Job 33
33
1Ne ni, Job, hol hninggelem hmungol du yóm kdê monu mò kóm. 2Móyóe tmulón du kóm yó kem dou nô lem hendem. 3Tódô kdê yó kem tulónu kóm ni, sal lemwót lem nawaw ne hono tahu. 4Yakà yóm Tulus Dwata fen mò do ne kun nawa Dwata yóm yufen do mò hlowil dou, yóm Dwata laen dù là gbeken du. 5Ke hulungi malà do bnalaem o sen. Ndaem yóm kóm ktahu.
6Yakà senged kton Dwata kut yóm lewu te, hono te lemwót bè tonok. 7Yó gónóm mon, laen dù lasunem likò do, là kô ten-gnahu kóm.
8Ó Job, ni se yóm deng gungolu udélem, monem, 9‘Laen dù salau dou. Laen dù sidek deng nmou. Laen dù belenu, laen dù salà tngónu deng nmou. 10Okóm yóm Dwata, wen lan nmoen mò hemsidek do. Lómón kmoen do lómón ke hohonen ou. 11Lómón ke nféten o bè tihu ne gotu hnénégen nô kdólu.’
12Okóm Job, ni wen udélu ebéléem. Salà se yóm monem yó. Deng gel monem se kóm, Dwata se hol geta senta tau. 13Ne tahu se yó. Okóm moen de ke dnuónem Dwata bè yóm là kbalaen yóm gel tnalaw tau? 14Igò Dwata senflós tendo mudél ebélê tekuy, okóm laen dù tau hmungol du. 15Ke kifu bè yóm igò tau henga tungô, wen gel hekna Dwata kul ne wen gel htonen kul. 16Senboyongen lem klingu le ne gotu le likò bè yó kem eles hetgamahen kul. 17Mudél ebélê le anì tenflok le yóm kmò le salà ne anì là bud le gfét bè yóm kehegeta le knô le. 18Wen lanen hemseng kul anì là kô le meglà. Kóyóen ke lenwaen lu lem hatay. 19Yóm Dwata, wen gónón semtódô yóm tau mlan bè des ne mlan bè yóm tódô seflósen ketduk lem tiolen. 20Yóm tau wen desen laen kô dù bud óyóen mken, baluen ke tey mnóm yóm ken là kô kenen du. 21Yóm lówóhen tódô hono tiol. 22Udì duen gónón là gehlós ebè yóm kul benwu yó kem tau deng matay.
23Okóm ke wen hógów Dwata gu bè longit, yóm sotu bè yó kem hilu libu gel hógówen nô bè yó ne ke du mfi du yóm tau yó ne tulónen du yóm hyu mò nmoen, 24lemwót bè yóm kkodu Dwata du yóm tau yó, yó udélen ebè yóm hógówen, monen, ‘Hol lenwaem yóm tau yó. Là hyuhen ke hlós elem hatay yakà deng wen tonu mò soken du yóm klowilen.’ 25Ne tahu se. Ominen yó tódô bud mulék hyu yóm klówóhen, hol lómón se yóm lówóhen bè yóm hanà tolo klomihen tau. 26Ke mni bè Dwata yóm tau yó ya tey kehmóyóen du. Tey kehligal Dwata bè yóm kehmóyóen du ne bud baling hyu ktonen du. 27Yó angat udélen bè yó kem dumu tau yóm tau nsok Dwata yó, monen, ‘Denge gemsalà bè Dwata, là hyuhen yóm deng nmou okóm là kô tafak Dwata du do yóm tafak bang bayad yóm salà nmou. 28Deng lenwà Dwata o bè benwu yó kem tau deng matay ne ni denge bud mowil ne deng bud gel hlayag Dwata klowilu.’
29Ne ni se, yóm tendo gel nmò Dwata bè tau. 30Sal gel lenwaen lu bè benwu yó kem tau deng matay ne bud gel hlayagen klowil le. 31Ne ni, Job, hol hnungolem nim monu. Béi abay mudél hol hnungolem ou. 32Okóm ke wen se monem, hol tulónem dou anì hnungolu. Hyu nawahu ke tahu se yó kem monem. 33Okóm ke laen dù tô monem, hol béi abay mudél. Hol hnungolem ou anì toloku kóm yóm khulung hedem.”
Là gomongen bè nili yóm tsaptér 34 kól bè tsaptér 37. Bè ni kem tsaptér ni, sfu yóm udél Ilihu ebè Job.
Currently Selected:
Job 33: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
