Kem Lingón 16
16
Lingón Dabid yóm kgel nawahen ke Dwata
1Ó Dwata, hol nofinem ou.
Són uu snaligu mò gónóhu heklung.
2Yó monu mò ke Dwata, “Uu se yóm Dwata gónóhu mogot.
Hono lemwót béléem yóm kdéen hyu nô béléu.”
3Tey gulit nmò le yó kem tau teneb le bè kehtahu le.
Tey hyu nawahu ke nóe lem blóng le.
4Okóm yó kem tau kendel gel mlóy ebè yó kem dwata kéng,
tey dê gfà le bè klowil le.
Là kóe mung bélê le ke sok le demsù,
ne là kóe tmaba ebè yó kem kul dwata kéng yó.
5Kaem tek són uu, Dwata, ken-gel nawahu.
Gotu gel blayem dou yóm wen muhu du.
Tódô hogotu kóm yóm klowilu elem haya.
6Tey hyu yó kem deng basahem dou.
Tey kegsengel nawahu du.
7Tey kdóyónu ke Dwata abay se gel sen-galaken ou.
Ke kifu, eles wen gel hefedemen dou anì elese temgama.
8Eles gel hegnahu Dwata,
ne tendo gel nô klohoku.
Yó gónón là monol nawahu
balù kihu sut béléu.
9Duhen yó, tey keslamatu béléem, Dwata,
ne tey kehyu nawahu.
Tódô gnómu yóm kgel nawahu,
10abay se tendo hensengem ebéléu yóm hatay.
Lemwót bè yóm tendo gel kimónu kóm,
là kô angat bayaem dou ebè yóm benwu yó kem tau deng matay.
11Tendo gel hegfanem béléu yóm lan ebè yóm klowil laen dù sónen.
Angat tey kligalu bè yóm angat knóu dyó béléem,
ne laen kô dù sónen yóm kbeyen nawahu béléem.
Currently Selected:
Kem Lingón 16: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
