Sikaraya 13
13
Yóm sfut él mò molob salà
1Yó udél yóm Dwata laen dù là gbeken du, monen, “Bè yóm kdaw yó, angat wen sfut él mò gónó le molob yó kem sfu Dabid ne yó kem dumu tau bè Jirusalim, anì hol mkó bélê le kdê yó kem salà le ne yó kem dumu là mólósen bélê le.
2Ne bud bè yóm kdaw yó, angat gotu hlanahu bè benwu Israél yóm kdéen dwata kéng gel tnaba le, anì laen dù bud hemtulón nawa kul balù boluy le. Gotu kóhu snéen yóm kdéen tmugod bè dwata kéng ne yó kem tulus sidek gel lolò le. 3Ke wen tau bud wen gel tugoden, yó angat mon maen mò du lewu le yéen, ‘Matayi se kóm abay se yóm gel tulónem, hlanem bè boluy Dwata.’ Ke wen bud tulónen yóm tau yó, kem kun tuha tembek hmatay du.
4Bè yóm kdaw yó, ket tau tmugod bè dwata kéng, sal bud mulék myak du bè yóm bud tulónen. Là bud leseken du ne yóm nes gel lesek yóm tugod Dwata tehe gel leseken, mò smukat kem dumun. 5Mom yó angat monen, ‘Là, là tauhe tugod Dwata. Tauhe mò hulu se dou. Bè tonok se do gónó mowil lemwót bè kegenu udì.’ 6Ne ke wen smólók du, ‘Boluyen se yó dum halì bè kfuhem yóó?’ Yó angat balaen dù, monen, ‘Haliu bè gónô yó kem weu.’ ”
Kesekla yó kem ubiha
7Yó bud udél yóm Dwata laen dù là gbeken du, monen, “Yó ne, sudeng, hnatayem yóm tau semgyok yó kem dou ubiha, yóm tau hol fi béléu. Hnatayem yóm tau semgyok ubiha anì gotu le sekla yóm kdê ubiha le. Ne fen ou tmafak yó kem hanà lemnek. 8Bè klamang benwu Israél, olon kafi tau matay ne tek gbut mowil tebel le bè yó. 9Yóm dù mowil yó, angat lómó kmou kul lómón yóm tau tmógó tahu blówón ne blówón bukay bè ofi, gotu kóhen ke wen boolen. Omin le yó tmaba bè boluyu ne angat bnalau lu, monu, ‘Lu se yó kem dou tau’ ne yó mon le se kul, ‘Dwata se yóm sana kum Dwata hol gónó mogot.’ ”
Currently Selected:
Sikaraya 13: tbl
Highlight
Share
Copy
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
