PILIPI 3
3
Jong Unaʾ Yuba
1Nadyaʾ hemyab o, anya onoʾ ugunda Wenelesilnya beb seleb kwebdangoka ululumaʾ anyek bekoka ei-ei ganya bololulum. Ugunuk perob dangasin dambaʾ anyaʾ aboka, onoʾ youmaʾ hnon seleb momnya donaʾ pik uboka lebsisedyok, wen hnon sounuwoka lebsin.
2Nimi hnon malya unulumak nim enyek, sikja si nera bei gama silibaʾ alasak nim unaʾ enyek pe keebdaboka ulululum. Ban nim enedya dara, nimi nauba ara or bolaʾ garalesinok senelesak. 3Nera nuk danyek bolaʾ garanaʾ dibaʾ ara seleb domouba, sikenek dara orok. Nunda Imik Neyung giblemabaʾ ara, Imik Neyung Geisinya adya bo ulusilaʾ adya giblemab dara, onoʾ nunda Yesus Kristus ab seleb neikaʾ kwebdangoka ulumabaʾ adya perob aboka giblemab. Nunda sokok an seʾ nim adya ok ganya doboka unulumaknya nek ganya dib beiliwoka unggulumab. 4Nak dara anyek, anaso ganya dib beiliwoka ulumnesinya bok, yok nim era sokok seʾ nim adya memelemaknya nenyek ganya dib beiliwoka ulumnamso dara, wera nak hyak nauba so unuwanasinya. 5#Rm. 11:1; Kis. 23:6, 26:5Nara beibnyek salek era, lika linbadya sum mabsa dara, bolaʾ garawanyek. Nara Israeli nanga yokaʾ Benyamin nang yilaʾ ak ab beibnyek, anya Ibrani nanga yokaʾ nong ara na ulumna an. Yahudi nim emba unuwanalum an yub ak ganya olokna danasa dara, nak dara Parisi nang dangamsa. 6#Kis. 8:3, 22:4, 26:9-11Ban nenesa leboka, nauba yeirilamsakanya, Imik Neyung yuba donaʾ nimi nauba malya ura obsisa. Nak dara, unuwanalum an yuba donaʾ ak sam amba dara, nara hyak si gegena mekaʾ ponaʾ oroknya bek ulumsa.
7Bok ban nidyaʾ ara Kristus amba leboka, youmaʾ nak sam perob dangalenyoknya nera gwirib loboka, wenyek dara, nara banyek dolbalek senelamna. 8Dara ban nenyek ok gom, alda nadya nak malya dananel senelenanya neneba wera seleb unulunel. Wenyek danyek, nara hyak perobaʾ ak dobsa ara, Yesus Kristus, nadya Wenelenelnya bek hnonok dobsa. Nara Kristus amba leboka yokaʾ-yokaʾ nidyaʾ ara dolbalek senewoka seleb gobdo gwirib lobsa. Nara Kristus anyek dib dobnunaʾ aboka, yokaʾ-yokaʾ nidyaʾ ara sembejaʾ nenemsa ok. 9Anya aldib nara Kristus lomok ulunun senewoka unumsa. Nara Imik Neyung ak ganya kwebdonumaʾ ara, nadya ganya doboka nim adya unuwanalum an yub eboka dobnenggubsa. Wera nara Imik Neyung ab perobaʾ lebdangoka ulunamaʾ ara, nara Kristus ak dib senemsaʾ adya ulumna. Anasa ban unu Imik Neyung ab kwebdangoka jong ulumak unaʾ era, Yesus Kristus ak dib senelemakaʾ nong adya ok dangalamla.
10Nadya hnonok hyak perob unulusinya senelamnaʾ nong ara, Kristus ak okoka ella ulumnyekanya, alja somoknaʾ ak ab embengaʾ bukullilisil migib enyek, naba ella desinya senelamna. Nara Kristus ab neikaʾ hiboka alja igina kweboka, onoʾ alja somoknaʾ enyek naba neikaʾ somogoka, also donun senelamna. 11Nadya dara, nababya somoknaʾ ak ab embengaʾ suboka bukiyiwonulul senelamna.
Paulus Nauba Dulumok Yuba
12Nara seleb hyak pelemna, hnonda seleb perobaʾ ak ulumna senenggulumna. Alda Kristus Yesus beilesil deknaʾ enyek dobnun senewoka yeiriwoka dulumna. Ban nenesa alja unulululaʾ aboka, nak alja bleboka dobnyookanya, aljinya nenewanyok. 13Hemyabo nim o, hyak pe ululanya ulumso sok, nara seleb anaso ulumna senenggulumna. Bok alda nara hnonok unulamnaʾ nong ara, nidyaʾ yokaʾ-yokaʾ youmaʾanya nadyaʾ weilik sam ululanya nera hibigoka, eimik eini unuwanalanya nadyaʾ saramek sam ululanya nenyek dulumna. 14Ban nenesa leboka, nak men sidyaʾ eini ulumlaʾ anyek, yeiriwoka dobnun senewoka dulumna. Dara, Imik Neyung adya Yesus Kristus lomok pik uboka nuk youbsukaʾ ara, imik heikek weknokaʾ aboka youbsukaʾ anasa, nara eleganesin senelesilnya nenyek dobnunaʾ aboka dulumna.
15Nunda nidyaʾ Imik Neyung yuba domoubukanya, seleb ganya kalasil nim era, neik ganya enyek unu bobnemab. Bok ugun gangganek sam ara, nimi hnon yoko seinilemun dara, Imik Neyung adya ugunuk nek arawanasilaʾ. 16Ban nong ara, ugunda pe beknelum: Nunja unaʾ nong era, youmaʾ unu ulumnemab amoubaʾ wen ulumabnya nenyek sunuwoka onoʾ pe ulumnemab.
Yuba Donaʾ Nim Ek Wenewosuk Yuba
17 #
1Kor. 4:16, 11:1 Ugunda nadyaʾ hemyabo nim o! Ugunda nadya unulunanya nenyek dililenululum. Nunjaʾ perob unaʾ seleb elegesubaʾ anasa, nimi nidyaʾ nunjaʾ ununaʾ diliwoka unulumak nim enyek, ugunda pe kendululum. 18Nara sobaʾ hnon ugunuk wenyalasisedyok, onoʾ nimi nauba ara sikja nong unaʾ era, Kristus gal dubuk somogokaʾ ara salyaʾ senewoka malya nenelemak. Bok, wen hnon engelamnakanya, ugunuk onoʾ saawoka lebsin. 19Ban malya ulumak nim era, sikjaʾ ganya edya nunja nong emba pewosulul senen ganya boboka yeirilemakaʾ anasa, sik nong anaba malya uboka somoganamakaʾ ak ulumak. Sikda sokok an salyaʾ lelem perob dangalalanya nok senewoka seinilimak. Sikenek alya danasusonya nek perob senelemak.
20Bok nuk dara, imik heikek ab nim ek ulumab. Dara, al neik heikek ab nunjaʾ nimi blebsinaʾ dubnya Wenelesilnya Yesus Kristus ara eimik yanamla. Al nong anyek nunja dara, wera eibsibya senewoka diri ulumab. 21Nunjaʾ hmeng uboka songa leboka blolomla nong era, Kristus adya yoka nenewoka aljaʾ perob nong eneso nenewanasil. Ban alja unuwanasilnya nera, alda yokaʾ-yokaʾ ara unun danasa, migib adya unuwanesil.
Currently Selected:
PILIPI 3: LAINLC
Highlight
Copy
Compare
Share
Want to have your highlights saved across all your devices? Sign up or sign in
