Kem Lingón 148
148
1Hol dóyón tekuy Dwata.
Yu kem nô bè yó kem longit seglafin,
hol dóyón ye gu dyó Dwata.
2Ne yu kem gel hógówen gu bè longit,
hol dóyón ye Dwata se kuy.
Ne yu kem tey kdê sendaluen bè yó,
hol dóyón ye Dwata se kuy.
3Balù yóm kdaw ne bulón ne yó kem blotik gel kemnit bè longit,
hol gel dóyón ye Dwata se kuy.
4Bud yóm hol són longit tofi ta,
ne yó kem tey él nô tahen,
hol gel dóyón ye Dwata se kuy.
5Yake tódô kdê le gotu dmóyón ke Dwata.
Bè yóm tehe kedlimun Dwata kul, olo lemwót bè udélen.
6Bud bè udélen snéen gónón tódô wen mdengen gónó le nô,
ne là kô gbek le tô mulé du yóm udélen yó.
7Hol dóyón ye Dwata se kuy, yu yem kdéen nô te tonok.
Gomong yó kem blol lembang nô lem yóm tey mohin nelem,
hol gel dóyón ye Dwata.
8Senged se yóm ksilà ne bulók kulón ne kulón ne kem lobun,
balù yóm tey lenos bong gel mimón du yóm dók Dwata,
hol gel dóyón ye Dwata se kuy.
9Bud dóyón ye se kuy kem bulul geta dalang se yó kem bulul lemnek.
Senged se kuy yóm kdéen koyu mungu ne yó kem tey dlag lamang.
10Ne kdéen ógóf mayal ne ógóf tnomò,
kdéen kmadaw bè tonok ne kdéen onuk koyu,
hol gel dóyón ye Dwata se kuy.
11Hol dóyón ye Dwata se kuy kdéen tau hol geta mogot benwu,
ne yó kem tau knamal le,
kdéen ngà tau hol geta ne yó kem dumu tau wen glal le,
12kem lomi libun, ne kem lomi logi, kem tuha, ne kem ngà,
hol gel dóyón ye Dwata se kuy.
13Yake tódô kdê le gotu dmóyón du yóm boluy Dwata,
yóm Dwata gónó tekuy mogot.
Laen kô dù dumu boluy geta sentahen.
Yóm kegetahen, hol geta senta tonok, ne hol geta senta longit.
14Tey mbegel kehdaen du yóm kbenwu yó kem kun tau Israél.
Yó gónón mò du yóm yó anì kdê le gotu dmóyón du,
yakà lu du se yó kem tau gónóhen nô nawahen.
Hol gel dóyón tekuy Dwata.
Currently Selected:
Kem Lingón 148: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
