2 TESALONIKA 3
3
Nusamba Molowoka Welelulum Hyok Yuba
1Anya wera, hemyabo nim o, nunsamba hnon heng uboka mololesululum. Hnonda Wenelesilnya bedya yub era, ugun dolum sok, li sobaʾ nauba danggiga balamlyekanya, imik nenewanokaʾ aboka mololesululum. 2Hnonda onoʾ nimi nidyaʾ ara, Wenelesilnya bedya yub era, ganya eleleng aboka dib senenggulumak bok anasa, nuk yu hwam nim eb, nimi doluwoka malya nenelesak nim ek ab, Imik Neyung adya blebsululaʾ aboka mololesululum. 3Bok Imik Neyung ara alda bojam hwam ok ululanya. Anasa alja ugunuk ganya migib neneb eleganesilikanya, nimi malya nenesinaʾ ak ab leileiwoka blebnesil. 4Hnonda ugun nong anyek, nunja Imik Neyung lomok uboka, aldib sikda nunja ban unulumnelum aboka orugosubaʾ ara, wen hnon unulumakaʾ ara, onoʾ eimik hnon unulumnumakaʾ anyaʾ senelesab. 5Wera anadya Wenelesilnya bedya aralesilyekanya, Imik Neyung ara ugunuk yadyek senelesilaʾ anyek pe ella dolulumaʾ aboka hnon, Kristus adya dara, ugunja ganya daklinggoka unaʾ hnon elegosulul senelesab.
Nimi Nidyaʾ Wa Welelulum Hyok Yuba
6Nunjaʾ hemyabo nim o, nunjaʾ Wenelesilnya Yesus Kristus si sibuka ugunuk wenyhenesin, nunja ugunuk neklesab yub ek dib senenaʾ loboka, wa wenaʾ sulmalyaʾ hwam ok ura yabalamak nim era, men mok nenewoka ulululum. 7Nunda ugun gangganek sam ulumouba dara, wa wenaʾ ara hnon sulmalyaʾ unggulumouba. Anasa ugumbabya nunja wa yeiriwoka welemouba sok, nunja diligaʾ doboka wa moubuka welelulum. 8Nunda yok nimi denaʾ doboka denemna dara, hnon salyaʾ del lonaʾ ara unuwanggumouba. Alda nimi yok nang ugun gangganek anaba, ganya malya ub elegeibyek aboka, yubyek inimnek pik moruwoka sobaʾ wa yeiriwoka welemouba. 9Ban nunja nidyaʾ ugun gangganek anya, yeiriwoka wa welemoubnya nera, ugunuk an si akoka molowanggunusibya aboka ulumoubaʾ gomaʾ, alda nunja unuweibya enyek, ugumba nuk diliwoka unuwolulumaʾ aboka ulumouba. 10Wera nunda ugun gangganek uboka wa welemouba dara, nunja ugunuk lelesubaʾ ara, ”Wa wenaʾ orok nang era, denaʾ salyaʾ denaʾ ara mem,” alasuba.
11Ban wenyasabnya nera, ugun gangganek anyek, hnon nim era sulmalyaʾ hwam ok uboka, wa wenggulumak an yuba hnon, sikda yokaʾ-yokaʾ ara ununggulumakjok, yok nim edya ununanya nenyek, hiboka saro bulumak an yub kemoubaʾ anasa lesab. 12Anasa Wenelesilnya Yesus Kristus alja migib si sibuka, sikda ganya daklinggoka uboka, denaʾ pe eboka deregoka ulunokaʾ aboka, unulululum hyabakanya, wenewasab. 13Bok neik perobaʾ ok sobaʾ unubgiga balamabaʾ lek ganya bonaʾ ara hyak mem.
14Onoʾ eimik era, hnon nim edya dara, nunja ban momnya donaʾ lomok enyek an lebabnya nera hnon dib senewanggunumak dara, anaso unulumak nim era sikba alya dabsululaʾ aboka, ugunda nim enyek keeboka, sikenek neikaʾ unaʾ hyak mem. 15Bok anja dara, alak ara isaʾ nang dibaʾ anaso geboka ubnenggunulam bok, alda anja weisab eneso uboka wenelelom.
Sidyaʾ Lebok Yuba
16Wenelesilnya bera nuk penaʾ ul eleksilnya ulumla. Anasa, Wenelesilnya bedya ugunuk perob unaʾ ara yokaʾ-yokaʾ nidyaʾ ara ugunuk eleklesulul. Imik Neyung ara ugunuk nidyaʾ nang ek arawoka bo ulusulul.
17Nara Paulus bedya, nabeyok ban ugunuk gibsin. Ban nenera nadya ok gobdo momnya doboka beibsin. Wera nidyaʾ nadya yokaʾ beillilesin momnya donaʾ ara, nadya yokaʾ nongnya nera sob beknaʾ dibaʾ unu nabeyok momnya dolomna.
18Anasa wera, nunjaʾ Wenelesilnya Yesus Kristus wanaʾ uboka perob eleksinaʾ adya, ugunuk wanaʾ uboka eleksinaʾ ulusulul.
Currently Selected:
2 TESALONIKA 3: LAINLC
Highlight
Copy
Compare
Share
Want to have your highlights saved across all your devices? Sign up or sign in
