Job 39
39
1Yó bud udél Dwata ebè Job, monen, “Yó kem kambing lem bnes gel nô bè yó kem bulul geta, deng tngónem kô kóm yóm kdaw ksut blutut le? Deng gtanudem kô kngà yó kem uhu? 2Deng tngónem kô kegen le mlutut du yó kem ngà le yó? Tngónem kô kóm yóm kdaw kehesut le ngà le? 3Kaem tódô le lekohong bè yóm ksut blutut le. 4Ne yó kem ngà le ditu lem bnes gónó le lemnok, omin le tmagak ke yê le ne là kô le bud semfulék ebéléen.
5Tmau du se hlayal kul yó kem kudà asnu lem bnes? Tmau du se htagaw kul anì bliwel le? 6Deng blayu kul yóm benwu laen hol wen tauhen mò kul gónó nô, suu lu bè yóm benwu là hyu mò du hulu. 7Gel le hlayuk bè yó kem syudad alì hebnes. Là kô gungol le du se kul ke wen udél tau dmanda mdók kul mò nmò. 8Tódô le mótób bè yó kem bulul, bè yó gónó le gel mebel kihu bnes nótób le.
9Gbekem hnalam du kô yóm safì lem bnes? Móyô kô ke htungóem bè yóm gónô gónóm gel hemsu ógóf ke kifu? 10Gbekem lemeket du dadu kô? Gbekem kô hdadu du? Neet. 11Balù bè yóm tey kekgisen, gbekem smalig du kô anì nmoen béléem yóm tey nmò blat? 12Gbekem smalig du kô mò tmóbóng kóm bè yó kem deng nutahem, duhen ke hwitem du yóm nutahem yó ebè yóm gónóm kmusu? Neet he.
13Yóm sotu onuk bong lem bnes boluyen ustrik, tey hulung kemfa. Okóm là hulungen móyóng lómón yóm kul khulung móyóng yó kem banug. 14Yóm onuk ustrik yó, ke gel mngà tódô tebelen ta tonok anì tódô le kinì bè tonok. 15Balù udì ke hendemen angat wen gemdà kul, duhen ke wen ógóf lem bnes bemtù kul. 16Ke deng misok yó kem ngaen lenbotù, lómón kmoen kul lómón ke sundu kun ngà du ne là kô hendemen du ke matay le. 17Kaem ou se tehe mò du béléen yóm kbakaen yó, là benlayu du khulung hedem. 18Okóm balù yóm tey kbakaen, ke lemwót mlóy tey metlasik. Mom knulihen yóm kudà alì hulung mlóy ne yóm tau smakay tahen.
19Uu kô, Job, tehe bemlay kul kgis yó kem kudà? Uu kô bemlay du kul yó kem blugal tahà le mò klóón le? 20Lemwót béléem kô yóm tey khulung le hetò lómón tlangas? Ne yóm kehlikò le tau mlan bè kdél le, lemwót béléem kô? 21Tey le kemgis kmuhaw bè tonok. Tódô hotu le gel le kendel mlóy ebè gónó sgida. 22Balù udì ke wen klikò le. Balù sudeng, là kô le likò du. 23Yó kem tey hanak nwit yó kem tau smakay kul, ne tey uni lekokot le ne tey silaen bè nóng kdaw yó kem buyus nwit le. 24Nan e muni féw mò but yóm kesgida le ya tey kehyu nawa le kmuhaw bè tonok, gotu le sektes mlóy. 25Bè ket kungol le du yóm uni féw tey kekdél le, lómón ke deng gungef le boo sfatay gu laan le là deng kól du ne gungol le snéen udél le htê yó kem tau genlal mdók yó kem sendalù nalak le.
26Ne yóm kofi, uu kô hdalang hóyóng du ne yóm kedfohen móyóng e leged? 27Dalang se yóm banug nahen nangat udélem he kô, ominen móyóng etu etta na a mò sala ditu ta yó kem léhék? 28Ditu gónón nô ta yó kem léhék alì geta ne nmoen mò gónón heklung yó kem tey botu bè hol tfusù yóm léhék. 29Bè yó tendo gónón gu temgélé mebel mò kenfóen. Baluen ke mayuk gónón nô yóm kenfóen, gbeken mton du. 30Ke wen matay, tódô le gotu sbung hilolen yó kem banug. Ne yó kem ngà le gotu ken le yóm unged tolo mitô.”
Currently Selected:
Job 39: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
