Kem Lingón 81
81
Lingón Asaf
1Hol sngal tekuy yóm sngal dmóyón
ke Dwata, yóm gel hekgis tekuy.
Semngal tekuy ebè yóm Dwata yóm tehe fù tekuy Jakub.
2Hol tekuy semngal dé. Hol huni ye tamburin.
Hol kenbit ye yóm kdê gel kenbit ye.
3Huni ye yóm féw bè yóm gel kehligal ye
bè yóm lomi bulón,
ne bè yóm bulón tngel.
4Yakà ni du yóm gel hlolò Dwata yó kem tau Israél,
kun hlolò yóm Dwata tehe fù tekuy Jakub.
5Tehe nmoen nim ni bè yó kem tau Israél
bè yóm kdaw tehe kundugen ebè Idyip nan e kehewà tekuy.
Wen udél gungolu, yóm là deng hnikót tngónu du, yó monen,
6“Henwósu ta abal ye yó kem blat nbô ye.
Kóhu lem tdok ye yó kem nmò alì blat.
7Bè yóm kwen gfà ye, gel tnaba ye ou,
ne deng lenwau se yu.
Bnalau yu gu lem yóm lobun gónón lemwót leték.
Deng tnilówu kehtahu ye ditu bè benwu Miriba
bè yóm alì ktalaw ye lanen laen dù él.
8Ó kem dou tau, hnungol ye ou,
hol hnungol ye ou nim igou hetgama kuy.
Ó kem tau Israél, yake hol ye hmungol dé.
9Hol béen abay wen dwata lennged tnaba ye.
Hol bê ye abay mtud bukol bè yó kem dwata kéng.
10Yakà ou du yóm sana kuy Dwata hol gónó mogot,
yóm deng lemwà kuy gu bè benwu Idyip.
Hol ye mnanga anì naw hol henken yu.
11Okóm là, là kô dog hnungol le dou yó kem dou tau.
Là kô dog kenmón le dou yó kem tau Israél.
12Duhen yó, tódô bayau kul ne yóm kgel kulu le yó
anì lolò le yóm kul knóyô.
13Okóm tey hyu nawahu ke hnungol le ou yó kem dou tau.
Hyu nawahu ke lolò le yóm dou lan.
14Ke yó nmò le, kendel hegmou lu bè yó kem hohon le,
ne dou tdok gemlà kul.
15Yó kem tau kmutó nawa ke Dwata,
gotu le hegdungul bè soluhen lemwót bè klikò le,
ne laen kô dù tul sónen yóm ktafaken kul.
16Okóm kuy, hkenu kuy yóm ken ali hyu.
Hebsowu yu bè yóm tneb lemwót lem sol botu.”
Currently Selected:
Kem Lingón 81: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
