Sikaraya 14

Kkamal Dwata yóm klamangen benwu

1Ngem, móyón kól yóm kdaw kkukum Dwata. Gotu nuku kem hohon ye yó kem kimu ye ne gotu sensólól le igò ye temngel. 2Bè yóm kdaw yó, gotu sentifun Dwata yóm kdéen benwu mò na a gmida bè Jirusalim. Angat gnô lem hólól le yóm syudad yó. Ne yó kem gónô bè yó, gotu nuku le yó kem kimu nô lemen ne gotu kneyek le yó kem libun. Gotu negef le sóól bè yó kem tau bè Jirusalim ne yóm sóólen fen tebel lem yóm syudad deng gbà.

3Ominen yó nmò Dwata, du mit sfatay bè tu kem benwu tu koni lómón yóm tehe kwiten sfatay teganay. 4Bè yóm kdaw yó, angat mdà ta Bulul Ulib Dwata, yóm bulul fi dmata kdaw Jirusalim. Ne yóm Bulul Ulib yó, tódô meskang bè gónón sóól, baling datal lamang lenwóten fi dmata kdaw kól desdef. Yóm sóól yóm bulul yó tódô mili fi bwak ne yóm sóólen tódô mili fi leged. 5Angat ye mlan bè yóm datal ni bè yóm klóy ye, abay se gefet ditu bè Asal yóm datal ni. Tódô ye gotu mlóy lómón yóm tehe klóy yó kem tehe fù ye ekni bè yóm tehe kbel linol bong bè Juda bè yóm tehe kun kogot Usiya. Ominen yó, sut yóm sana dou Dwata hol gónó mogot, mung du yóm kdê gel hógówen.

6Bè yóm kdaw yó, là buden mnóng yó kem gel lemayag kemdaw ne kifu. 7Tódô senflósen kemdaw. Són Dwata néen temngón du mò kmoen yóm ni. Là bud tngónem du ne ke kemdaw duhen ke kifu. Baluen ke deng kifu, sana klayagen. 8Bè yóm kdaw yó, wen él hlowil mlel lemwót gu bè Jirusalim. Yóm sóól yóm él yó mlel ebè Mohin Héét ne yóm sóólen mlel ebè Mohin Miditiranyan. Tódô senflósen mlel, baluen ke bulónen kinì duhen ke bulónen tnaw.

9Angat Dwata se yóm hol geta bè klamangen benwu. Bè yóm kdaw yó laen dù dumu Dwata, tek sónen du ne tek són kun boluy gónó le gel tmaba. 10Yóm klamangen tonok lenwóten bè Giba fi bwak Juda efet kól bè Rimun fi leged Jirusalim, angat gotu sendatalen. Okóm yóm syudad Jirusalim, sana kdaen bè yóm kun gónó mdà malù geta. Yó klamangen, lenwóten bè Tikeb Bindyamin efet kól ditu bè yóm tehe gna tikeb ne efet kól ditu bè Tikeb Sokok ne bud lenwóten bè Gónô Tahà Hananél efet kól ditu bè gónó le gel mò tifas grép bè gónô yóm tau hol geta. 11Ne bè Jirusalim angat gónó le henek nô yó kem tey tau wen ne laen kô dù bud gemlà kul ne.

12Wen des mit hatay angat heglumfak Dwata ebè yó kem tau bè yó kem benwu mit sgida bè benwu Jirusalim. Yóm igò le tolo mowil, tódô gotu lemdak lówó le dalang se mata le ne dilak le. 13Bè yóm kdaw yó, tey kehlangaf Dwata kul. Ket tau nwiten sfatay kem dumun. 14Bè yó bè Jirusalim gónó kem tau Juda alì mit sfatay bè yó kem hohon le. Bè yóm kdéen benwu hohon le hmilol Jirusalim, gotu nuku kem sendalù Juda yó kem kendengen lemen, kem tahu blówón ne kem blówón bukay ne yó kem tey nes wen. 15Yóm des mit hatay heglumfak Dwata yó kem hohon le, bud yó se heglumfak Dwata yó kem kudà le ne yó kem kudà asnu le kkólen bè yó kem kamél le ne yó kem dumu ógóf gel nô bè kamfù le.

16Ne yó kem dù tau mowil bè yó kem benwu hmohon yóm benwu Jirusalim, angat le mneged ebè Jirusalim bè ket halay na le e tmaba ebè yóm Hol Geta, duhen yóm Dwata laen dù là gbeken du ne mung le bè yóm Kehligal bè Slung.#14:16 Bè yóm gel kmò le du yóm Kehligal bè Slung yó kem tau Israél yó nmò le, nô le bè slung lem yóm sotu fedyan. Hentulón le nawa yóm tehe knô le bè slung yó kem tehe fù le ekni bè yóm kehewà le gu bè Idyip na le e kógów ebè Kanan. Botong fat folò halay le hlalak yóm benwu laen hol wen tauhen, són bè slung gónó le gel tungô. Yóm kehligal le ni, nmò yó kem tau Israél ke sok deng kuta le na le e dóyón Dwata bè kdê yó kem tóbóngen kul.Yóm benwu là mnegeden ebè Jirusalim ne là tmabahen ebè yóm Hol Geta duhen yóm Dwata laen dù là gbeken du, laen dù kulón ebè benwu le. 17Yóm benwu là mnegeden ebè Jirusalim ne là tmabahen ebè yóm Hol Geta duhen yóm Dwata laen dù là gbeken du, laen dù kulón ebè benwu le. 18Ke là móyô le mógów ebè Jirusalim yó kem tau Idyip, angat wen des mit hatay heglumfak Dwata kul lómón yóm des heglumfak Dwata yó kem dumu benwu là mung du yóm Kehligal bè Slung. 19Ni se tafak Dwata yóm benwu Idyip dalang se yó kem dumu benwu ke là móyô le mógów ebè Jirusalim na a mung bè yóm Kehligal bè Slung.

20Bè yóm kdaw yó, balù bè yó kem tloyong kudà, sana ksulat le du yóm udél nii, “ke Dwata funen.” Ne bud ke Dwata funen snéen yóm kuleng gónó tmógó bè Gónô Dwata, lómón kfunen yóm tukung nô bè gónó gel demsù. 21Bè ktahuhen, tódô kdê yó kem kuleng bè Jirusalim ne bè Juda, gotu ke Dwata funen, yóm Dwata laen dù là gbeken du. Yóm kdéen tau demsù ebè Dwata, tódô kihu kun nóyô nwit bè ni kem kuleng ni ke tnógóhen yóm dsuen ebè Dwata. Ne bè yóm kdaw yó, laen dù bud tau Kanan mung bè yóm kun Gónô yóm Dwata laen dù là gbeken du.#14:21 Yóm tau Kanan monen yó, lu se yó kem tau gel mit kul tmaba ebè Baal yó kem tau Israél.

Currently Selected:

Sikaraya 14: tbl

Highlight

Copy