Isaya 50
50
1Yó udél Dwata, monen,
“Bè kuy kehedem du, deng kenbéu yu yó kem dou tau,
hol lómón yóm logi kenbéen tuha libunen?
Ke lómón yó se yóm dou nmò, nô se yóm klatas deng fenmahu bè kbéu kuy yu kem dou tau? Laen duen.
Kmò kehedem ye du, deng hbaluu yu kô anì nit le yu ebè benwu mayuk,
hol lómón yóm tau hbaluen yó kem ngaen anì baling le hesek?
Là kô yó du lewóten yóm kegef le kuy ebè benwu mayuk.
Yó lewóten, duhen yóm salà ye.
Yó gónóhu hdó kuy lemwót bè yóm là kimón ye yóm hlauhu.
2Moen de ke là kenmón le dou yó kem dou tau
bè yóm tehe kógówu elem blóng le yóm naw e kehewà kul?
Moen de ke là bnalà le dou bè yóm ktabahu kul?
Ilóem laen dù kgisu kô lemwà kul?
Balù yó hem mohin, gbeku tódô hekti du lemwót bè udélu.
Ne yó kem él mlel, gbeku tódô hekti kul
anì gotu matay yó kem utón él nô lemen,
ne henbalingu benwu là hyu menwu du.
3Gbeku tódô hget du kifu gu talak kmawang.
Yóm kifu mget yó, hol lómón ke lenangagen yó kem tau deng matay.”
Kun kimón yóm tau tóbóng lówó Dwata
4Yóm Dwata hol dandónen geta gónóhu mogot,
du se tmolok du dou yóm hyu mò udélu
anì ten-gelu yó kem tau deng alì sidek kliteg le.
Tódô ket hlafus gel benlayen ou óyô hmungol du yó kem nóyô toloken dou.
5Deng benlay Dwata ou khulung hedem.
Là kóen deng wen gónóhu là mimón ke Dwata,
duhen ke deng wen gónóhu kmogol du.
6Tódô bayau kwangu bè yó kem tau mfes do.
Tódô bayau snéen yóm kehnê le dou.
Ne yóm kekdut le bngetu ne yóm kedfut le lem uyóhu, tódô bayau kul.
7Okóm yóm kehnê le dou, là kô gehsideken do,
abay se gel tnóbóngen ou yóm Dwata hol dandónen geta gónóhu mogot.
Tódô henbalahu yóm nmò le béléu.
Tngónu là kô wen gónóhu myak,
8abay se tey moni béléu Dwata,
ne angat hdilóen yóm là ktahuhen yóm duón le do.
Wen kô tau tô kmamo do?
Slomong kuy mógów bè kukum sen
anì tulónen bè yó yóm duónen kmamo do.
9Yóm Dwata hol dandónen geta gónóhu mogot,
du se mfi dou.
Ke du mfi dou, tau du de tô mon du wen salau?
Yó kem tau tô kmamo dou,
angat le tódô gotu lana se kul,
lómón klana le, lómón yó kem nes nsék kaba.
10Bong bélê ye kuy, yu kem tau wen klikoen ke Dwata,
yu kem gel mimón du yóm udél yóm tau tóbóng lówóhen,
anien ke tey kmifu yóm lan lolò ye,
hol snalig ye yóm gónó ye mogot,
hol ken-gel nawa ye Dwata.
11Ne yu kem tau gel natul hensideken kem dumun,
angat bud mulék eta ye yóm ksidek atul ye yó.
Hol hdohò Dwata yóm monu ni.
Angat sidek gónón e kól klowil ye.
Là gomongen bè nili yóm tsaptér 51. Yó tulónen yóm kdók Dwata ke Isaya anì nan e ten-gel nawa yóm kdê tau Israél senflós smalig bè Dwata ne mimón du balù yóm tolo keglayam le bè yóm kegef le kul. Yó mon Isaya mò kul là buden legen ne yóm kehefewà le kuy. Angat ye gotu bud semfulék ebè Jirusalim, ne bud ye gotu semngal yó kem sngal kligal, yóm kligal kól bè laen tul sónen.
Yó monen bè bérs 22-23, “Ni se yóm udél yóm Dwata hol dandónen geta, yóm kuy Dwata gel mofin kuy, monen, ‘Ngem, kóhu bélê ye yóm alì keglayam ye. Là bud ye glayam du ne yóm kebutu kuy. Deng hlanahu ne. Okóm angat hnayamu lu yó kem gel hmayam kuy. Angat hegnómu yó kem tau gel mdà kuy elem tonok.’ ”
Currently Selected:
Isaya 50: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
