Kem Lingón 69
69
Lingón Dabid
1Ó Dwata, hol lenwaem ou.
Lómó kegnómu du, lómón ke mifale él deng són bè liholu.
2Lómón ke denge gebeng lem hitok,
là kóe gemdà tonok.
Tey nelem yóm él gónóhu geblos,
udì duen gónóhu là lemneb.
3Tey kegenu tmaba ebéléem, Dwata, anì tnóbóngem ou.
Ngangu tmaba efet des lem liholu.
Sónmou mangat temngel du ke wen tóbóngem dou
efet là buden gmefet ketngelu.
4Tey dê kem tau kmutó nawa dou
balù yóm klaen dù duón le dou.
Ke nsóhem lu, bong le wen senta yó kem balu weku.
Tey dê udél le gbak ebéléu hono kéng.
Tey le kemgis yó kem tau yó,
kóyô le ke ghatay le ou.
Laen kô dù deng hennagawu bélê le,
okóm deng mom henni le ou swì.
5Là kóen gebnos béléem, Dwata, yó kem salau.
Tódô tngónem yóm tehe tey ungelu.
6Hol tnóbóngem ou anì laen dù gónó le myak béléu
yó kem tau smalig kóm.
Uu se yóm Dwata hol dandónen geta gónóhu mogot,
laen dù là gbekem du.
Hol tnóbóngem ou anì laen dù gónó le myak béléu
yó kem tau gel tmaba ebéléem.
Yakà uu du yóm kum Dwata mi kem tau Israél.
7Mom hennê le ou lanu lemolò kóm.
Tey sidek kehyak le dou.
8Balù yó kem dumuhu setwoli,
lómón ke olohe tau milo ebélê le.
Senged se yó kem dou fes lówó,
lómón ke tólónge tau bélê le.
9Tey kkinì nawahu edu yóm Gónóem, Dwata,
lómó kegnómu du, hol lómón ke ofi temluk lem kfuhu.
Fen tódô ebéléu yóm kehnê le kóm yó kem tau.
10Tey keheglaanu knóu, gloku fasting,
deng mom hennê le ou yó kem tau.
11Bè yóm keseku yóm nes gel lesek yó kem tau langag,
deng mom bud knuli le ou.
12Sentulón le ou bè gónón wen.
Balù yó kem tau lengel, gel utóm le ou lingón.
13Okóm béléu dou, Dwata, tódô senflósu mni béléem.
Hol bnalaem ou sok kól yóm kdaw tngónem hyu béléu.
Hol bnalaem ou lemwót bè yóm kbong nawahem dou,
ne lemwót bè kdohò yóm fasadem lemwà dou.
14Hol lenwaem ou anì là hlóse gebeng lem hitok.
Hol kenlungem ou bè yó kem hohonu.
Nalakem ou anì gifalu yóm tey él nelem ni.
15Béem heslob ou dunuk
anì là lemnebe, anì là mataye.
16Hol bnalaem ou, Dwata,
lemwót bè yóm là konolen yóm kbong nawahem dou.
Beklili ebéléu lemwót bè yóm kkoduhem dou.
17Hol béem henbnos ou, Dwata,
yakà ou du yóm gel tóbóng lówóhem.
Tey bong nim hlayam nô tahu, géhél bnalaem ou ne.
18Géhéli dou edini, lenwaem ou.
Hol lenwaem ou lem tdok yó kem hohonu.
19Deng gungolem yóm tey kehnê le dou ne yóm kehyak le dou.
Laen kô dù adat le dou.
Gotu tonem kdê hohonu.
20Deng tey sidek kebà nawahu lemwót bè yóm tey kehnê le dou.
Tey deng sidek ne kegnómu du.
Ofol dou ke wen tau kmodu dou mò hemyu nawahu,
okóm là, balù sotu.
21Deng mom yó nmò le béléu, bè yóm kbitilu,
mom hken le dou yóm gónóhu milu.
Bè yóm kleengu, mom hinum le dou tifas bali.
22Hol henbalingen mò gónó le gholot yóm tey ken wen bè lemisa le.
Yóm klaen dù gónó le élél, nmoem mò gónó le bkó.
23Hol hbutóem lu.
Hol henblatem yóm nbô le efet laen dù bud kgis le.
24Béem sen-gafas yóm kebutem kul.
Hol hefegnómem kul yóm kekbéem du yóm gel nmò le.
25Hyu ke laen dù bud tauhen yó kem kamfù le.
Hyu ke laen dù tebel bè yó kem gónó le nô yó, balù sotu.
26Yó gónóhu mon du mò kóm yóm yó,
abay se bè yóm ktafakem yó kem kóm tau,
kulel se kul kmò sidek bélê le yó kem hohon le.
Tey sidek kestulón le kul yó kem tau deng hendesem yó.
27Hol snoloem yóm kdê salà le.
Béem homong lu bè yó kem tau lenwaem gu lem hatay.
28Hol kóhem yóm boluy le bè yóm bok
gónóm smulat boluy yó kem tau gmuta du yóm klowil laen dù sónen.
Béem homong lista lu bè boluy yó kem kóm tau.
29Okóm béléu dou, Dwata, deng tey alì sidek kegnómu du.
Bud bentikem ou, hol lenwaem ou.
30Duhen ni, Dwata, angat tey kdóyónu kóm hlanu bè klingónu.
Ne heglalagu yóm tey kegetahem hlanu bè yóm kdóyónu kóm.
31Tey bong kligalem du yóm kdóyónu kóm
senta yó kem safì dsuu ebéléem,
anien he ke demsue ebéléem safì tudu.
32Ke ton yó kem tau gel hen-gnok le yóm kdóyónu kóm,
tey kehyu nawa le.
Tey kegdufen kul yó kem tau gel tmaba ebéléem.
33Yóm Dwata, gel hnungolen yó kem tau élél gel htóbóng béléen,
ne là kô klifóten kul yó kem kun tau deng geblanggù.
34Yóm kdéen nô bè longit
ne yóm kdéen nô te tonok
ne yóm kdéen nô lem mohin,
hol dóyón ye Dwata.
35Angat lenwaen Jirusalim bè yó kem hohonen.
Bud hefdaen yó kem dumu benwu bè prubinsya Juda.
Ne gotu le bud nô bè yó, yó kem kun tau,
nfun le yóm klamangen.
36Kkólen bè yó kem semfu gu bè yó kem tau tóbóng lówó Dwata,
angat gfun le yóm klamangen.
Ne menwu le bè yó, yó kem tau kembong nawa ke Dwata.
Currently Selected:
Kem Lingón 69: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
