Job 3
3
Ktalaw Job ebè Dwata
1Kogolen bè yó, tódô hebkó mudél Job henmulaen yóm kdaw tehe ksuten. 2Yó monen,
3“Yake tódô lana ne yóm kdaw tehe ksutu. Dalang se yóm kifu hol tehe kbut keblutut yê do yake tódô lana. 4Yake tódô baling kifu yóm kdaw tehe ksutu yó. Yake tódô hlana balù bè Dwata bè longit, béen bud wen layag etahen ne. 5Hyu ke hol baling mget kkifuhen yóm kdaw yó. Hyu ke tódô tenfeng lenimun lobun. Hyu ke laen dù bud layagen, hono kifu mget gónó likò. 6Yake tódô lana yóm kifu kbut keblutut yê do. Hol béen abay bud gomong bè yó lem yóm sfalay ne béen abay bud gomong lem yóm sbulón. 7Yake tehe là bnutut yê do bè yóm kifu yó. Hyu ke tehe laen dù kligal le bè yóm kifu yó. 8Yó kem tau alì hulung hemmulà, yó kem tau gbek mdók yóm bwangkug lem mohin,#3:8 Bè kun kdaw Jobekni kesok kmifu kemdaw, kul kehedem du kem tau, wen yóm tey bong nô lem mohin boluyen libyatan na a fen gel hemlo yóm kdaw ne bulón ne kem blotik. yake hol henmulà le yóm kdaw yó. 9Yake bê le tehe mnóng yó kem blotik gel mnóng móyón mwas bè yóm ksutu. Yake béen tehe mwas yóm kdaw yó 10abay se là tehe hensengen du yóm tehe ksut blutut yê. Là hensengen du yóm ksutu igoen tey sidek yóm gónóhu e kól.
11Mom hyu ne ekni ke tehehe matay bè yóm tehe ksutu. 12Moen du ke tehe sniwi yê ou? Moen du ke tehe htutuen ou? 13Ke denge tehe matay denge hegnô ne ni, denge tungô. 14Hegnóe lem blóng yó kem tau hol geta ne lem blóng yó kem dumu tau mogot benwu, kem tau alì tótól tehe hefdà yó kem gónô lembang te tonok. 15Tungóe lem blóng yó kem ngà tau hol geta tehe tódô hnok lem gónô le yó kem tahu blówón ne blówón bukay. 16Mom hyu ne ke tehe lebeng le o lómón kebeng le yóm ngà sut hosot, yóm ngà là tonen du layag kdaw. 17Abay se ke deng kól lem hatay yóm tau, deng hotok ne kmò le béléen sidek yó kem tau gel mò sidek. Ne yó kem tau alì miteg mò nmò tódô le hegnô bè yó. 18Balù yó kem tau tehe negef le, tey wen kenek nawa le bè yó abay se là bud gungol le du yóm udél yó kem tau alì dmanda mdók kul. 19Gotu le nô bè yó snéen yó kem tau tehe wen kendengen le ne yó kem tau élél. Dalang se yóm tau tehe hesek deng gewà lem hólól ogoten.
20Moen du ke mowil yó kem tau alì sidek kliteg le? Ne yó kem tau alì sidek kegnóm le bè klowil le, moen du ke mowil le? 21Yó kem tau yó nangat le katay le, okóm là kóen dog kól bélê le. Yóm kehkoso le yóm katay le, mkay senta kehkoso yó he kem tau mokol yóm kimu legen deng lebeng le. 22Hyu nawa le ke deng le matay ne ke deng lebeng le lu. 23Moen du ke hlowil Dwata lu yó kem tau laen dù lan ton le mò gónó le gewà lem yóm hlayam le? Ne yó kem tau deng lus Dwata bè yóm gónón alì mgel, moen du ke hensengen bélê le yóm hatay? 24Lemwót bè yóm klangagu, balù udì ke wen óyóu mken, tódô senflósu dmolong. 25Deng gnómu ne yóm tehe knikou. Deng mom sut béléu yóm gónón slang katayu. 26Laen kô dù kenek nawahu ne laen se kô gónón tinof béléu. Laen dù hen-gnóu, tódô senflósen wen hlayam sut bè klowilu.”
Currently Selected:
Job 3: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
