ROMA 10
10
1Hem yabo nang o, nadya ganya era sikbabya blebsulul senewoka Imik Neyung ak heng uboka mololamna. 2Anasa nara siksamba laga an wenyalamnaʾ ara, sikda Imik Neyung amba hyak yeiriwoka welemak, bok dib nongnya elgomjok unulumak. 3Dara sikda Imik Neyung bedya peldisinaʾ ara pe ella unggulumeekanya, sikda peldisinaʾ anyek sikja yok memewanobaʾ ulumek adya, wera sikda Imik Neyung bedya peldisinaʾ ak ara ganya gologanggumek.
Ganya Aldib Senenaʾ Adyok Pellilesil Yuba
4Unuwanalum an yub pik peldisinaʾ damok elemekaʾ ara, Kristus yeilimok adya alak peldisinaʾ damok dok. Wera anedya nimi nidyaʾ ganya alak aldib senelemak nang era, peldisinaʾ en dolomak. 5#Im. 18:5Dara Musa bedya Yahudi nim emba unuwanalum an yub adya, peldisinaʾ ak geklewoka momnya dobokaʾ ara, ”Nim oruksin yub ak unulumnelanya bera, wera anedya alda embengaʾ ulumnamla,” wenyaboka momnya dobok. 6#Ul. 30:12-14Bok ganya aldib senenaʾ adya dara, an wenyalamla, ”Ugunja ganya lomok ara anaso wenyanaʾ mem: Heknyek Kristus doboka bo gouluganamla anasa, imik heik welewanamla do? 7Goma, heknyek Kristus ara somoknaʾ nang gangganek ab doboka bo welewanamlaʾ anasa, somoknaʾ gweren selengaʾ era gouluganamla do?” 8Bok alja dara, hekaʾ alamla do? Ara ban:
”Imik Neyung yub ara, ugunja si bamaʾ ak hnon, ugunja ganya ak hnon, hyak ok nong ulumla,”
alamla. Wera ban ganya aldib senenaʾ anyek, nunja lero yabalamab yub era an. 9Anasa ugunda ugunja si bamaʾ adya Yesus ara wenelesilnya bek ulumla aboka laga lelemunukanya, ugunja ganya ara alda Imik Neyung adya somoknaʾ nang gangganek ab seleb subuka embengaʾ bukiyiwok aboka dib senelemun dara, blebnesil. 10Dara nimi ganya anedya aldib senelemak dara, perobaʾ nenelesil. Anya sibamaʾ adya laga lelemak dara, bleblesil. 11#Yes. 28:16Anasa geisa Imik Neyung yuba momnya dobokaʾ ara an wenyalamla, ”Heknedya alak ganya aldib senewanamla dara, eimik alya dabnenggunumla,” alamla.
12Wera dara, Yahudi nim ab, Yunani nim eb dara, yok-yok gebeldan damok era hnon unggulumla. Anasa ban hnonok Imik Neyung enedyok nidyaʾ nim amba wenesinya ulumlakanya, alak bii alamak nim nidyaʾ ak perobaʾ nenelesil. 13#Yl. 2:32Anasa heknedya Wenelesilnya si sibuka youblenya bera, alak blebnamla.
14Bok sikda alak ganya aldib senenggulumak dara, sikda hekaʾ uboka alak bii heneseng do? Sikda al benyaʾ an yub enyek kenggulumak dara, sikda hekaʾ uboka alak ganya aldib senewanaseng do? Al samba yub enyek hnon nekel banggulumak dara, sikda hekaʾ uboka alsamba yub era kebneseng do? 15#Yes. 52:7Sikenek hnon yuba bo ban nang enyek orok dara, alsamba yub era hekaʾ uboka leb eleganaseng do? Wera anesemba leboka momnya dobokaʾ ara, ”Sikda perob lero yanggan yuba bo yalamak nang enyek yalamak dara, hyak perob nongja!” wenyaro momnya webok.
Israeli Nimi Ganya Aldib Senewanggubek Yuba
16 #
Yes. 53:1
Bok ban perob lero yanggan yub era nimi nidyaʾ ara seleb dobnenggurub. Anasa Yesaya bera alja anaso wenyalamok, ”Wenelesilimnya o, heknedya nunja an wenyalamab yub era ganya aldib senewanamla do?” 17Wera anasa, Kristus yuba kenaʾ adya, ganya aldib senenaʾ damok ara an kelemak pik lanalamla. 18#Mzm. 19:5Anasa nara ugunuk heibsunun: Wera sikda kenggulumek de? Sikda seleb kelemek bok,
”Sikja salamek anyek koblemok yub era mok soko nidyaʾ obdangoka, sikja salamek yub era mok soko dagalongnaʾ nidyaʾ ob lelemok.”
19 #
Ul. 32:21
Bok nara heibnesin: Dara Israeli nim era anyek lel yabel senewoka dobek de? Musa bera hyak men wenhyok,
”Nunja nim gom bok, ugunda siksamba leboka ganya angoo senewoka oka dusulul aboka, nadya ugunuk ganya en gebnamnakanya, ugunda yok elgom mok soko nim ek wablulumaʾ aboka, yu ganya nenewanasin,”
hyok. 20#Yes. 65:1Dara Yesaya bera asaʾ ganya boboka an wenhyok,
”Sikda nak enggulunyak nim enyek, nara or eibdanamab senewasa. Sikda nak heinggulunyek nim ek, nara seleb laga bo aamabdasa,”
wenyamok. 21#Yes. 65:2Bok Israeli nim emba dara alda wenhyok,
”Li sob-sobaʾ ara nak pe kenggulumaakanya, sondaʾ aboka orokaʾ geblemak mok soko nim ek, nara nadya soruk era bebegeldibilloklamna,”
hyok.
Currently Selected:
ROMA 10: LAINLC
Highlight
Copy
Compare
Share
Want to have your highlights saved across all your devices? Sign up or sign in
