Kem Lingón 132
132
Sngal bè yóm kneged le ebè Jirusalim
1Ó Dwata, hol hentulónem
nawa Dabid ne kdê yó kem mgel deng henbalahen.
2Hentulónem nawa yóm deng safaen béléem,
yóm safaen bè yóm Dwata alì gembek yó kem tau Israél, yóm monen,
3“Là kóe mulék ebè dou gónô,
ne là se kóe hegnô.
4Là se kóe tagad tungô,
là se kóe hgulof,
5ke là naw ton du yóm gónów hdà du yóm gónô mò ke Dwata,
yóm gónô mò gónón nô yóm Dwata alì gembek yó kem tau Israél.”
6Deng gungol me nô bè benwu Ifrata yóm Slungan Fasad,
ne ditu bè tonok Jaar gónó me mton du.
7Lemwót tekuy ne, mógów tekuy ebè yóm gónó Dwata nô.
Tmaba tekuy ebéléen bè yó.
8Ó Dwata, huseki kum elem yóm kóm gónô,
mung kóm yóm Slungan Fasadem,
yóm Slungan ilô yóm kóm kfasang.
9Yó kem tau gel blóng ebéléem,
lu se fen mit yóm kóm kegewà ebè yó kem tau.
Ne yó kem tauhem, hol le hligal semngal ebéléem.
10Lemwót bè yóm nawahem bè Dabid,
yóm tau tóbóng lówóhem,
béem knogol nawa yóm tau hol geta deng nélékem
mò malak yó kem tauhem.
11Tey mget yóm tehe fasad Dwata ke Dabid,
là kóen na a bud mulék elem baken, monen,
“Angat wen bè yó kem sfuhem tles myón bè yóm gónóm myón kmamal.
12Ke là nulé le du yóm deng senfasad me,
ne ke lolò le yó kem hlolou kul,
angat laen dù tul sónen yóm kesetles le myón bè yóm kóm gónó myón kmamal.”
13Yakà deng nélék Dwata yóm benwu Jirusalim,
kóyóen ke bè yó gónóhen nô.
14Yó monen, “Ni se yóm benwu mò gónóhu nô kól bè laen dù sónen.
Bè ni gónów nô, abay se ni se yóm benwu hol dou nóyô.
15Angat henyuhu klowil yó kem tau lemen,
ne hegsengelu nawa yó kem tau élél nô du là bud le bitil.
16Ne yó kem tau gel blóng ebéléu,
nmou lu mò fen mit yóm kegewà ebè yó kem tau.
Ne yó kem tau tendo mimón do bè yó,
angat le hligal semngal ebéléu.
17Bè ni bè Jirusalim angat wen sotu semfu bè Dabid néléku
mò tau hol geta alì mfasang.
Yóm tau néléku yó mò layag ebè yó kem tauhu.
18Angat sidek kehyaku yó kem hohonen,
bede yóm kun, angat tey minggel yóm kegetahen.”
Currently Selected:
Kem Lingón 132: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
