Nihimaya 10
10
Là gomongen bè nili yóm bérs 1 kól bè bérs 27. Yó tulónen bè ni kem bérs ni yóm gotu klista boluy yó kem tau deng fema yóm safà nmò le ebè Dwata. Yó kem tau fema du yó, duhen yóm gubérnor bélê le ne yóm tau geta bè yó kem gel blóng ebè Dwata ne yó kem dumu tau gel blóng le ebè Dwata ne yó kem sfu Libay ne yó kem tuha gónó le gel galak.
Yóm ksafà le bè Dwata
28“Mi kem tau Israél, kem tau blóng ebè Dwata ne kem sfu Libay ne kem tau mentey bè Gónô Dwata ne yó kem tau gel semngal lem Gónô Dwata ne kem tau gel mò nmò bè Gónô Dwata, dalang se yóm kdê me gel mimón yóm hlau Dwata bè yóm deng kehetsik me gu bè yó kem tólóng tau menwu lem blóng me, mung kum kem yehen me ne yó kem ngà me deng hulung hmungol du yóm hlau Dwata, 29gomong me bè yó kem tau gónó me gel galak bè yóm ksafà me bè Dwata. Ke nulé me yóm safà me ni, hol tnafak Dwata mi ne henmóyô me yóm tafak Dwata kum yó.
Yó safà me ebè Dwata, bè yóm klawi me mowil là gbek me du ke là lolò me du yó kem deng Hlau Dwata kum, yó kem hlau tehe hlanen bè Musis yóm tau tóbóng lówóhen. Là gbek me du ke là nimón me du yó kem kdê hlauhen kum yóm sana kum Dwata hol gónó mogot. Là gbek me du snéen ke snonol me yó kem hlauhen kum ne yó kem hloloen kum.” Yó se yóm safà yó kem tau Israél bè yóm kimón le ke Dwata.
Là gomongen bè nili yóm bérs 30 kól bè bérs 39. Yó tulónen yóm gotu klista le yóm kdê hlau Dwata kul mò hol nimón le.
Là gomongen bè nili yóm tsaptér 11, Yó tulónen bè ni yóm kmò kélék le yó kem tau mò menwu bè Jirusalim ne yóm boluy yó kem tau deng nélék le yó. Lemwót bè yóm là hol bud kwen yó kem tau menwu bè Jirusalim, yó gónó le mélék kem tau mò gmónô lem yóm syudad yó mò fen tmóbóng mentey du bè yó kem hohon le.
Yó tulónen bè tsaptér 12 yóm gotu klista le yó kem tau blóng ebè Dwata ne yó kem sfu Libay mung ke Sirubabél gna mulék ebè Jirusalim ne yóm nmò le bè Gónô Dwata bè yóm kkól le. Bud tulónen bè ni snéen yóm tey kehligal le bè yóm kehfun le du ebè Dwata yóm beng hmilol Jirusalim. Bè yóm kehligal le yó, wen lewu lumbuk tau semngal mógów ta yóm beng yó. Sotu lumbuk semngal mógów fi ebè kwanan ne sotu lumbuk semngal mógów fi ebè iwóng. Ngang le hligal semngal mógów efet le bud segeslong yóm kdê le ditu bè dolin.
Yó tulónen bè tsaptér 13 yóm bud kulék Nihimaya ebè Babilun bè yóm tau hol geta bè Pérsya tehe gónón mò nmò. Ominen bud mulék ebè Jirusalim. Bè yóm bud kkólen bè Jirusalim, tey sidek kebuten abay se wen bè yó kem tau Israél là bud blay le du ebè Dwata yóm gesfoloen ne deng le mom hembalù bè kdaw kehegnô. Lel le mom myehen bè yó kem tólóng libun hmilol kul. Yó nmò Nihimaya, tey kudélen kul ne hmoen kul yóm deng hlolò Dwata kul. Tahu se, lolò le.
Currently Selected:
Nihimaya 10: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
