Kem Lingón 48
48
Lingón yó kem sfu Kura
1Tey geta yóm Dwata, knóón hol
sendóyón
bè yóm kun syudad yóm Dwata tekuy ta yóm kun bulul.
2Yóm bulul hol geta alì tilob,
tey kehligal yó kem tau bè klamangen benwu bè yóm kton le du.
Yóm Bulul Sayun, kun Bulul Dwata,
yóm kun syudad yóm Alì Geta.
3Dwata se nô bè yó kem gónó hofin bè Jirusalim.
Gel hegfanen yóm kofinen yó kem kun tau.
4Yó kem dumu tau hol geta talak tonok,
yó nmò le, gotu le stifun na le e nundug yóm syudad yó.
5Okóm bè yóm kton le du, tey sidek ketnga le.
Ya tey sidek klikò le, botong le mlóy mulék.
6Ne tódô setbol kkel le,
ya tey sidek kegnóm le du, lómón yóm libun kmuleng blututen,
7duhen ke lómón kegbaen yó kem kafal bong lemwót bè Tarsis
bè yóm ksut yóm lenos bong lemwót fi dmata kdaw.
8Deng gel gungol me se ktiloben yóm syudad yó,
okóm ni deng tódô kum mata se mton du,
yóm kun syudad yóm Dwata laen dù là gbeken du.
Kun syudad yóm Dwata tekuy.
Laen dù tul sónen yóm klaen dù hemenen yóm syudad yó.
9Ó Dwata, yóm igò me tmaba ebéléem lem yóm kóm Gónô,
sónmò me hemdem du yóm kbong nawam là monolen.
10Botong gefet bè són tonok yóm tendo kdóyón le kóm yó kem tau,
dalang se któtól yóm boluyem, botong gefet bè klamangen benwu.
Yóm sigel kwananem tendo mit kegmò.
11Hol hefligalem lu yó kem tau bè Bulul Sayun.
Hol hefligalem lu yó kem tau bè Juda lemwót bè ktedeng kkukumem.
12Ó kem tau Dwata, senibut ye Sayun,
nsó ye yóm kdê gónô geta gónó le gel hofin bè yó.
13Henklol ye yó kem beng mbegel hilolen.
Hnilol ye yó kem gónó heklung mò angat bud tulón ye bè yó kem lugod ye.
14Yóm tey kbegelen yó, hol lómón yó se kun kmò Dwata.
Ne laen dù tul sómnen yóm keDwata tekuy du.
Du se fen malak tekuy efet kól bè katay tekuy.
Currently Selected:
Kem Lingón 48: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
