Kem Lingón 9
9
Lingón Dabid
1Ó Dwata, hotuhu nawahu dmóyón kóm.
Gotu tulónu yóm kdê tey tennga deng nmoem.
2Tey bong kligalu béléem.
Sngalu yóm sngal dmóyón kóm, Dwata
yóm Dwata hol Dandónen Geta.
3Bè yóm klóy le mulék yó kem hohonu, gotu le tlokob bè soluhem ne gotu le matay.
4Yakà deng nfihem ou.
Tey tedeng kkukumem dou igoem myón bè yóm gónóm myón kmamal.
5Deng gotu bnólówem yó kem tau mò sidek bè dumu benwu.
Deng gotu genlaem lu.
Gotu hlanahem boluy le laen kô dù tul sónen.
6Deng guta kem hohonu ne yóm keglà laen dù tul sónen.
Yó kem syudad le, deng gotu genbaem ne laen dù bud hemtulón kul nawa.
7Okóm ke Dwata, laen kô dù tul sónen yóm kogoten tau.
Deng eles hbegelen yóm gónón myón kmamal mò gónón mit du yóm kukum tedeng.
8Knukumen yó kem tau bè klamangen benwu mlan bè ktedengen.
Knukumen tau mlan bè klaen dù mtukul nfihen.
9Dwata se yóm kul gónó e mlo yó kem tau lenunog,
ne gónó le hofin bè yóm kdawen wen gfà le.
10Yó kem tau temngón kóm, Dwata, són uu snalig le.
Abay se là kô nem e gel bayà kul yó kem tau hmebel kóm.
11Sngal tekuy yóm sngal dmóyón ke Dwata
yóm Dwata kmamal lemwót bè Sayun.
Heglalag tekuy bè kem tau bè klamangen benwu yóm kdê deng nmoen.
12Yakà gel bnelesen du litô yó kem tau laen dù gmò le.
Là kô nan e tódô bayà kul mkik yó kem tau wen gónó le glayam.
13Ó Dwata, hol knoduhem ou.
Tenngelem yóm keglayamu bè yó kem tau kmutó nawa dou.
Skotem ou lem hatay,
14anì bud dóyónu uu bè gónón wen bè bak tikeb Jirusalim,
anì hligale dmóyón kóm bè yó lemwót bè yóm deng kehewaem dou.
15Yó kem tau bè kem dumu benwu, deng le mokol sól mò gónó le kemfô kem dumu tau,
deng mom lu btang elem yóm sol nokol le.
16Tey tótól Dwata bè ktedeng kkukumen.
Yó kem tau mò sidek, gholot le bè yóm sidek nmò le.
17Angat le mógów elem hatay yóm kdê tau mò sidek,
yó kem tau bè dumu benwu deng kembê ke Dwata.
18Yó kem tau élél, là kóen hlós keklifót Dwata kul.
Ne yóm nefet nawa yó kem tau laen dù kwa le, là kóen na a lana.
19Hekmóni, Dwata. Là hyuhen ke natù le uu kem tau.
Knukumem bè soluhem yó kem tau bè dumu benwu.
20Heslafem lu bè klikò le, Dwata.
Hegnómem kul olo le tau tonok se kul.
Currently Selected:
Kem Lingón 9: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
