KOLOSE 2
2
1Anasa nadya senelamna ara, har so duboka yeiriwoka ugunsamba welesin anyek, ugunda ella danasom. Anya, sik Laodikia sam ulumak nim ab, nidyaʾ na hogung eibnenggunyek nim eneba, anyek ella danok senelamna. 2Sikda nidyaʾ yok-yok pe ella ubnamaakanya dib mel-mel aboka dib senenaʾ dibaʾ dosulul aboka, anya onoʾ sikda Imik Neyung adya men laga danggumokaʾ, al Kristus nong anyek pe ella ubnemak aboka, sikda ganya lomok sangabdangoka, wanaʾ ubdangoka ulunok senelamna. 3Dara, nidyaʾ geremseng uboka, ella dangoka pesinaʾ damok ara, alak danyek ulumla. 4Ban wenyaboka lebsinya nera, dib nonggom yub bok, alda ugunuk pero-pero makaʾ lelewoka, sondaʾ bok, bobleregeisijek aboka lebna. 5Wera na nong anaba ugunublaboka neikaʾ unggulumab bok, ganya ak dara, nara ugunub neikaʾ ulumab. Anya ugunja Kristus ak dib senewoka migibaʾ ululum ab, ugunja ganya pe meebdangoka ululum dara, nara eiya dablenel.
Kristus Lomok Mounaʾ Gobdo Ulumab Yuba
6Ugunda Kristus Yesus ara, Wenelesilnya aboka seleb dolum anasa, ugunja ululum ara alab neikaʾ kwebdangoka ubgiga balalulum. 7Hnonda ugunda alak yareng elegoka, onoʾ al ab migib danggiga balalulum. Anya ugunja dib senenaʾ ganya ara, ugunuk nekesikaʾ sunuwoka, migibaʾ nenewoka, eiyasaʾ sobaʾ gibildolunun ganya hogung enyek sobaʾ boro balalulum.
8Dara youmaʾ uru balamek yub eb, sokok an nimi sirikaʾ ganya ak ab yub ara, Kristus adya senenggululanya bok, or orok salyaʾ hwam yub adya, ugunja ganya ek henga goubsijek anasa, pe keeboka ulumnelum.
9Hnonda Kristus alja nong yokaʾ ara, Imik Neyung ganya ulumlaʾ nidyaʾ ara alak gobdo ulumla. 10Anya ugunda al lomok ululumaʾ adya hyak munaʾ gobdo pebdaksuk. Hnonda, wenewoka bo usinaʾ, senenggom dub unaʾ nidyaʾ amba dara, alak danyek, huka, dubnya, ulumla. 11Onoʾ hnonda al pik ab uboka, ugunda ugunja bolaʾ garawousuk ara, nim adya garalesak soknya nenyek unuwanggubsuk. Alda Kristus adya garalasilnya nenyek unuwousuk ara, wera malya unaʾ nong an gwiriwoka loblum an. 12#Rm. 6:4Anasa wera, ugunda meka dasik dara, alab neikaʾ soko lokiyiwosuk. Anya onoʾ Imik Neyung migibaʾ adya somoknaʾ gangganek ab, weboka bukiyiwok migib enyek, ugunda dib senewoulum adya, wera onoʾ ugunda alablaboka neikaʾ subuka bukiyiwousuk.
13 #
Ep. 2:1-5
Dara ugumbabya youmaʾ dara, ugunja meknenaʾ hnon ugunja sobaʾ malya ululumnya lomok uboka hnon, anedya ugunda seleb somogoka ululum bok, wera Imik Neyung adya Kristus ab neikaʾ seleb embengaʾ gebsuk. Anya, nunja meknenaʾ hwam malya unaʾ nidyaʾ doboka bobogosuukanya, 14#Ep. 2:15nuk igina berewoka, kweldisinaʾ yok-yok sunuwoka memewoka, an lelemla sunuwoka, deklulum aboka yeirilisuknya nera, alja bo somogok gal ak paku bokokaʾ adya, wera alja orok nenewoka seleb lubsuk. 15Ban onaʾ gal pik uboka dara, wenewoka bo usinaʾ, senenggom dub unaʾ ab dara, seleb alja alawoka dobok. Anya ban unuwoka oblamagousuk ara, sikenek salyaʾ longowoka ngouluknaʾ dok.
Imiknya Nenyek Elelulum Hyok Yuba
16 #
Rm. 14:1-6
Anasa, ugunda nim adya denaʾ amba gom, mek amba gom, perob sum emba gom, Sabat mem sum emba leboka, yana lelewoka igina kweiyiweisijik anasa, mem. 17Dara ban nidyaʾ ara, eimik lanawanamlaʾ sununaʾ ek ulumla, bok hyak dib nong ara, Kristus ak ulumla. 18Dara, ugunja oblamaknaʾ ara, or-or uboka sene ganya sokok nenebdangoka, lero nang ek giboka, goloknaʾ dib eillilimakaʾ anyek sunuwoka, sikja sokok unuro yaban ganya enyek, beknaʾ orok bok nauba nonggo abdangoka ulumak nang edya, ugunja oblamaknaʾ ara orok neneweisijik, mem. 19#Ep. 4:16Dara, sikda hukuk ara, pe salalmoubnenggulumak. Bok hukuk ab ara, nonga nidyaʾ hiboka, mel-mel ab nolong gwerenaʾ ab dadya, neikaʾ pero welemakaʾ adya, Imik Neyung bedya ak nelemla.
20Ugunda Kristus ab seleb neikaʾ somogoulum adya, wera sokok an nimi sirikaʾ ganya ek ab seleb blebdolum dara, hekasa ugunda sokok an anam ulumnaʾ anaso anyek, yokaʾ-yokaʾ memewoka unulumaknya nek an keboka unululum do? 21Hnonda ban nera soruka salanaʾ mem, nera delyamanaʾ mem, nera beleknaʾ mem, anaso wenyaboka memelemaknya nera, ugunda hekasa keboka unululum do? 22Ban nidyaʾ ara, boboka ulumak adya, anera denghenelanya nek ulumla. An nidyaʾ ara, or oruknaʾ yub ab, nim adya ok neklesaknya nek lelemak. 23Ban unulumaknya nera, sikja giblemaknya hnon, ganya sokok neneldalamaknya hnon, nong oldalamaknya nera, geremseng senen bok, sokok an unulusinya ganya hmenga nenenggulumla.
Currently Selected:
KOLOSE 2: LAINLC
Highlight
Copy
Compare
Share
Want to have your highlights saved across all your devices? Sign up or sign in
