Kem Lingón 49
49
Lingón yó kem sfu Kura
1Ó kem kdéen tau bè klamangen,
hol hnungol ye nim monu ni.
2Kem tau hol geta, kem tau glaan,
tau wen kendengenen, tau élél,
hol hnungol ye ou.
3Abay se tey wen lemen nim udélu ni
lemwót bè yóm khulungu temnef.
4Yó kmò ktulónu du kuy, leningónu bélê ye.
Bud heglilebu kuy se yóm lanen
bè yóm igou kembit du nim ni.
5Béléu dou, là kóe na a likò
anien ke deng snibut le ou yó kem hohonu.
6Yó kem tau monu yó, yó kem tau sidek nmò le,
són snalig le kendengen le,
ne tey keheklabak le du yóm kegeta le.
7Bede laen kô dù tau ke gbeken msok knóen.
Là kô gbeken mayad du bè Dwata yóm btes klowilen,
8abay se yóm klowil tau, tey mebtes.
Balù nô kbong tô bayaden du yóm klowilen
9anì là matayen
ne anì gutahen yóm klowil laen dù tul sónen,
là kô nan e gbek mayad du.
10Gotu tngón tekuy se, balù yó kem tau alì temngón,
gotu le matay se kul.
Laen dù gónó le stólóng bè yó kem tau nungel
ne bè yó kem tau laen dù tngónen.
Gotu tebel le kem kendengen le bè yó kem bud lugod le.
11Yóm gónó le lembeng kul, yó se hlós kul gónó nô.
Laen kô dù sónen yóm knô le bè yó,
balù yóm kwen tey tehe tonok nfun le ekni.
12Balù nô kegetahen yóm tau,
là kô gbeken hemseng du yóm hatay.
Angat matay, lómón yó kem ógóf.
13Tu se koni kmoen yó kem tau snalig le knô le,
kem tau gsengel nawa le bè kendengen le.
14Eles nô ta le hatay le yó kem tau yó,
lómón yó kem ógóf.
Tendo gel nalaken lu yóm hatay,
nalaken lu elem lebeng.
Okóm yó kem tau tedeng kmò le,
angat le gemmò bè yó kem tau yó,
yó kem tau hlós lagas lówó le bè yóm benwu yó kem tau matay,
yóm benwu alì mayuk bè yóm tehe kul gónó nô talak tonok.
15Okóm béléu dou, angat lenwà Dwata ou,
angat lenwaen ou lem hatay.
16Béem nófô yóm sotu tau ke baling tau hol geta,
ne ke senflósen temnù yóm kendengenen.
17Ke matay yóm tau yó, là kô gwiten du yóm kendengenen.
Laen kô dù muhen du lem lebengen yó kem kendengenen yó.
18Anien he ke gsengel nawahen du yóm klowilen te tonok,
ne anien he ke tey kdóyón le du yóm gendengen,
19senged katayen snéen, lómón yó kem tehe fuen.
Angat nô bélê le ditu bè yóm benwu senflósen kmifu.
20Balù nô kegetahen yóm tau,
là kô gbeken hemseng du yóm hatay.
Angat matay, lómón yó kem ógóf.
Currently Selected:
Kem Lingón 49: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
