ABALAWI 11

Tsinyama etsinyala okhulibwa

(Okhuka. 14:3-21)

1OMWAMI yahelesia Musa nende Haruni amalako kano 2khulwa Baisiraeli okhulonda. Munyala okhulia inyama yosi eyamenya khusibala esiomu 3eye tsimbakayu tsiabukhanamwo hali khabili khandi enyanyanga ekamula. 4-6Nebutswa muralia tsingamia, amachenieli nohomba ebipwoyo tawe. Tsinyama yitsi tsibalwanga okhuba etsiomusilo, sichila tsinyanyanga ekamula ne tsimbakayu tsiatsio sitsiayabukhanamwo khabili tawe. 7Muralia tsimbitsi tawe. Tsibalwanga okhuba etsiomusilo sichila tsimbakayu tsiatsio tsiayabukhanamwo khabili nebutswa sitsinyanyanga ekamula tawe. 8Murakhaliakhwo tsinyama yitsi tawe, kata okhutiila khumibili chiatsio nitsifwiye tawe sichila netsiomusilo.

9Munyala okhulia isutse yeimbila yosi elikhwo esibehe nende amakamba, 10nebutswa esindu siosi esimenyanga mumaatsi esiralikhwo esibehe nende amakamba sirakhalibwakhwo tawe. 11Tsinyama tsie imbila yiyi netsiomusilo. Muratsiliakhwo nohomba murakhatiila khumibili chiatsio nitsifiye tawe. 12Murakhaliakhwo esindu siosi esiamenya mumaatsi nisiralikhwo esibehe nende amakamba tawe.

13Murakhaliakhwo amanyonyi singa kano tawe: tsinditsu, amakhuule, 14amakhongotsa, tsikhwambu, 15etsipata, etsisori, 16amakhokho, amahuto, 17amanyonyi komumaatsi, etsikhonye, amahungu, 18amanabulobi, amanakha, 19amakuyi, ebichiechie nohomba amanyinya.

20Ebikooko biosi ebili netsimbaha nebiomusilo, 21nibirali yibio ebirumachilanga. 22Munyala okhulia tsisiche, obwonya nende amatete. 23Nebutswa ebikoko bindi ebitititi ebili netsimbaha khandi ebimoolanga nebiomusilo.

24Omundu wosi owakhatiila khumibili chietsinyama etsifwiye alaba mumusilo litukhu liosi okhwola mukolooba: 25omundu wosi owakhachinga emibili chietsinyama yitsio nitsifiye okhwola asaabe tsingubo tsitsie, nebutswa alaba owomusilo okhwola mukolooba kwelitukhu yilio. 26Tsinyama tsiosi etsie tsimbakayu, netsiomusilo, nitsirali yitsio etsietsimbakayu tsiabukhanamwo khabili khandi etsiliitsanga ekamula. Omundu wosi owakhatsitiilakhwo alaba mumusilo. 27Khandi tsinyama tsiosi etsiebilenje bine etsichendelanga amakhumbu netsiomusilo. 28Omundu wosi owakhatiila khumibili chietsinyama etsifwiye alaba mumusilo okhwola mukolooba.

29Tsino natsio khandi netsiomusilo khwinywe khu ebimoolanga: Tsifukho, amachungu, tsimbeba nende amasili amakali, 30amasiakali, amakhumbachila, tsinyambu, nende amabongobongo. 31Uyo wosi oba nabitilakhwo nohomba natiila khumibili chiabio nibifwiye okhwola abe owomusilo litukhu yilio okhwola mukolooba. 32Ne emibili chiebindu yibio nibifwiye nichietilakhwo khusindu siosi, esindu yisio siakhaba esiomusilo. Kano kali khubindu biosi singa olukhwi, ingubo, liseelo, nohomba likunia, kata libe ndirumikhilwanga okhuchinga esindu siosi. Okhwola liinwe mumaatsi ma libe eliomusilo litukhu yilio okhwola mukolooba. 33Ne emibili chiabio nichiakhakwa mundabu eyalongwa khwitohi, esindu siosi esili mundabu y'yo silaba esiomusilo ne okhwola warake indabu y'yo. 34Ne nikaba amaatsi okhurula mundabu yimwo kakhasundukha khusiokhulia esiabandu banyala okhulia, kho esiokhulia yisio siakhaba esiomusilo, ne esindu siosi esiakhanywebwa okhurula mundabu iyi nesiomusilo. 35Esindu siosi esiemibili chifiye yitsio tsiakhakwakhwo siakhaba esiomusilo, kata niliakhaba lichiiko nohomba amahika okhwola biarakwe, 36nebutswa esitaho nohomba liyabo elilimwo amaatsi lilaba butswa lisiyikhu nikarali esindu sindi siosi esiakhetila khumibili chiebifwiye silaba esiomusilo. 37Ne silala khubifwiye nisikwa khu imwo yokhuraakwa, imwo iyo esili butswa isiyikhu. 38Nebutswa nikali mbu imwo iyo yinikhilwe mumaatsi, ne silala khubifiye nisikwakhwo, imwo iyo neyomusilo.

39Omuruko kwosi okwokhulibwa nikwakhafwa, omundu wosi owakhatilakhwo yakhaba owomusilo litukhu yilio okhwola mukolooba. 40Ne omundu wosi niyakhaliakhwo esitonye siomuruko okufwiye okhwola asaabe tsingubo tsitsie, nebutswa alaba owomusilo litukhu yilio liosi okhwola mukolooba; omundu wosi owakhachinga omuruko okufwiye okhwola asaabe tsingubo tsitsie nebutswa abalwa okhuba owomusilo litukhu yilio okhwola mukolooba.

41Murakhaliakhwo esolo yosi indititi emoolanga hasi tawe, 42kata ebe nemoolanga nohomba nechendanga khubilenje bine nohomba neli nebilenje ebinji. 43Orekhola owomusilo okhulwo khulia silala khubiene yibi tawe. 44Ise ndi OMWAMI Nyasaye uwo, kho okhwola obe omutsienukhu sichila Ise omwene ndi omutsienukhu.#Abal. 19:2; 1 Pet. 1:16 45Ise nise OMWAMI owakhuhiinia Emisiri kho mbe onyala khuba Nyasaye wenywe. Okhwola mube abatsienukhu sichila Ise ndi omutsienukhu.

46Lino nilwo lilako elil'lomanga khuketsinyama, amanyonyi nende khusiesindu siosi esimenyanga mumaatsi khandi siesindu siosi esichendanga khusibala esiomu. 47Okhwola mube abanyala okhwabukhania hakari webindu ebisiyikhu nende ebiomusilo khandi mube abanyala okhwabukhania hakari wetsinyama etsinyala okhuliibwa nende tsinyama etsiranyala okhuliibwa tawe.

Currently Selected:

ABALAWI 11: EBAIBO

Highlight

Copy

Compare