiyikhu.

24Ne niyakhabaho omundu owomul'lo kusambile, ne likondo eliahabundu ahayiye niliakhalabil'la nohomba niliakhabamwo obwakhanyu nende obulafu, 25omwesaalisi omuhenjelesie. Nikali amaswa habundu tsana kakalukhan'ne okhuba amalafu khandi hatsana halolekha okhuba nobuko oburambi okhuyomba likhoba lindi, kho yibwo nobulwaye bwobuchele obuchiakiye habundu homul'lo kusambile, ne omwesaalisi yetsa okhuribula habulafu mbu omundu uyo nowomusilo. 26Nebutswa nikakhaba amaswa akali habwene yaho sikakalukhan'ne okhuba amalafu tawe ma khandi hatsana salolekhanga okhuba nobuko oburambi tawe, nebutswa likondo liaho nilirali elimwamil'lu tawe, omwesaalisi yetsa okhumura sibeka khulwa amatukhu kane nakataru. 27Omwesaalisi yetsa okhumuhenjelesia khandi litukhu liakhane nakhataru, ne habundu yaho nihakhameetekha, kho yibwo nobulwaye obubi bwelikhoba, kho omwesaalisi yetsa okhuribula habulafu mbu omundu uyo nowomusilo. 28Nebutswa habundu tsana niharakhakalukhana tawe ma habule okhumeetekha ma khandi habule okhuba amamwamil'lu, kho sibuli obulwaye obubi obwelikhoba tawe. Omwesaalisi yetsa okhuribula habulafu mbu omundu uyo nomusiiyikhu sichila iyo ne imbala eyarulana khukhusambwa khwomul'lo.

29Omusaatsa nohomba omukhasi nali nelibondo khumurwe nohomba khusinwanwa, 30omwesaalisi asihenjelesie. Ndiakhalolekha niliayaba obuko m'mubili, khandi amaswa akalimwo nikakhafwana singa amayayi khandi nikakhaba amasalala, kho yibwo nobulwaye bwobuchele ne omwesaalisi yetsa okhuribula habulafu mbu omundu uyo nowomusilo. 31Nikakhaba mbu olwo omwesaalisi aba niyakhamuhenjelesia ma alole mbu libondo yilio siliayaba obuko mumubili tawe, nebutswa khusili nende amaswa kandi akali mwibondo yilio akaralolekhanga okhuba nobulamu, kho omwesaalisi yetsa okhumura sibeka khulwa amatukhu kane nakataru. 32Omwesaalisi yetsa okhuhenjelesia libondo yilio khandi litukhu liakhane nakhataru ne nanyoola mbu siliameetekhelekhwo tawe khandi sikalikhwomwo amaswa akafwana amayayi tawe, khandi sililolekhanga eliayaba obuko m'mubili tawe, 33omundu uyo yetsa okhubeka habundu helibondo lili. Omwesaalisi yetsa okhumura sibeka khulwa amatukhu kane nakataru. 34Litukhu liakhane nakhataru omwesaalisi yetsa okhuhenjelesia libondo yilio ne nikaba silimeetekhele tawe khandi silifwananga eliyabile obuko m'mubili tawe, omwesaalisi yetsa okhuribula habulafu mbu omundu uyo nomusiiyikhu. Omundu uyo yetsa okhusaaba tsingubo tsitsie ma abe omusiiyikhu. 35Nebutswa libondo yilio ndiakhameetekha inyuma womwesaalisi amal'le okhuribula mbu omundu uyo nomusiiyikhu, 36omwesaalisi yetsa okhumuhenjelesia khandi. Nikakhaba libondo yilio limeetekhele, sikamutakhanga okhukoola alole nikali amaswa mulio kafwana amayayi tawe, sichila omundu uyo ulolekhele habulafu mbu nowomusilo. 37Ne omwesaalisi niyakhalola khububwe mbu libondo yilio silimeetekhele tawe khandi amaswa amamwamu kakhulanga mwibondo yilio, kho libondo yilio limal'le okhuhona, ne omwesaalisi yetsa okhuribula habulafu mbu omundu uyo nomusiiyikhu.

38Omundu omusaatsa nohomba omukhasi naba nali nende habundu alabile khwikhoba liomubili kukwe, 39omwesaalisi yetsa okhumuhenjelesia. Ne habundu tsana, nihakhaba hamwamil'lu kho yisio nesikhomba butswa, ne omundu uyo nomusiiyikhu.

40Liswi liomundu musaatsa niliakhakhweyukha ma abe nesiole, alaba omusiiyikhu. 41Ne nikakhaba liswi lilie likhweyukhile khubweni bwomurwe ma abe nesiole, alaba omusiiyikhu. 42Nebutswa esipala nisiakhalolekha musiole esitsokan'ne obulafu nende obwakhanyu, kho yibwo nobulwaye obubi bwekhwikhoba. 43Omwesaalisi yetsa okhuhenjelesia omundu uyo ne libondo ndiakhabamwo elitsokan'ne obulafu nende obwakhanyu, 44omwesaalisi yetsa okhuribula habulafu mbu omundu uyo ali nobulwaye obubi bwekhwikhoba khumurwe kukwe.

45Omundu oli nobulwaye obubi bwekhwikhoba bwobuchele okhwola yebiikhe tsingubo tsiamatasi, alekhe liswi lilie oburachanula, khandi afuunikhe omukhono khumunwa kukwe ma alanjisie naboola mbu, “Ndi owomusilo, ndi owomusilo!” 46Amenyanga narali omusiiyikhu oluhono lwasili nobuchele yibwo, ne okhwola amenye esioba wekambi, ehale okhurula khubasie.

Amalako okhulondokhana nobukukhu khungubo

47Ingubo yosi neba niyakhakhupa olukukhu, ebe eyobwoya bwamakondi nohomba ingubo eyekatani, 48nohomba esitonye sieingubo yekatani nohomba esitonye sie ingubo yobwoya bwamakondi nohomba libe liseelo nohomba esindu siosi esialombwa khwiseelo, 49neba nelimwo erangi obukondo bwobulimo nohomba obwakhanyil'lu, yibwo nobukukhu obutsilitsanga ne okhwola bumanyibwe omwesaalisi. 50Omwesaalisi yetsa okhuchihenjelesia ma achire sibeka khulwa amatukhu kane nakataru. 51Yetsa okhuchihenjelesia khandi khwitukhu liakhane nakhataru, ne obukukhu nibusalan'ne khungubo yosi kho ingubo yiyo neyomusilo. 52Omwesaalisi yetsa okhusamba ingubo iyo, sichila nobukukhu obusalananga ne okhwola busambwe mumul'lo.

53Ne omwesaalisi naba nachihenjelesia ma anyoole siemetekhele okhulibwa nobukukhu tawe, 54kho alalaka mbu ingubo iyo esaabwe ma ebiikhwe sibeka khulwa amatukhu kandi kane nakataru. 55Kho omwesaalisi yetsa okhuchihenjelesia khandi, ne nanyoola obukukhu yibwo sibukalukhan'ne likondo tawe, kata nikaba nikali mbu sibumeet'te okhulia tawe, ingubo yiyo esili butswa eyomusilo; okhwola esambwe kata nikali obukukhu buli imbeli wayo nohomba inyuma wayo. 56Ne nikakhaba olwo omwesaalisi achihenjelesia khandi ma anyoole obukukhu yibwo nibukhamulukhile, kho yetsa okhurandula habundu bwene yaho okhurula khungubo nohomba okhurula khwiseelo. 57Ne olukukhu ndwakhalolekha khandi, kho kaboolanga lusalananga khungubo, kho mwene ingubo iyo okhwola achisambe. 58Ne nikali yakhasaaba habundu tsana ma esipala yisio sikore, asaabe habundu yaho khandi kho ingubo iyo yitsa khuba isiyikhu.

59Lino nilwo lilako elilondokhananga nende ingubo okhulibwa nobukukhu kata ebe eyobwoya bwamakondi nohomba ingubo yekatani, nohomba ingubo eyalombwa khubwoya nohomba khubuusi nohomba esindu siosi esialombwa khwiseelo; nimbwo obukhalachi bwako buli nikali neisiyikhu nohomba neyomusilo.

Currently Selected:

ABALAWI 13: EBAIBO

Highlight

Copy

Compare