OKHURULA 9

Okhufwa khwemiruko

1OMWAMI nabool'la Musa mbu, “Tsia khumuruchi ma omubool'le mbu OMWAMI, Nyasaye wa Baheburania aboolanga mbu, ‘Lakhuula abandu banje batsie okhundekayakaya. 2Noba nosuula khandi okhubalakhuula, 3nakhuhelesie esinyasio siokhuleera olufu olubi khumiruko chichio chiosi, khutsisululi, khutsipunda, khutsingamia, khutsing'ombe, khumakondi nende khutsimbusi. 4Nambiikhe olwakho hakari wemiruko chia Baisiraeli nende emiruko chia Bamisiri, ne kubulakhwoho omuruko kwosi okwa Baisiraeli kwakhafwa tawe. 5Ise, OMWAMI, mal'le okhurechekha litukhu liamukamba khulwo okhukhola akene yaka.’ ”

6Litukhu elialondakhwo OMWAMI yakhola singa obwa yali nabooye, ma emiruko chiosi chia Bamisiri nichifwa, nebutswa kubulakhwoho okwa Baisiraeli okwafwa. 7Omuruchi yareeba akali nikekholekhele ne nabool'lwa kubulakhwoho omuruko kwa Baisiraeli okufwiye. Nebutswa yatinyia omwoyokwe ma siyalakhuula Abaisiraeli okhutsia tawe.

Likhupako liamabondo

8Ma OMWAMI nabool'la Musa nende Haruni mbu, “Mufumbare likokhe okhurula mumayika; Musa aliohe khwikulu imbeli womuruchi. 9Lilasalaana singa olukuukhi olunyukhe khusibala siosi sie Misiri, ne siahabundu hosi nalisimbie amabondo khubandu nende khumiruko ma nakanyalukhe nikakwa amakhwaku.” 10Kho bafumbara likokhe ma nibasinjila imbeli womuruchi: Musa niyoha likokhe ikulu, nilisimbia amabondo khubandu nende khumiruko ma nikanyalukha nikakwa amakhwaku.#Okhub. 16:2 11Abafumu sibali abanyala okhwitsa imbeli wa Musa tawe sichila emibili chiabwe chiali nitsitsuyekhwo amabondo singa Abaamisiri bandi bosi. 12Nebutswa OMWAMI yatinyia omwoyo kwomuruchi, ne singa obwo MWAMI yali nabooye, omuruchi siyahul'la Musa nende Haruni tawe.

Likhupako liamachina Keifula

13Ma OMWAMI nabool'la Musa mbu, “Nibusieye mukamba tsuli nobukaane nende omuruchi ma nomubool'le mbu OMWAMI Nyasaye wa Baheburania aboolanga mbu, ‘Lakhuula abandu banje batsie okhundekayakaya. 14Luno sinzia okhuhaana esinyasio khubemelibo nende abandu baabo bonyene tawe, nebutswa nzia okhuhaana esinyasio khuibe khandi, kho omanye mbu saliho omundu undi wosi musibala siosi oli singa ise tawe. 15Ndaba nindamuheye esinyasio siolufu ibe halala nabandu baabo khane luno mwesi mwafwa. 16Nebutswa khulwa okhukhumanyia obunyali bwanje khulekhele obe mwoyo kho oluyali lwanje lube olunyala okhumanyikha musibala siosi.#Rom. 9:17 17Nebutswa osili nomwekhonyo ne osuulanga okhulakhuula abandu banje batsie. 18Esaa singa yino mukamba nangwisie ifula yolucheka netsokan'nemwo namachina, aka Bamisiri basili okhulolakhwo mumatukhu kabwe kosi. 19Luno haana lilako mbu emiruko chichio nende siesindu siosi esili esioba sirebwe munyumba. Ifula yamachina yitsa okhukwa khubandu nende emiruko echili esioba sila obwikamilo ne tsiosi tsilafwa.’ ” 20Abalala khubemeli bomuruchi bali noburi khuko MWAMI yali nabooye, ne baleera abasumba babwe nende emiruko chiabwe munyumba okhwikamamwo. 21Kata mbwo abandi sibabukulakhwo oluchendo mumang'ana ako MWAMI yali nabooye tawe. Balekha abasumba babwe nende emiruko esioba.

22Ma OMWAMI nabool'la Musa, “Chinga omukhonokwo mwikulu ne ifula yamachina yitsa okhukwa khusibala siosi sie Misiri; khubandu, khumiruko, nende khubiraakwa biosi ebili m'mikunda.” 23Kho Musa nachinga indabusi yiye mwikulu, ne OMWAMI naruma ikhupa nende ifula yamachina ne olweni nilwanukhu khwiloba. OMWAMI yaruma 24amachina keifula amasiro ne tsimbeni nitsianukhanga tsimbeka tsiosi. Yali ikhumaatsi ingali esili okhubakhwoho musibala sie Misiri mumatukhu kasio kosi.#Okhub. 8:7; 16:21 25Amachina keifula kakoka ebindu siahabundu hosi mu Misiri ebiali nibili esioba halala nende abandu bosi nende emiruko chiosi. Kakoka ebiraakwa biosi m'mikunda nikafunaka emisaala chiosi. 26Musibala sia Gosheni, aha Baisiraeli bamenyanga, nisio sionyene esiamachina karakwamwo tawe.

27Omuruchi yalanga Musa nende Haruni nababoola mbu, “Luno mal'le okhwona; OMWAMI ali mubwatooto, nase nabandu banje khukhol'le obubi. 28Musaaye khu MWAMI! Ikhupa nende amachina akakhukwiliye kakhuhel'le! Ndesuhanga mbu namulekhe mutsie; sinamumenye hano khandi tawe.”

29Musa nabool'la omuruchi mbu, “Olwa nzia okhuba nirul'le mwitookho, nzia okhuchinguula amakhono kanje okhusaaya OMWAMI. Ikhupa elalekha ne amachina keifula kalakhalisia kho omanye mbu esibala siosi nesia Nyasaye. 30Nebutswa manyile mbu ibe halala nabemelibo okhwola luno simuritsanga OMWAMI Nyasaye tawe.”

31Epamba yom'mukunda nende emimela chiobuswache biosi biakhuywa sichila obuswache bwali nibulabile ne epamba yali nehinisie esimuli. 32Nebutswa ingano yosi siyakhuyilwa hasi tawe sichila elabanga olunyuma.

33Musa yarula khumuruchi natsia esioba welitookho nachinga amakhono kaake ikulu nasaaya OMWAMI. Ikhupa, amachina keifula nende ifula biosi biakhalisia. 34Olwomuruchi yalola akali nikekholekhele, yamala nakhola obwoni khandi. Ye omwene nende abemeli baabe batsilil'la okhutinyia a emioyo chabwe, 35ne singa obwo MWAMI yali nabooye okhubir'ra mu Musa, omuruchi siyalakhuula Abaisiraeli okhutsia tawe.

Currently Selected:

OKHURULA 9: EBAIBO

Highlight

Copy