Jirimaya 33
33
Kfasad Dwata yóm bud kehguléken klowil yó kem tau Israél
1Yóm igò Jirimaya tolo geblanggù talak lósól yóm gónô bong yóm tau hol geta bè yóm gónóhen nô yóm tau gel mentey bè yó, ni se gewu dulék Dwata mudél ebéléen, monen, 2“Ni se udél Dwata yóm Dwata tehe mò longit ne tonok. Yó hol kun boluy duhen yóm sana Dwata hol gónó mogot. Yó monen, 3‘Tmabahi ebéléu ne angat bnalau uu ne wen tulónu kóm yóm alì tennga là deng wen temngón du sut dini elem hulin kdaw. 4Yó udél Dwata yóm Dwata yó kem tau Israél, monen, Baluen ke deng gotu genbà ye yó kem gónô lem yóm syudad ni gomong lemen yóm gónô bong yóm tau hol geta mogot kuy ne deng gotu nwa ye ngomen mò tgel ye yóm beng hmilol Jirusalim anì là gusek yó kem hohon ye, 5baluen he ke yó deng nmò ye botong le ghusek he yó kem sendalù Babilun. Yó kem logi bè nim syudad ni mit sfatay bélê le deng le mom gotu matay, abay se deng hol nô bè nawahu ne yóm keglau kul lemwót bè yóm tey sidek kebutu kul. Deng tódô bayau lu ne lemwót bè yóm kdê sidek gel nmò le.
6Okóm angat wen he kdawu, bud temlob du yó kem deng gbà bè Jirusalim ne bud henyuhu klówó yó kem tauhen. Ne bud hefeneku ke benwu le ne laen kô dù bud hemen le yó kem tau nô lemen. 7Angat bud hen-guléku klowil le yó kem tau bè Juda ne yó kem tau bè Israél. Gotu bud hdau yó kem syudad le. 8Gotu bud hólósu lu bè kdê yó kem salà le béléu ne tódô gotu hnifótu yóm kdê salà le bè yóm là kimón le dou. 9Ne duhen yó, bè nim syudad ni gónón wen kligalu ne któtólu ne yóm kadat le dou bè klamangen benwu te tonok. Angat ton yó kem tau bè klamangen benwu yóm kehyu nmou bè yó kem dou tau ne botong le kenkel bè yóm tey klikò le.’
10Yó bud udél Dwata, monen, Yó gel mon ye, ‘Deng tey kehsidek le du yóm tonok ni. Laen dù bud tau tonem kkólen bè yó kem ógóf, deng le gotu lana.’ Okóm bè yó kem lan laen dù tauhen bè Jirusalim nim kmoen ni kkólen bè yó kem dumu benwu glem lem Juda, angat bud wen 11gungol ye tau hligal ne kmuli. Bud gungol ye se yóm udél le hligal yó kem tau syehen. Bud gungol ye se yóm kehligal le semngal yó kem tau bè yóm kógów le ebè yóm dou Gónô lan le mit du yóm gel dsù le ebéléu mò gónó le dmóyón do. Yó angat sngal le, mon le,
‘Hol dóyón tekuy yóm Dwata laen dù là gbeken du, abay se tey hyu kmoen.
Laen kô dù nan e són yóm kbong nawahen tau.’
Yakà angat bud hen-guléku du nim benwu ni lómón yóm gnan,” mon Dwata.
12Yó udél yóm Dwata laen dù là gbeken du, monen, “Yóm benwu là hyu bud menwu du nim kmoen ni, laen dù tauhen kkólen bè yó kem ógóf deng le gotu lana, angat bud wen kem tau semgyok ubiha nô du. 13Angat tey bud kwen le yó kem ógóf le bè yó kem benwu lem bulul ne bè yó kem benwu bè but henfek bè Juda ne bè Négéb ne bè yóm tonok Bindyamin ne bè yó kem benwu lemnek hmilol Jirusalim ne kdê yó kem benwu bè Juda, angat tey ógóf wen nô du. Ou se Dwata nim mudél ni.”
14Yó bud udél Dwata, monen, “Angat kól yóm kdawen nmou bè yó kem tau Israél ne bè yó kem tau Juda yó kem hyu deng tehe fasadu kul. 15Bè yóm kdaw yó, angat hyónu bè yóm gónón myón kmamal Dabid yóm kun sfu tau alì tedeng knawahen. Hono tedeng ne hono hyu yóm angat nmoen bè klamang yóm benwu nogoten. 16Bè yóm kdaw yó angat gewà yóm benwu Juda ne angat menek yóm syudad Jirusalim. Ne yó angat tendo mon yó kem tau nô lemen, ‘Dwata se yóm mit tekuy tedeng.’ ” 17Yakà bud ni du se yóm udél Dwata, monen, “Angat wen sfu Dabid ne yóm kyónen kmamal bè Israél laen kô dù tul sónen. 18Ne tendo wen se sfu Libay mò blóng ebéléu fen demsù yóm dsù hkekeb le ebéléu ne yóm halay gel blay le dou ne yó kem dumu gel dsù le.”
19Ominen bud wen udél Dwata ebè Jirimaya, monen, 20“Tehe yu ekni, deng tehe wen senfasad me yóm kdaw ne kifu anì hol le gel msut bè yóm kul bantang gel ksut. Yóm tehe kesfasad me yó laen kô dù tau gembek gembà du. 21Hol lómón yó se yóm tehe kesfasad me Dabid yóm tau tóbóng lówóhu. Yó fasadu du, tendo wen semfu gu béléen fen myón bè yóm kun gónó myón kmamal. Lómón yó snéen yóm tehe kesfasad me yó kem sfu Libay. Yó fasadu kul, tendo wen sfu Libay mò blóng ebéléu. Yóm tehe kesfasad me yó laen kô dù tau ke gembek gembà du. 22Angat hbólu yó kem sfu Dabid yóm tau tóbóng lówóhu, dalang se yó kem sfu Libay mò blóng ebéléu. Yóm kmò kehbólu kul, hol lómó kwen le blotik bè longit ne lómón kwen le helek bè kilil mohin, là kô gbek msó kul.”
23Wen bud udél Dwata ebè Jirimaya, monen, 24“Deng gungolem kô yóm gel mon yó kem dumu tau? Yó mon le, ‘Igò Dwata se deng mélék yó kem tau Juda ne yó kem tau Israél, mom tódô bayaen lu.’ Tey khisik le kul yó kem dou tau ne là bud dilô le kul sotu but benwu. 25Okóm ni se balau kul, ‘Là kô bud kenbéu kul ne yó kem dou tau. Yóm là kekbéu kul yó, hol lómón yó se là ketlesu kógów yóm kdaw ne kifu ne tonok ne longit. 26Là kô naw e kenbê kul yó kem sfu Jakub dalang se Dabid yóm tau tóbóng lówóhu. Angat wen néléku bè kun sfu Dabid mò mogot yó kem sfu Abraham, Isak ne Jakub. Yó nmou bélê le, angat bud huléku lu ebè yóm kul benwu ne tey kkoduhu kul bè yó.’ ”
Currently Selected:
Jirimaya 33: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
