Isaya 31
31
Kofin Dwata yóm benwu Jirusalim
1Deng le gotu golu elem hatay ne yó kem tau na a htóbóng bè Idyip. Tô genléd nawa le yóm tey kgis kem tau Idyip bè gida, abay se wen yóm tey kudà le ne wen yóm tey klitun tók nit le sgida ne yóm tey sendalù wen le. Mom là dog snalig le ke Dwata, yóm kul Dwata yó kem tau Israél yóm Dwata laen kô dù belenen. Là kô le mni tóbóng béléen. 2Deng eles hendem Dwata yóm angat nmoen bélê le. Wen glumfak hwiten elem blóng le. Deng eles tulónen kul yóm angat ktafaken yó kem tau gel mò sidek, gomong bélê le yó kem tau mofin kul. Ne tahu se, dohò tnafaken lu. 3Là kô le Dwata yó kem tau Idyip snalig le, olo le tau tonok. Yó kem kudà le laen dù tulus le, senged le bè kem dumu kudà snéen. Ke tnafak Dwata yó kem alì kemgis yó, gotu le meglà. Ne yó kem tau tô tnóbóng le gotu le gomong meglà ne matay se kul.
4Yó udél Dwata ebéléu, monen, “Ke wen tau mentey ubiha, balù nô kehtéen du yóm liyun wen ubiha kenfóen, là kô nan e gbek tmebel du yóm deng kenfóen yó. Senged se béléu, yóm Dwata laen kô dù là gbeken du laen kô gembek hemseng dou bè yóm kofinu yóm bulul Sayun. 5Lómón yóm onuk koyu tendo móyóng ta yóm salahen nofinen yó kem ngaen hol lómón se yóm nmou bè Jirusalim. Ou se yóm hol kemlung du ne hol mofin du. Ou se yóm Dwata laen dù là gbeken du.”
6Yó udél Dwata, monen, “Yu kem tau Israél tey kegsalà ye béléu. Tey kekbê ye do. Okóm ni, yake mulék ye ebéléu ne. 7Angat kól yóm kdaw gotu kbot ye du yó kem dwata lennged nmò ye gu bè blówón bukay ne gu bè tahu blówón.
8Angat meglà bè gida yóm benwu Asirya hohon ye, okóm là lemwóten bè kgis tau. Angat le gotu mlóy gu bè gida yó kem sendalù Asirya. Ne yó kem lomi lemnok bélê le angat le gotu baling hesek. 9Yóm tau hol geta bélê le angat mlóy se kun lemwót bè ksidek klikoen. Ne yó kem genlal bè sendalù le gotu le mlóy se kul lemwót bè yóm alì ksidek klikò le, botong gtebel le yó kem flag gel nwit le bè gida.” Yó se yóm deng udél Dwata, yóm Dwata gel tnaba yó kem tau bè Jirusalim, yóm Dwata wen ofihen gónó le gel mtem yóm gel dsù le ebéléen.
Currently Selected:
Isaya 31: tbl
Highlight
Copy
Compare
Share
Want to have your highlights saved across all your devices? Sign up or sign in
© 2007, Wycliffe Bible Translators, Inc. All rights reserved.
