Kem Lingón 63
63
Lingón Dabid#Lingón nmò Dabid bè yóm tehe knóen bè yóm benwu laen hol wen tauhen bè Juda.
1Ó Dwata, uu se yóm hol dou Dwata,
tey khahuu kóm.
Tey kesgalu nawahu kóm.
Hol lómó kegnómu du,
hol lómón yóm tonok mékéng là buden hyu,
balù udì ke méfê.
Hol lómón yó se kegnómu du bè yóm khahuu kóm.
2Deng tehe tonu uu lem Gónóem,
deng tonu yóm tey kfasangem ne yóm tey keslinangem.
3Yóm là konol nawahem ebéléu,
tey bong muhen béléu he yó senta yóm klowilu.
Yó gónóhu hol dmóyón kóm.
4Klawihu mowil, sónmou tendo bemlay slamat béléem.
Hdau eta sigelu bè yóm gel knihu ebéléem.
5Angat tey kegsengel nawahu du yóm kehlonihu béléem,
hol lómón ke hdengene mken bè yóm mò ken bong.
Hligale lemingón béléem mò gónóhu dmóyón kóm.
6Ke hlilile bè gónóhu tungô, sónmou hemdem kóm.
Senflósu kifu hemdem kóm,
7abay se són uu yóm tendo tmóbóng dou.
Tey kehligalu lemingón bè yóm kofinem dou.
Lómó kegnómu du, lómón ke nóe laan hafakem.
8Mogote béléem, Dwata, ne tey mbegel se yóm kogotem dou,
yó gónón laen dù hemenu.
9Yó kem tau tendo malu hmatay dou,
angat le mógów ebè yóm benwu yó kem tau deng matay.
10Angat le gotu matay bè gida,
ne gotu nsék yó kem ógóf lem bnes lówó le.
11Okóm béléu dou, yóm tau hol geta deng nélékem,
tey kligalu lemwót bè yóm kehegmoem dou.
Yó kem tau gel dnohò le yóm fasad le hlan le bè boluy Dwata,
angat tey kdóyón le ke Dwata.
Okóm yó kem tau gel mò kéng, angat hegfan Dwata yóm kéng le,
là kô le bud gudél.
Currently Selected:
Kem Lingón 63: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
