Jirimaya 8
8
Là gomongen bè nili yóm bérs 1 kól bè bérs 17. Yó tulónen bè yóm tsaptér ni yóm tey kegbà yóm benwu yó kem tau Israél bè yóm deng kegdofì yó kem hohon le. Balù yó kem lebeng yó kem gna tau hol geta bélê le kkólen bè lebeng yó kem tau hkawang, gotu nakat le ne gotu bulét le tiol le bè klamangen. Tódô lemnal bè kdaw ne bè bulón ne bè blotik yóm tehe gónó le e gel tmaba. Yóm nmò yó kem hohon le yó, alì sidek bè yó kem tau Israél. Okóm yó se guta le bè yóm tehe gel ktaba le ebè yó kem gel ton le bè longit.
Yóm igò Jirimaya gel tmulón du bè yó kem tau yóm angat gfà le ni, tey kkiken.
Kkik Jirimaya yóm angat gfà yó kem tau bè Juda
18Yóm tey klangagu ni là kóen mkó. Lómón ke deng gbà lem kfuhu. 19Hol hnungolem dé yóm kik yó kem tauhu, botong gefet bè klamang yóm benwu me.
Yó mon le, “Deng tahu tebel Dwata kô Jirusalim? Là buden nô bè yó ne kô, igoen du yóm hol geta bélê le?”
Yó balà Dwata kul, monen, “Moen de ke alì hebut le ou yó kem tauhu bè yóm gel ktaba le ebè yó kem dwata kéng, dwata laen dù muhen?”
20Yó utóm kik yó kem tau, mon le, “Laen dù bud kdaw me ne. Deng deng ne yóm nuta, blaem là kô kuy deng gewà.”
21Bud mon Jirimaya, “Nkiku yóm gfà yó kem tauhu. Tódóe teneng là kóe gudél, botonge yem bè yóm klangagu. 22Laen dù bud bulung kô ditu bè benwu Gilyad? Laen dù bud tau mulung bè yó kô? Moen se ke laen dù hkó du yó kem halì yó kem tauhu?”
Currently Selected:
Jirimaya 8: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
