Isaya 48
48
Là gomongen bè nili yóm bérs 1 kól bè 16. Yó tulónen bè ni yóm eles htulón Dwata ke Isaya ebè yó kem kun tau, duhen yó kem tau Israél. Lemwót bè yóm là dog kmò le du yóm deng fasad le ke Dwata, ne bud lemwót bè yóm tey alì kgel kulu le ne yóm katù le ke Dwata, yó gónó Dwata deng tehe gna eles tmulón du kul yóm angat ktafaken kul hlanen bè yóm gotu kegef le kul ebè Babilun. Tahu se, gotu negef le lu ebè Babilun. Okóm mom hlan Dwata bè yóm alì kehlayamen kul yó yóm kehbalingen kul tau laen dù belenen. Ne bè bérs 11 yó mon Dwata, “Angat lenwau yu anì laen dù gónóhu myak. Lemwóten bè yóm kehewau kuy yó, là gbek le mon du yó kem dumu but tau, gbek yóm kul dwata gemlà do. Là kóe móyô hegfun du kul yóm dou kehyu ne klinggel.”
Bud tulónen bè ni yóm eles ktulón Dwata du kul yóm kéléken ke Sayrus yóm sotu tau hol geta bè benwu Persya, mò gembà yóm benwu Babilun, ne Dwata angat tmóbóng du anì gemmò.
Yóm kóyô Dwata bè yó kem tauhen
17Ni se udél yóm Dwata laen dù belenen yóm lemwà tekuy kem tau Israél yóm gónó tekuy mogot, yó monen, “Ou se yóm Dwata gónó ye mogot.
Teye móyô tô tmolok kuy yóm hol hyu bélê ye.
Móyóe malak kuy bè yóm lan hyu mò lolò ye.
18Ke deng tehe hnungol ye yó kem hlauhu kuy, sana klelen he yóm kenek nawa ye lómón lel él.
Ne sana kehlósu hegmò kuy bè yó kem hohon ye, lómón keseflósen gedkol ebè kilil yóm lewók mohin.
19Ke deng tehe hnungol ye, deng le tey mobung ne yó kem sfu ye lómón kwen le helek.
Ne lemwót bè yóm kofinu kul laen dù tau gembek gemlà kul.”
20Yó ne hewà ye gu bè Babilun, laen dù bud gónó ye gfét bè yó ne.
Hol ye hligal mensag.
Hol tulón ye bè klamangen yóm deng kehewà Dwata kuy kem kun tau Israél, kem tau tóbóng lówóhen.
21Bè yóm tehe kalak Dwata yó kem tauhen ekni, mlan le bè yóm tey benwu kinì alì sidek kékéng tonoken.
Ewenem là kô le glayam mlan bè kleeng le.
Tódô hesut Dwata gu lem botu yóm mò él le.
Tódô heskangen yóm tey botu bong, tódô hesut gu lemen se yóm tey él.
22“Okóm,” mon Dwata, “yó kem tau gel mò sidek, laen kô kul kenek nawa.”
Currently Selected:
Isaya 48: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
