OKHUCHIAKA 42
42
Abaana banga Yosefu batsia Emisiri okhukula ebiakhulia
1Olwa Yakobo yahul'la mbu ebiakhulia bili Emisiri, yabool'la abasianibe mbu, “Muhengananga mbwena? 2Mbul'langa ebiakhulia bili Emisiri, tsieyo mukulekhwo, inzala elekhe okhwira.”#Ebikh. 7:12 3Ma abasiani banga Yosefu likhumi nibatsia okhukula ebiakhulia Emisiri, 4nebutswa Yakobo siyaruma omwana wanga Yosefu mwene owalangwa Benjameni tawe sichila yaria esindu siakhekhola khuye esibi.
5Abasiani ba Yakobo beetsa nende abandu bandi okhukula ebiakhulia, sichila inzala yali musibala sia Kanaani. 6Yosefu, nali singa Omukafuna wesibala sie Misiri, niye owakusinjia ebiakhulia khubandu okhurula mubibala biosi, ma abaana banga Yosefu nibeetsa nibamwinamila. 7Olwa Yosefu yalola abaana babwe, yabamanyiliisia, nebutswa nakoyokoyia singa orabamanyile. Nabareeba nobululu, “Inywe murul'le hena.”
Nabo nibakalusia mbu, “Khurul'le Kanaani, khwitsile okhukula ebiakhulia.”
8Kata olwa Yosefu yamanyilisia abaana babwe, bo sibamumanya tawe. 9Yetsul'la amalooro akayalooranga khubo ma nababool'la mbu, “Inywe muli abarunilisi. Mwitsile okhulola obutofu bwesibala siefwe.”#Okhuch. 37:5-10
10Nibamubool'la mbu, “Tawe, omwami, khwitsile singa abasumbabo, okhukula ebiakhulia. 11Ifwe fwesi khuli abaana bomundu mulala. Sikhuli abarunilisi tawe, khuli abandu batooto.”
12Yosefu nababool'la, “Tawe, inywe mwitsile okhulola obutofu bwesibala siefwe.”
13Nabo nibaboola, “Khwali abasiani likhumi nende babili abomundu mulala musibala sia Kanaani. Mulala wafwa ne omukhokosi yasikaye nende papa.”
14Yosefu nababool'la mbu, “Kali butswa singa mbooye. Inywe muli abarunilisi bamang'ana. 15Ne mwitsa okhumanyikha mbu: Ndesuhanga khuliira liomuruchi mbu simurula hano tawe okhwola olwo omwana wenywe omukhokosi nayetse hano. 16Mulala khu inywe okhwola atsie okhumwenda. Abandi betsa okhubohwa okhwola olwa amang'ana kenywe nakamanyikhe nikali akatooto. Nikarali mbwo tawe, singa obwa omuruchi ali mwoyo, inywe muli abarunilisi bamang'ana.” 17Ma nabara mububohe khulwa amatukhu kataru.
18Khwitukhu liakhataru Yosefu nababool'la, “Ise ndi omundu owaria Nyasaye, khe nzia okhumulekhela nimuba nimusubisia ling'ana elala. 19Okhumanyia mbu muli abatooto, mulala khu inywe asikale mububohe bwamwabeyenjemwo, ne abandi mutsie muhil'le abandu benywe ebiakhulia biamukul'le. 20Ma okhwola munder're omwana wenywe omukhokosi. Kano nakamanyie mbu muboolanga akatooto, ne sindakhamwiira tawe!”
Bahuchilisania khukene yaka, 21ma nibabool'lana abene khubene, “Tooto mwene khunyakhananga khulwa akakhwakhol'la omwana wefwe, khwalola amanyakhano kayalimwo olwa yakhusaaya khumukhonye, nebutswa sikhwahul'la tawe. Niko akachilanga nikhunyakhana.”
22Rubeni naboola mbu, “Ndamubool'la mulekhe okhusaalisia omwana uyo nenywe nimusuula okhuhul'la. Niko akachilanga nikhurungwa kano khulwokhufwakhwe.”#Okhuch. 37:21-22 23Yosefu yamanyilisia akababoolanga nabo sibamanya tawe sichila bal'lomanga khuye ne omundu nakalukhanichis'sia Yosefu. 24Yamala niyekwenya elubeka ma nachaaka okhulakaya. Olwa yakalukha, yabukula Simioni, nalaka abohwe imbeli wabwe.
Abaana banga Yosefu bakalukha Kanaani
25Yosefu nalaka mbu amakunia kabaana babwe ketsusibwemwo obuswache, ma amapesa kabuli mulala karebwe mwikunia lilie ma khandi bahebwe ebiakhulia biokhuliila khuluchendo. Ma nibakhol'lwa mbwo. 26Abasiani yabo nibara obuswache bwabwe khutsipunda ma nibarula. 27Habundu habahulukhila butukhu, mulala khubo nabohol'la likunia lilie mbu alisie epundaye ne nanyoola amapesa nikali mwikunia. 28Nabool'la abamwabo, “Amapesa kanje kakalusiibwe, kali mwikunia lianje yimu.” Bamala nibafwa emioyo okhusila nibareebana muburi, “Nyasaye akhukholeye sina sino?”
29Olwaboola khu Yakobo samwana mu Kanaani, bamubool'la kosi akali nikekhol'le khubo: 30“Omukafuna wesibala sie Misiri yal'lomele n'nefwe obululu ma naboola 31ifwe khuli abarunilisi bamang'ana musibalasie. Nikhumukalusia mbu, ‘Ifwe sikhuli abarunilisi tawe, khuli butswa abandu abalahi. 32Khwali abasiani likhumi nende babili, abaana bomundu mulala. Mulala wafwa, ne omukhokosi yasikaye Kanaani nende papa wefwe.’ 33Omundu tsana naye nakalusia, ‘Kano niko akanzia okhumanyilakhwo nimuli abandu abalahi: Mulala khu inywe okhwola asikale, ne abandi mubukule obuswache muhil'le abandu benywe abali mwinyakhana khulweinzala. 34Munder're omusiani wenywe omukhokosi. Nimukhola mbwo ne namanye simuli abarunilisi tawe, muli abandu abalahi, ne namukaluchis'sie omusiani wenywe, ma mumenye hano mukhole obukhala.’ ”
35Olwa batsukha obuswache bwabwe okhurula mumakunia buli mulala khubo yanyoola omurukokwe kwamapesa mwikunialie, ne olwa balola amapesa yako, bo nende samwana bamala nibaria okhusila.
36Samwana nababool'la mbu, “Mwenyanga ngosie abaana banje bosi? Yosefu watsia, Simioni utsiye, ne luno mwenyanga mubukule Benjameni. Ise nise omwene osal'langa!”
37Rubeni nabool'la samawna, “Nimbula okhukhukaluchis'sia Benjameni, nawiire abasiani banje babili. Omure mumakhono kanje, ne okhwola namukalusie.”
38Nebutswa Yakobo naboola mbu, “Omwana wanje satsiakhwo n'nenywe tawe, omusiani wabwe wafwa ma niye owasikala yenyene. Esindu sinyala okhwekhola khuye khunjila. Ise ndi omusakhulu, esibeela siakhanzira.”
Currently Selected:
OKHUCHIAKA 42: EBAIBO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
