OKHURULA 24

Abandu bahuchil'la indakano ya Nyasaye n'nabo

1OMWAMI nabool'la Musa mbu, “Yanichila khusikulu witse ahandi ibe nende Haruni, na Nadabu, Abihu nende abemeli ba Isiraeli amakhumi kane nakataru; ne nimusili okhwola ahembi ahandi, mundekayakaye nimwinamile hasi. 2Ibe Musa wenyene witse ahembi ahandi ne abandi bosi kata mulala tawe. Abandu bandi sibakhoya okhwanichila khusikulu tawe.”

3Musa yatsia nabool'la abandu kosi ako MWAMI yali nalachile abandu bakhole; ne abandu bosi bakalusia mumwoyo mulala nibaboola mbu, “Khulakhola kosi ako MWAMI abooye.” 4Musa yahandika amalako ko MWAMI kosi. Mukamba tsuli litukhu elialondakhwo yombokha olusambwa ahembi nesikulu ma nasimikhaho amachina likhumi nakabili sielala khusiolwibulo khutsinzibulo tsia Baisiraeli likhumi na tsiibili. 5Ma naruma abasiani ababuukha, okhusamba emisango khu MWAMI ma nibalomba emisango chietsing'ombe singa emisango khu chiobuhambani. 6Musa yabukula enusu yamaatsi kemiruko yitsio ma nara mutsindaabo, ne enusu eyasikala nasundula khulusambwa. 7Ma nabukula esitapu sie Indakano omwa Amalako ko MWAMI kali nikahandichilwe, ma nakasoma imbeli wabandu nomwoyo omukali. Abandu nibaboola mbu, “Khwitsa okhuhulila OMWAMI ne khulakhola kosi aka akhulachile.”

8Ma Musa nabukula amaatsi akali mutsindaabo nakamiitsa khubandu. Naboola mbu, “Kano niko amatsahi kesiesuho sie Indakano eyo MWAMI yakhola n'nenywe olwa yahaana amalako kano.”#Mat. 26:28; Mk. 14:24; Lk. 22:20; 1 Kor. 11:25; Heb. 9:19-20; 10:29

9Musa, Haruni, Nadabu, Abihu nende abemeli ba Isiraeli amakhumi kane nakataru banichila khusikulu 10ma nibalola Nyasaye wa Baisiraeli. Isi webilenje bibie sialiho esindu esiafwana singa esafira kwamachina keerangi ya buluu efwana singa likulu. 11Nyasaye siyasaalisia abemeli babandu ba Isiraeli yaba tawe. Balola Nyasaye ma nibalia khandi nibanywa halala.

Musa naali khusikulu sia Sinai

12OMWAMI yabool'la Musa mbu, “Yanichila esikulu witse ahandi, ne olwoba noli hano, nzia okhukhuhelesia amachina kabili amapapale akahandikwakhwo amalako kosi akandahandika okhwibaal'la abandu.” 13Musa nende omulondel'liwe Yoshwa berechekha ma Musa nachaaka okhwanichila esikulu esitsienukhu. 14Musa nabool'la abemeli mbu, “Mukhulinde mukambi muno okhwola olwa nakhukalukhe. Haruni nende Huri bali halala n'nenywe hano; ne wosi owakhaba neling'ana liosi atsie khuye okhulikol'losia.”

15Musa yanichila khusikulu sia Sinai ma elilumbesi nilifuunikha esikulu yisio. 16Obulafu obumanyianga okhubaho khwo MWAMI, bwekha khusikulu. Lilumbesi liafuunikha esikulu khulwa amatukhu kasasaba, ne khwitukhu liakhane nakhataru OMWAMI yalanga Musa okhubir'ra mwilumbesi. 17Khu Baisiraeli obulafu yibwo bwafwana singa omul'lo okwatukhanga khubutenje bwesikulu. 18Musa yanichila okhutsia khusikulu mumalumbesi. Yamenya khusikulu amatukhu amakhumi kane om'basu nobutukhu.#Okhuka. 9:9

Currently Selected:

OKHURULA 24: EBAIBO

Highlight

Copy