Kem Lingón 2
2
Lingón bè yóm tau hol geta deng nélék Dwata
1Kihol le gel tô matù ke Dwata
yó kem tau bè klamangen benwu?
Kiholen dê gel tô atul le?
Yakem wen se gónón e kól.
2Ne yó kem tau hol geta bélê le,
deng le eles htigel mit sgida.
Ne natù le Dwata ne yóm tau hol geta deng néléken.
3Yó udél le,
“Hebkas tekuy ne bélê le.
Hewà tekuy lem hólól le.”
4Bè yóm kungol Dwata du
ditu bè yóm gónón myón kmamal bè longit yóm udél le yó,
mom knulihen lu.
Hennéen yóm atul le, atul laen dù olò gónón e mefet.
5Ominen mudél kul mung du lebuten.
Ya tey sidek kehlikoen kul bè yóm kebuten.
6Yó udélen ebélê le,
“Ngem yóm tau deng kenbê ye mò mogot kuy,
deng hyónu bè yóm dou bulul Sayun mò mogot benwu.”
7Ne angat mudél se kun yóm tau deng hyón Dwata yó, yó monen,
“Heglalagu bélê ye yóm deng tehe mon Dwata mò dou,
yó tehe monen, ‘Uu yóm hol dou ngà.
Bè nim kdaw ni kehetngónu du ne yóm kmaem dou.
8Mnihi béléu dé anì blayu kóm yóm kdéen benwu talak tonok.
Angat kóm funen yóm klamangen.
9Ke wen kembê du yóm kogotem kul,
gotu genlaem lu.
Yó kmò keglaem kul, lómón ke bnogulem bala tók yóm kuleng tonok,
gotu lemusok.’ ”
Yó se udél Dwata ebè yóm tau tehe néléken mò mogot benwu.
10Duhen yó, yu kem tau hol geta mogot benwu yóm kmoen ni,
hol hnungol ye dé yóm eles hetgamahu kuy.
Hol henknol ye yóm monu ni.
11Hol nmò ye yóm kóyô Dwata bélê ye,
mung du yóm klikò ye du.
Mo ye mom kenkel dé
12bè yóm keheglaan ye béléen.
Déke kendel msut lebuten,
ngem kà tódô ye matay mekto.
Tey kehligal le kul yó kem tau tendo gel hofin béléen.
Currently Selected:
Kem Lingón 2: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
