Job 4
4
Yóm udél Ilifas ebè Job
1Omin Ilifas yóm tau lemwót bè Timan, malà ke Job, monen,
2“Ó Job, là meglalahi kô ke wen udélu ebéléem? Abay se là gbeku du ke là mudéle ebéléem.
3Bè gnan kdaw, deng dê dulékem gel temgel nawa yó kem tau wen gónón lebà nawa le anì smalig le bè Dwata ne gel ntudem yó kem tau wen gónó le lunog. 4Ke wen tau deng btang lem salà, lemwót bè udélem se gónón bud mdà. Ne deng bud gel hekgisem yó kem tau là buden mbegel kdà le. 5Okóm ni, na a uu wen gbunuen, tódói hmung là gbekem mbô du. 6Là mgel nawahem du kô yóm tendo gel klikoem ke Dwata? Ne yóm kgulit nawahem, là yó du kô nefet nawam bè yóm któbóng Dwata kóm?
7Ngem, hol hendemem dé. Deng wen tonem kô yóm tau laen dù salaen ke deng tódô hlós matay? Dalang se yóm tau tedeng kmoen, laen dù bud sfuhen kô yóm kun klowil? 8Ni se yóm dou deng ton, ke wen sidek hulu yó kem tau bud sidek se nuta le. 9Yó kmò Dwata kul yó kem tau yó, tek olohen myuf kul sana le gotu meglà. Tódô le gotu lana ke sut bélê le yóm kebut Dwata kul. 10Baluen he ke mkél le bè klóbô yó kem liyun, senged nóm gotu keglà Dwata kul. 11Yó kem liyun alì lóbô ke laen dù nsék le, kaem gotu le matay lemnus ne gotu le sekla tabag yó kem ngà le.
12Yóm tulónu kóm ni, deng lifut tulón le dou lómón ke wen semboyong du do. 13Yó kmoen, wen tonu bè yóm sotu kifu yóm igò le tungô yó kem dumu tau. 14Tey sidek klikou, botong setbol kkelu. 15Wen balu lenos temdól bè hifihu ne botong mdà lebonu. 16Tódô wen tonu mdà, okóm là gbeku hmingón du yóm mò kmoen. Ominu mungol yóm mudél bede là holen mgel, monen, 17‘Wen kô tau tedeng kmoen bè kton Dwata du? Wen kô tau laen dù belenen bè ktonen du yóm Dwata tehe mifil du?’
18Yóm Dwata, là kô nan e snalig kul yó kem tóbóng lówóhen nô bè longit. Balù yó kem gel hógówen, là kô nan e snalig kul. 19Sélétem tô yó ne snaligen yó kem tau olo nifilen lemwót bè tonok. Lemwót le bè kfung se kul. Mkél le bè ngà kbangi udì, mahil lemuna du. 20Bè tau kun, ke hanà hlafus tolo le mowil, okóm gu laanen là deng kifu deng le mom sana matay. Laen dù dumu tau kemmón kul. 21Bè yóm kehlingón te du yóm katay le, lómón ke deng gbà yóm gónó le nô. Tódô le kem matay hkawang.”
Currently Selected:
Job 4: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
