Kem Lingón 5
5
Lingón Dabid
1Ó Dwata, hnungolem ou bè yóm igou mni.
Kenmónem yóm kenblat nawahu.
2Hnungolem yóm tey kehtóbóngu ebéléem.
Laen dù dumu gónóhu mni, tek són béléem, yóm Hol Geta ne yóm dou Dwata.
3Hnungolem, Dwata, yóm knihu béléem ke hlafus.
Ket hlafusu tendo tmulón du kóm yóm hnihu,
tódô eles tngónu yóm angat kbalaem dou.
4Là kói hligal du kóm, Dwata, yóm sidek.
Laen kô dù sidek nô béléem bè yó.
5Yó gónóm mon, là kô le gdà bè soluhem yó kem tau heklabak.
Tey keklitem kul yó kem tau gel mò sidek.
6Sal genlaem yó kem tau mò kéng.
Tey sidek keklitem yó kem tau monok ne kem tau smukat.
7Lemwót bè yóm là konolen yóm kbong nawahem dou, gbeku husek elem Gónóem.
Lemwót bè yóm kwen klikou kóm, yó gónóhu tmaba ebéléem lem Gónóem.
8Nalakem ou bè yóm lan tedeng, Dwata, anì là gemmò le béléu yó kem hohonu.
Hol hentedengem yóm kóm lan mò lolou.
9Yó kem hohonu, laen kô dù tahu tulón le.
Són hendem le kmò keglà le kem dumu tau.
Tey sidek yó kem udél le, hol lómón ke boo tau matay deng bolok.
Yóm kudél le tey mnóm, bede hono sukat mit hatay.
10Ó Dwata, hbóem kul yóm sidek nmò le.
Hebtangem lu bè yóm kul udél.
Lemwót bè yóm kdê salà nmò le, lohem lu mayuk,
yakà deng natù le kóm.
11Okóm yó kem tau mlo ebéléem, hligal le se kul.
Lemwót bè yóm tey kligal le, tendo sngal le yó kem sngal dmóyón kóm.
Nofinem lu anì yó hol le hligal kdê yó kem tau kembong nawa kóm.
12Yakà tey któbóngem kul, Dwata, yó kem tau tedeng kmò le.
Yóm kbong nawahem kul yó se mò kemlung kul.
Currently Selected:
Kem Lingón 5: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
