Kem Udél Hlalak Tehe Selumun 1
1
Yóm smulat du ne mu yóm Udél Hlalak
1Ni se yó kem udél hlalak tehe Selumun, yóm sotu tau hol geta bè Israél, ngà yóm tehe Dabid.
2Ni kem udél hlalak ni mò hetngón du kut yóm khulung hedem lemwót bè Dwata ne kem hlau hyu anì getnef te yó kem udél wen hnigaden. 3Ni kem udél ni mò hmau kut yóm hyu bè klowil te bè kmò te yóm tedeng ne bè ktedeng kmò te ebè kem dumu ne bè là keskihuhen. 4Ni kem ni, benlayen lu khulung milô yó kem tau là ngelem kehedem le ne yó kem lomi lemnok benlayen lu ketngón ne yóm khulung le mit du hyu yóm kul kmò.
5Balù yóm tau hulung hedem ne hulung temnef sok gungolen ni kem udél ni, temnù yóm ketngónen ne gbeken se malak yóm kun kmò kógów kehedem. 6Bud bè ni kem udél ni gónó te gemtnef lan yó kem udél hlalak ngelem ne kem hlingón lemwót bè yó kem dumu tau hulung hedem.
7Yóm klikò tau ke Dwata hol but gónón temngón, okóm yó kem tau book mom hennê le yóm khulung hedem ne là kô le móyô htolok.
Yóm hlau bè kem ngà logi
8Ó Man, hol hnungolem yóm hlau maem ne hol kenmónem yóm tolok yéem.
9Lemwót bè yóm ktolok le kóm, yó se mò gónón hol tilob yóm kóm kmò lómón ke hegkesi mulew ne lemieg mò heklóón kóm.
10Ó Man, béem nmung ke tô n-goy le uu yó kem tau gemsalà.
11Hlingón te du, ke wen mon du mò kóm, “Mungi kum dé, na tekuy e hékét anì wen hnatay tekuy, balù yó kem tau laen dù duón kul.
12Na tekuy e kento hmatay kul, bê tekuy nmò mowil bélê le.
13Ke deng le matay gotu negef tekuy yó kem kimu mebtes le anì wen kimu lem gónô tekuy.
14Géhéli ne mungi kum. Tódô senged se kólól tekuy du yó kem kimu negef tekuy.”
15Ó Man hol béi abay mung kul ni kem tau lómón ni ne holi hlayuk bélê le.
16Yakà són mò le módód mò sidek ne eles le htigel bè khatay le tau.
17Yóm onuk là kóen na a bkó tébéd ke igoen temngel yóm knaken du yóm tau mò du.
18Okóm kul ni du kem tau mò sidek ni mom ten-geed le hmatay kul knô.
19Lómón se ni gónó le e kól yó kem tau ma kimu mlan bè hugus.
Ne bud bè yóm khugus le kimu gónó le matay.
Hlau mit kut hulung hedem
20Yóm khulung hedem lómón ke tau tendo tmaba ebè yó kem gónón alì wen tau bè kem lan ne bè yó kem gónô slong abay se móyô ke wen tau hmungol udélen.
21Hgelen tabahen ebè yó kem gónón alì wen tau hebnes ne balù kihu gónó le gel stifun kmukum yó kem tau.
22Ni se udélen, “Yu kem tau là ngelem kehedem ye, mò kegenen de duen yóm óyô ye du yóm là ketngón ye?
Yu kem tau gel semdekà, mò kegenen de duen yóm kbeyen ye yóm kesedkà ye?
Ne yu kem tau book, mò kegenen de duen yóm keklit ye du yóm ketngón?
23Ke hnungol ye yóm kbólówu kuy gotu hetngónu kuy yóm dou hendem ne yóm dou ketngón.
24Ket kiwólu deng tmaba kuy sbol tinoku yu, okóm là kô ye móyô hmungol ne là se kô kenmón ye do.
25Ne mom knogol ye yóm dou hlau ne là se kô ye móyô htolok.
26Yó gónóm mon, kesok wen gbunù ye ou tles kmuli kuy ne sendekau yu ke sok gefet bélê ye yóm alì knikò ye.
27Bè yóm tey keglayam ye yó lómón ke mekto ksuten bélê ye yóm tey lenos bong ne tey sidek kegnóm ye du.
28Mom yó he ktaba ye do okóm là kô tnimulu kuy.
Balù kihu gónó ye hol mebel do là kô ne ye e ton dou.
29Yakà yó duónen, laen dù óyô ye du yóm dou ketngón ne mom kenbê ye madat ke Dwata.
30Là móyô ye htolok ne là se kenmón ye du yóm dou kbólów kuy.
31Yó gónóm mon, guta ye bunguhen yóm ungel ye ne glayam ye du.
32Yó kem tau là ngelem kehedem le matay le, lan le kembê yóm khulung hedem.
Yó kem tau book meglà le se kul lemwót bè yóm là dog kehedem le du.
33Okóm kihu tau hmungol do, hyu knóen ne laen se bang tódô du ne laen se bang sidek knikoen.”
Duhen ni se utóm taba yóm khulung hedem.
Currently Selected:
Kem Udél Hlalak Tehe Selumun 1: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
