Sikaraya 5
5
Yóm gnem hton Dwata ke Sikaraya
1Bud nkayu bè yó ketngelu, tonu yóm klatas lenulun deng mból móyóng te kmawang.
2Bud snólóken o yóm hógów Dwata gel stulón do, “Tedu se tonem?”
Bnalau se, monu, “Klatas lenulun deng mból móyóng te kmawang, dô syóm mitru ktahaen ne fat mitru sóól klamangen.”#5:2 Yó gónón mból yóm klatas yó anì kdéen tau mton du. Yó gónón lembang yóm betek snulat le lemen anì gbek tau semfala du.
3Ominen mon du mò do yóm hógów Dwata yó, “Deng snulat lem nim klatas mból ni yóm hmulà Dwata yó kem tau bè klamang benwu Juda. Snulat bè doli yóm klatas yó, angat gotu hdó Dwata lu bè yóm benwu ni yóm kdéen tau mnagaw ne bud snulat bè dolihen, angat gotu hdóhen lu snéen bè yóm benwu ni yóm kdéen tau smafà kéng. 4Ne yó udél yóm Dwata laen dù là gbeken du, monen, Yóm hmulà ni, hwitu ebè ket gónô yóm kdéen tau mnagaw ne ebè ket gónô yóm kdéen tau gel smafà kéng hlan le bè boluyu. Yóm hmulà ni, eles nô bè yó lem gónô le efet deng gotu sidek yóm gónô le yó, gomong koyuhen kkólen bè kem botuhen.”
Yóm ghitu hton Dwata ke Sikaraya
5Ominen hloni ebéléu yóm hógów Dwata stulón do yó koni, monen, “Temngeli eta, hnénégem yóm gu ditu yóó.”
6Bud snólóku, “Boluyen yó du?”
Bnalaen ou, monen, “Yó se abì. Ne tódô hnok lemen yó kem salà yóm kdéen tau bè klamang yóm benwu ni.”
7Yóm abì yó, wen tey tinggà blat sefengen ne bè yóm ktukéhen du yóm hógów Dwata yó, tonu yóm libun myón lemen. 8Yó mon yóm hógów Dwata gel stulón do, “Yó boluyen yóm libun yó, Hono Salà.” Ominen tmulud du elem abì yóm libun yó ne ominen bud smefeng du.
9Ominu bud mkay ketngelu, tonu yóm lewu kem libun móyóng gu ditu, bede tey tahà yó kem hafak le mung le bè lenos. Nkay le yóm abì yó koni nwit le móyóng ete kmawang.
10Ominu smólók yóm hógów Dwata gel stulón do, “Gónó le e mit du du tum abì tu koni?”
11Bnalaen ou, monen, “Nwit le ebè Babilun na le e hemdà béléen gónô ditu. Ke deng kehdà le du yóm gónóen, wen gónó le hemyón du bè yó lemen yóm abì yó ne bè yó hlós gónón nô.”
Currently Selected:
Sikaraya 5: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
