Kem Lingón 92
92
Lingón le bè kun kdaw Dwata
1Tey hyu ke gel me slamat bè Dwata.
Tey hyu semngal du yó kem sngal dmóyón ke Dwata
yóm Dwata Hol Dandónen Geta.
2Tey hyu ke ket hlafus me tmulón du yóm là konol yóm kbong nawahem kum,
ne ke ket kifu me tmulón du yóm kóm kteneb bélê me.
3Bè yóm kesngal me, hmung me yó kem gel kenbit me,
tey tilob kessutóm le.
4Tey kehefligalem dou, Dwata, bè kdê yó kem deng gendengem béléu.
Ke hendemu yó kem deng gendengem yó, botonge semngal lemwót bè kligalu.
5Tey tennga, Dwata, yó kem hentaw ton gel nmoem.
Tey ngelem yóm kóm kehedem.
6Yóm tau laen dù tngónen, balù udì ke glileben kun nim ni.
Senged se yóm tau nungel, là kô glileben du.
7Tey mahil klowil le yó kem tau gel mò sidek,
lómón ke kluon, mahil tmowok.
Okóm angat kól yóm kdaw angat le gotu meglà,
ne laen kô dù sónen yóm keglà le.
8Okóm uu se, Dwata yóm hol geta bè longit,
ne laen kô dù sónen yóm kegetahem.
9Kdê yó kem hohonem, Dwata, angat le gotu matay.
Angat gotu senklahem lu kdê yó kem tau gel mò sidek.
10Okóm deng tey kehekgisem dou, lómón kgis yóm safì tudu tabag.
Ne tey kehyu kegnómu du lemwót bè yóm nmoem béléu.
11Deng ton matahu yóm là kegmò yó kem hohonu,
ne deng dou klingu mungol du langat yó kem hohonu gel mò sidek.
12Okóm kul yó kem tau mimón ke Dwata, tey hyu klowil le
hol lómón ke lefò tey tilob ktowoken.
Ne tey kbegel le,
hol lómón kbegel yóm koyu sidar bè Libanun.
13Yakà deng nilihu kul bè gónô Dwata.
Ne tey hyu kenok le bè yó bè kun gónô Dwata.
14Balù yóm deng ktuha le, sana kbungu le.
Là kóen monol kgis le bè yóm kmò le nmò.
15Yó mon le, “Tey ktedeng Dwata.
Du se yóm botu mbegel dou gónó heklung.
Laen kô dù sidek béléen.”
Currently Selected:
Kem Lingón 92: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
