OKHUCHIAKA 48
48
Yakobo yasabila Efuraimu nende Manase ikhabi
1Olunyumakhwo Yosefu yabool'lwa mbu samwana nomulwaye okhusila. Ma nabukula abaanabe babili, Manase nende Efuraimu, natsia okhulola Yakobo. 2Olwa Yakobo yabool'lwa mbu omusianiwe Yosefu witsile okhumulola, yetinyilisia ma niyekhala khusitandasie. 3Yakobo nabool'la Yosefu, “Nyasaye Wokhunyala Biosi yandolekhela nindi Lusu musibala sia Kanaani, ma niyanamila ikhabi.#Okhuch. 28:13-14 4Yambool'la mbu, ‘Ndakhakhuhe abaana ma olwibulo lulwo lwakhabe tsinzibulo tsinyinji, ndakhahaane liloba yili khutsinzibulo tsitsio libe eliabwe inziayo.’ ”
5Yakobo natsilil'la khuboola mbu, “Abaana baabo babili abawebul'la musibala sie Misiri ise nisili okhwitsa hano, nabaana banje, Efuraimu nende Manase nababe butswa abaana banje singa Rubeni nende Simioni. 6Nonyoola abaana bandi, sibakhaba abaana banje tawe, obulaame bwabakhanyoola bwakhabir're khu Efuraimu nende Manase. 7Kholanga yaka khulwa mamawo Raheli. Ndali nesibeela esikali olwa yafwila musibala sia Kanaani ahembi nende Efurate olwa ndali ningalukhanga okhurula Mesopotamia. Ndamuyabila khunjila ya Efurate.” (Efurate niyo elangungwa leelo Betselehemu).#Okhuch. 35:16-19
8Olwa Yakobo yalola abaana ba Yosefu, yareeba mbu, “Yaba nibena?”
9Yosefu nakalusia mbu, “Yaba nabaana banje aba Nyasaye yambelesia nindi Emisiri yino.”
Yakobo naboola mbu, “Baleere handi hano mbalamile ikhabi.” 10Tsimoni tsia Yakobo tsiali nitsielima khulwobusakhulu, ma siyali onyala okhulola bulahi tawe. Yosefu naleera abaana ahembi n'naye. Nabafumbeel'la ma nabatsunzuuna. 11Yakobo nabool'la Yosefu, “Sindakanakananga ndikhulolakhwo khandi tawe, ne luno Nyasaye uhuchiliye nduutsi abaanabo.” 12Ma Yosefu nabahiinia khumakulu ka Yakobo ma namwinamila khulwo khuhana oluyali.
13Yosefu nara Efuraimu khumukhono mukhasi kwa Yakobo ne nara Manase khumukhono musaatsa. 14Nebutswa Yakobo yabisaania amakhonoke nara omukhonokwe omusaatsa khumurwe kwa Efuraimu, owali omuti, ne nara omukhonokwe omukhasi khumurwe kwa Manase, owali omukhulundu. 15Ma nalaamila Yosefu ikhabi naboola,
“Nyasaye owabapapa banje Aburahamu nende Isaka barumikhilanga, ahelesie abaana yaba ikhabi.
Nyasaye owaninda okhwola litukhu lino abalaamile ikhabi.
16Om'malaika owaninda okhurula khububi bwosi abalaamile ikhabi.
Eliira lianje nende eliira liapapa Aburahamu nende elia Isaka katsiliil'le okhuhindihala okhubir'ra mubaana yaba.
Ma Olwibulo lwinjihe.”
17Yosefu siyalola bulahi olwa samwana yara omukhonokwe omusaatsa khumurwe kwa Efuraimu tawe. Yamala nabukula omukhono kwasamwana na kuhiinia khumurwe kwa Efuraimu nakura khumurwe kwa Manase. 18Nabool'la samwana mbu, “Mbwo tawe papa. Uno niye omwana mukhulundu ore omukhonokwo omusaatsa khumurwekwe.”
19Ne samwana nasuula naboola mbu, “Manyile, mwana wanje, manyile. Olwibulo lwa Manase lwakhabe olukali nalwo. Nebutswa omwana wabwe omutu yakhabe omukali okhuyomba, Khandi olwibulolwe lwakhabe tsinzibulo tsingali.”
20Ma nabalaamila ikhabi litukhu yilio naboola mbu, “Abaisiraeli balirumikhila amera kenywe Olwa balihaana ikhabi. Bakhaboole mbu, ‘Nyasaye akhukhole singa Efuraimu nende Manase!’ ” Kho Yakobo yemesia Efuraimu imbeli wa Manase.#Heb. 11:21
21Ma Yakobo nabool'la Yosefu mbu, “Singa ololanga, ise ndi ahembi okhufwa, nebutswa Nyasaye nabe n'nawe ma yakhakhukalusie musibala siabakukabo. 22Niwe owambetsanga esibala sia Shekemu, tawe abaana benywe. Esibala esilahi esiandanuula Abaamori nolukanga lwanje nende obuyingo bwanje.”
Currently Selected:
OKHUCHIAKA 48: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
