Kem Lingón 122
122
Sngal bè yóm kneged le ebè Jirusalim. Lingón Dabid
1Tey kehyu nawahu gemnóm
du yóm kmon le du mò do,
“Lemwót tekuy ne, mógów kuy ebè Gónô Dwata.”
2Duhen yó, deng kuy mdà bè ni
lem ni kem bak tikeb yóm beng hmilol Jirusalim.
3Deng tey tilob kehefdà le du nim Jirusalim
mlan bè yóm tey tilob kessatul le du.
4Bè ni se gónó le gel stifun yóm kdéen tau Israél
mò gónó le gel dmóyón ke Dwata.
Nim gel nmò le ni, tódô lolò le yóm tehe hlau Dwata kul.
5Bè ni snéen gónó le tehe gel myón kmukum
yó kem tau hol geta mogot benwu bélê le.
6Hol tekuy gel mni bè Dwata anì menek nim benwu Jirusalim, yó mon te,
“Dwata he hemtilob kógów klowil le yó kem tau kembong nawa du yóm Jirusalim.
7Dwata he hol henek du yóm benwu yó,
ne hol nofinen yó kem tau mogot du.”
8Yó gónóhu mni du yóm kenek Jirusalim,
yakà wen yó kem dumuhu setwoli ne yó kem weu nô lemen.
9Sotuhen, mdà bè yó yóm Gónô Dwata yóm Dwata gónó tekuy mogot.
Yó gónóm mon, hol hnihu yóm kehyuhen yóm Jirusalim.
Currently Selected:
Kem Lingón 122: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
