Sikaraya 6
6
Yóm gwolu hton Dwata ke Sikaraya
1Ominu bud mkay ketngelu, tonu yóm fat klitun tók dyol kudà hewà lem blóng yóm lewu kem bulul hono tembaga futì. 2Yóm tanay klitun tók, wen kem kudà hulô demyol du ne yóm gewuhen dyol kem kudà hitem 3ne yóm getluhen dyol kem kudà bukay, ominen yóm gfaten dyol kem kudà kebting. Bede hono kem kudà kemgis yóm kdê le. 4Snólóku yóm hógów Dwata gel stulón do, “Boluy se kun yó du, Sér?”
5Bnalaen o, monen, “Lu se yóm fat kem lenos gu bè longit. Deng le mdà bè solu yóm Dwata mogot yóm klamangen benwu ne lemwót le bè yó mógów ebè klamangen benwu na le e nmò yóm hmò Dwata kul. 6Yóm klitun tók dyol kudà hitem fen mógów ebè yóm benwu fi bwak ne yóm klitun tók dyol kudà bukay fen huli du. Ominen yóm klitun tók dyol kudà kebting fen mógów ebè yóm benwu fi leged.”#6:6 Yóm benwu fi bwak duhen Babilun. Ominen yóm benwu fi leged duhen Idyip.
7Ya tey kódód yó kem kudà alì kemgis yó, koso hnalak le yóm klamang benwu. Yó udélen ebélê le yóm hógów Dwata,#6:7 Yóm hógów Dwata monen yó, du se yóm smakay kudà hulô mdà lem yóm koyu mirtol. monen mò kul, “Yó ne, hnalak ye yóm klamang benwu.” Tahu se, gotu le lemwót.
8Ominen hgel udélen ebéléu yóm hógów Dwata yó koni, monen, “Ngem, lemwót bè yó kem kudà mógów ebè yóm benwu fi bwak yóó gónón deng menek yóm dou Tulus.”
Ksuub le yóm kuruna bè kulu Jéswa
9Ominen bud wen udél Dwata ebéléu, monen, 10“Mógówi etu bè tu kem tau negef lomi kól gu bè Babilun, bè le Hilda ne bè Tubidya ne bè Jidaya, nô le bè gónô Jusaya ngà Sifanaya. Wen tey blówón bukay ne tahu blówón nwit le, basa hwit yó kem tau negef tolo tebel bè Babilun. 11Nwahem yóm hwit le yó ne nmoem kuruna. Ominem smuub du bè kulu Jéswa yóm geta bè yó kem gel blóng ebè Dwata yóm Jéswa ngà Jihusadak. 12Tulónem du udél yóm Dwata laen dù là gbeken du, yó monen, ‘Ngem, yóm sotu tau bnoluy Hanga. Tey angat ktubeden, du mò bud hemdà du yóm dou Gónô.#6:12 Yóm hanga monen yó, là kô Jéswa du, du se Jisas. Olohen hmingón du bè Jéswa.Tahu se, du se angat hemdà du yóm kun Gónô Dwata ne tey kadat le du lómón kadat le yóm tau hol geta ne nogoten yó kem tauhen lemwót bè yóm gónón myón kmamal. Ne lenwóten bè yóm gónón myón kmamal, bud du se mò blóng le ebè Dwata ne tey tilob kessogot yóm lewu nmoen yó. 13Tahu se, du se angat hemdà du yóm kun Gónô Dwata ne tey kadat le du lómón kadat le yóm tau hol geta ne nogoten yó kem tauhen lemwót bè yóm gónón myón kmamal. Ne lenwóten bè yóm gónón myón kmamal, bud du se mò blóng le ebè Dwata ne tey tilob kessogot yóm lewu nmoen yó.
14Lemwót yóm kuruna yó, sù ye lem yóm Gónô Dwata mò gónó ye hemtulón kul nawa le Hilda ne Tubidya ne Jidaya ne Jusaya ngà Sifanaya, yó kem tau gónón gu lemwót.
15Bè yóm angat kehdà le yóm Gónô Dwata, tey dê tau lemwót bè benwu mayuk semtóbóng hemdà du.#6:15 Yó kem tau lemwót bè benwu mayuk yó, là olon yó kem tau Ju du, wen se kem tau là Ju le deng tulón Sikaraya bè 2:11. Ke deng dohò yóm ni, bè ni gónó ye temngón du yóm Dwata laen dù là gbeken du yóm hógów do ebélê ye. Ke hteneb ye mimón du yó kem hloloen kuy yóm sana kuy Dwata hol gónó mogot, angat gotu dohò ni kem ni.’ ”
Currently Selected:
Sikaraya 6: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
