Kem Lingón 79
79
Lingón Asaf
1Ó Dwata, deng nled yó kem tau là
hemtahu yóm tonok kóm nfun.
Deng gholu le yóm kóm Gónô, deng genbà le Jirusalim.
2Yóm lówó yó kem tóbóng lówóhem deng matay,
deng gotu tebel le mò tnukô yó kem onuk koyu mken matay,
ne hken le unged yó kem kóm tau bè yó kem ógóf lem bnes.
3Yóm kul litô yó kem kóm tau lómón ke él mlel bè klamang Jirusalim,
ne laen dù tau tebel mò lembeng kul.
4Deng hennê le mi yó kem tólóng benwu hmilol,
knuli le mi, lel le semdekà kum.
5Ó Dwata, kegenen de yóm kebutem kum?
Laen dù tul sónen ne kô?
Yóm kélés nawam, kegenen de kkalen lómón kal ofi?
6Kokem eta yó dé kem benwu kembê kóm yóm kebutem yó,
eta yó kem tau là tmaba ebéléem.
7Yakà deng gotu hnatay le yó kem kóm tau Israél,
ne deng genbà le yóm kul benwu.
8Béem abay hbô kum yó kem salà nmò yó kem tehe fù me.
Hol géhél knoduhem mi, laen dù bud nefet nawa me ne ni.
9Hol tnóbóngem mi, Dwata yóm Dwata gel lemwà kum.
Tnóbóngem mi mò gónóm gboluy.
Lenwaem mi, ne hnifótem kum salà me anì holi megdóyón.
10Moen du ke bayaem lu mudél yó kem tau bè tólóng benwu, yó kem tau là temngón kóm, yó udél le,
“Nô se Dwata le du?”
Hegfanem bélê me yóm kbelesem kul bè yóm khatay le yó kem tóbóng lówóhem.
11Hol hnungolem yóm dolong yó kem kóm tau deng negef.
Móyón hnatay le lu, géhél lenwaem lu mlan bè yóm tey kegebekem.
12Ó Dwata, hitu dulékem meles kul yó kem tólóng benwu hmilol me alì hemnê kóm.
13Duhen yó, laen dù tul sónen yóm tendo kdóyón me kóm mi kem kóm tau, yó kem ubiha gel hótóbem.
Dóyón me uu efet kól bè yó kem hilu bud lugod me.
Currently Selected:
Kem Lingón 79: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
